Read Pashto Bible (Yusufzai) — د پښتو مقدس کتاب لاويان 2 Bible Online

لاويان 2 - Pashto Bible (Yusufzai) — د پښتو مقدس کتاب bible

لاويان 2

¹کله چې څوک مالِک خُدائ ته يوه د غلې نذرانه پېش کوى، نو هغه دې ښۀ اوړۀ وى. د زيتُونو تېل اؤ خوشبودار لوبان دې په کښې واچوى،

²د هارُون د کورنۍ اِمامانو ته دې راوړى. اِمام به يو مُوټے د اوړو، د تېلو اؤ سره د ټولو لوبانو نه راواخلى اؤ په قُربان‌ګاه به يې وسوزوى، دا به د يوې نښې په شان وى چې دا ټوله مالِک خُدائ ته پېش کړې شوې ده. په اور سوزېدُونکې د دې نذرانې بُوئ په مالِک خُدائ باندې ښۀ لګې.

³د غلې د نذرانې نه پاتې شوې برخه به د اِمامانو وى، دا به ډېره مُقدسه ګڼلے شى، ځکه چې دا مالِک خُدائ ته په اور سوزېدُونکې نذرانې نه اخستے شوې ده.

⁴کۀ دا نذرانه ډوډۍ وى چې په تنُور کښې پخه شوې وى، نو دا دې د خمبيرې نه بغېر تياره شوې وى. دا دې د اوړو نه تيارې شوې غټې ډوډۍ وى چې د زيتُونو تېل په کښې ګډ وى يا دې نرۍ نرۍ ډوډۍ وى چې د زيتُونو تېل ورباندې لګولے شوى وى.

⁵کۀ هغه نذرانه ډوډۍ وى چې په تبخى باندې پخه شوې وى، دا به د داسې اوړو نه تياره شوې وى چې د زيتُونو تېل په کښې ګډ وى خو چې خمبيره په کښې نۀ وى.

⁶چې کله يې د يوې نذرانې په توګه پېش کوئ نو دا چُورى کړئ اؤ نور تېل ورباندې واچوئ.

⁷کۀ هغه نذرانه داسې ډوډۍ وى چې په تبخى باندې پخه شوې وى، نو هغه دې د اوړو اؤ زيتُونو د تېلو نه تياره شوې وى.

⁸دا مالِک خُدائ ته د غلې نذرانې په توګه راوړئ اؤ اِمام ته يې پېش کړئ اؤ هغه به يې قُربان‌ګاه ته يوسى.

⁹اِمام به د نښې په توګه يوه برخه ترې نه واخلى چې دا ټوله مالِک خُدائ ته پېش کړے شوې ده اؤ هغه به دا په قُربان‌ګاه باندې وسوزوى. په اور سوزېدُونکې د دې نذرانې بُوئ په مالِک خُدائ باندې ښۀ لګې.

¹⁰د غلې د نذرانې نه پاتې شوې برخه به د اِمامانو وى، دا به ډېره مُقدسه ګڼلے شى، ځکه چې دا مالِک خُدائ ته په اور باندې سوزېدُونکې نذرانې نه اخستے شوې ده.

¹¹چې د غلې کُومې نذرانې تاسو مالِک خُدائ ته پېش کوئ په يوه نذرانه کښې دې هم خمبيره نۀ وى، مالِک خُدائ ته په اور سوزېدُونکې نذرانه کښې چې کله هم خمبيره يا شات وانۀ چوئ.

¹²تاسو چې هر کال لَو کوئ نو د خپل فصل وړومبۍ غله مالِک خُدائ ته راوړئ، خو دا دې په قُربان‌ګاه باندې نۀ شى سوزولے.

¹³د غلې په هره نذرانه باندې مالګه اچوئ، ځکه چې مالګه د خُدائ پاک اؤ ستاسو په مېنځ کښې د تړون نښه ده. (تاسو په خپلو ټولو نذرانو خامخا مالګه اچوئ.)

¹⁴چې کله تاسو د خپل رېبلے شوى فصل د وړومبۍ غلې نذرانه مالِک خُدائ ته راوړئ، نو وريتې شوې دانې يا مېده شوى اوړۀ ورته پېش کوئ.

¹⁵د زيتُونو تېل په کښې ورګډ کړئ اؤ لوبان ورباندې واچوئ.

¹⁶اِمام به لږ اوړۀ اؤ څۀ تېل اؤ ورسره ټول لوبان هم وسوزى اؤ دا به مالِک خُدائ ته په اور سوزېدُونکې نذرانې د نښې په توګه وى.