Read Pashto Bible (Yusufzai) — د پښتو مقدس کتاب يشعياه 9 Bible Online

يشعياه 9 - Pashto Bible (Yusufzai) — د پښتو مقدس کتاب bible

يشعياه 9

¹نو د هغوئ دپاره به دا مصيبت تر هيمشه پورې جارى نۀ وى. د زبولون او نفتالى علاقه ته په يو وخت کښې سپک کتلے شول، خو په راتلونکې وخت کښې به دا علاقه عزتمنده شى، نَمرخاتۀ طرف ته د مديتران سيند نه واخله د درياب طرف ته د اُردن نه پورې او داسې ګليل به هم عزتمند شى، چرته چې غير يهوديان اوسېږى.

²کوم خلق چې په تيارۀ کښې ګرځيدل، نو هغوئ يوه لويه رڼا وليدله، او هغوئ څوک چې په تورو تيارو کښې اوسيدل، پرې نُور وځليدلو.

³تا د هغوئ قوم لوئ کړے دے او لويه خوشحالى دې ورکړې ده. تا چې څۀ کړى دى نو په هغې باندې هغوئ خوشحالى کوى، هغوئ دومره خوشحالى کوى لکه چې خلق يې د فصل د رېبلو په وخت کوى، او يا چې کله مالِ غنيمت تقسيميږى.

⁴تۀ به د هغوئ د غلامئ جغ مات کړې او د هغوئ د اوږو نه به دروند بوج واخلې. او د ظالمانو زور به ختم کړى داسې لکه څنګه چې تا د ميديان لښکر تباه کړے وو.

⁵د هر يو جنګيالى فوجى پېزار او د هغوئ هغه ټولې جامې چې په وينو داغدارې دى، هغه به په اور وسوزولے شى.

⁶زمونږ دپاره يو زوئ پېدا شوے دے! مونږ له يو زوئ راکړے شوے دے! او حکمرانى به د هغۀ په اُوږو وى. هغه به په دې نومونو سره يادېږى، ”عظيم مشير“، ”خُدائ تعالىٰ“، ”ابدى پلار“ او ”د آمن شهزاده“.

⁷د هغۀ شاهى طاقت به زياتېږى، د هغۀ بادشاهى به همېشه په آمن کښې وى. هغه به د داؤد نه پس بادشاه وى، د هغۀ د بادشاهۍ بُنياد به په صداقت او اِنصاف باندې قائم وى، د اوس نه واخله تر همېشه همېشه پورې به د هغۀ بادشاهى قائمه وى. د مالِک خُدائ رب‌الافواج غيرت به هم دغه شان وکړى.

⁸مالِک خُدائ د يعقوب خلاف کلام کړے دے، او هغه په بنى اِسرائيل مسلط دے.

⁹د بنى اِسرائيل ټول خلق او هغه هر يو کس چې په سامريه کښې اوسېږى، هغوئ ته به پته ولګى چې دا هغۀ کړى دى. خو اوس هغوئ مغروره او خود غرضه دى. هغوئ ووئيل،

¹⁰”زمونږ د خښتو عمارتونه راغورزېدلى دى، خو مونږ به دا بيا د تراشلے شوؤ کاڼو نه جوړ کړُو. د چِنار ونې راماتې شوى دى، خو مونږ به د دې په ځائ د دِيار ښائسته ونې ولګوُو.“

¹¹خو مالِک خُدائ د هغوئ دشمنان راپارولى دى چې په هغوئ باندې حمله وکړى.

¹²د نمر خاتۀ طرف ته شام او د نمرپرېواتۀ طرف ته فلستيه خولهٔ پرانستلې ده چې بنى اِسرائيل ژوندې تېر کړى. خو د مالِک خُدائ غصه تر اوسه پورې سړه نۀ ده، او هغۀ د سزا دپاره تر اوسه پورې لاس اُوچت نيولے دے.

¹³اګر چې مالِک خُدائ رب‌الافواج هغوئ له سزا هم ورکړې ده، خو د بنى اِسرائيل خلقو توبه نۀ ده ويستلې، او هغوئ هغۀ ته واپس نۀ دى راګرځېدلى.

¹⁴صرف په يوه ورځ کښې به مالِک خُدائ د بنى اِسرائيل مشرانو او خلقو له داسې سزا ورکړى چې د سر نه واخله تر بېخه پورې به ټول ختم کړى.

¹⁵مشران او عزتمند خلق د سر په شان دى او هغه پېغمبران د بېخ په شان دى چې د چا تعليمات د دروغو نه ډک وى!

¹⁶د قوم مشرانو خلق بې لارې کړى دى او د تباهۍ په طرف يې روان کړى دى.

¹⁷نو مالِک خُدائ به د قوم د ځوانانو نه خوشحاله نۀ وى او هغه به په کُنډو او يتيمانو باندې هم رحم نۀ کوى، ځکه چې ټول خلق د خُدائ نه اوړېدلى دى او بدعمله شوى دى او هغوئ چې څۀ هم وائى هغه بدى وى. خو د مالِک خُدائ غصه به بيا هم نۀ سړېږى او هغۀ به د سزا ورکولو دپاره خپل لاس اُوچت کړے وى.

¹⁸د خلقو بدعملى د هغه اور په شان بلېږى کوم چې د ازغو بوټى او غنې سوزوى. دا د ځنګل د هغه اور په شان بلېږى کوم چې پاس په هوا کښې د لوږى ستنه جوړوى.

¹⁹د مالِک خُدائ رب‌الافواج غصې سره به ټول مُلک وسوزى او په خلقو باندې به يې اور بَل وى او يو کس به په بل هيڅ ترس نۀ کوى.

²⁰هغوئ به خپل ګڅ طرف ته ګاونډيانو باندې حمله وکړى خو بيا به هم اوږې وى، په خپل ښې طرف ګاونډيانو باندې به حمله وکړى خو بيا به يې هم لوږه نۀ ختمېږى. په آخر کښې به هغوئ خپل بچى هم وخورى!

²¹منسى به په اِفرائيم او اِفرائيم به په منسى حمله وکړى، بيا به هغوئ يو ځائ په يهوداه حمله وکړى. خو د مالِک خُدائ غصه لا سړه نۀ ده، او هغۀ د سزا ورکولو دپاره لاس اُوچت نيولے دے.