Read Pashto Bible (Yusufzai) — د پښتو مقدس کتاب لاويان 20 Bible Online

لاويان 20 - Pashto Bible (Yusufzai) — د پښتو مقدس کتاب bible

لاويان 20

¹بيا مالِک خُدائ مُوسىٰ ته ووئيل چې

²بنى اِسرائيلو ته ووايه، ”کۀ ستاسو يو خپل کس يا يو مُسافر چې ستاسو سره اوسېږى هغه د خپلو ماشُومانو نه يو ماشُوم مولک بُت ته پېش کړى نو ټول قوم به هغه سنګسار کړى اؤ مړ به يې کړى.

³کۀ څوک د خپلو ماشُومانو نه يو ماشُوم مولک بُت ته ورکړى اؤ زما مُقدسه خېمه ناپاکه کړى اؤ زما د مُقدس نُوم سپکاوے وکړى، نو زۀ به ترې نه مخ واړوم اؤ هغه به نور زما د خلقو نه نۀ شى ګڼلے.

⁴خو کۀ قوم په هغه کس باندې ځان ناجاڼه کړى چې څۀ يې کړى وى اؤ هغه ونۀ وژنى،

⁵نو زۀ به په خپله د هغه کس نه، د هغۀ د ټولې کورنۍ نه اؤ د هغه ټولو نه مخ واړوم چې زما نافرمانى وکړى اؤ د مولک بُت عِبادت وکړى. زۀ به هغوئ نور خپل خلق نه ګڼم.

⁶کۀ څوک د هغه خلقو نصيحت اؤرېدلو له ورځى چې د مړو د رُوحُونو مشورې ورکوى، نو زۀ به د هغۀ نه مخ واړوم اؤ زۀ به هغه نور د خپلو خلقو نه نۀ ګڼم.

⁷خپل ځانُونه وقف کړئ اؤ مُقدس اوسئ، ځکه چې زۀ مالِک خُدائ ستاسو خُدائ پاک يم.

⁸زما قانُون ومنئ، ځکه چې زۀ مالِک خُدائ يم اؤ تاسو مُقدس کوم.“

⁹مالِک خُدائ دا اصُول وښودل. کۀ څوک خپل مور يا پلار ته ښېرې وکړى نو هغه به وژلے شى، اؤ خُون به يې په خپله غاړه وى.

¹⁰کۀ يو سړے د بل سړى د ښځې سره زنا وکړى نو دوئ دواړه به وژلے شى.

¹¹کۀ يو سړے د پلار د ښځې سره څملى اؤ د پلار سپکاوے وکړى، نو هغه سړے اؤ ښځه دواړه به وژلے شى. د هغوئ خُون په خپله غاړه دے.

¹²کۀ يو سړے د خپلې اېنږور سره څملى، نو هغوئ دواړه دې ووژلے شى. هغوئ ډېر غلط کار کړے دے اؤ خُون يې په خپله غاړه دے.

¹³کۀ يو سړے د بل سړى سره جنسى تعلُقات وساتى، هغوئ يو شرمناک کار کړے دے اؤ دواړه به ووژلے شى. د هغوئ خُون په خپله غاړه دے.

¹⁴کۀ يو سړے يوه ښځه اؤ د هغې مور وادۀ کړى، نو هغوئ درې واړه به په اور کښې سوزولے شى ځکه چې هغوئ ډېر بد عمل کړے دے، ستاسو په مېنځ کښې به د داسې کار اِجازت نۀ وى.

¹⁵کۀ يو سړے د ځناور سره زنا وکړى، نو هغه سړے اؤ ځناور به وژلے شى.

¹⁶کۀ يوه ښځه د ځناور سره د غلط کار کولو کوشش وکړى، نو هغه اؤ ځناور به ووژلے شى. د هغوئ خُون په خپله غاړه دے.

¹⁷کۀ يو سړے د خپلې سکه يا ناسکه خور سره وادۀ وکړى اؤ هغوئ د يو بل سپکاوے وکړى، نو دا يو د بې‌شرمۍ کار دے اؤ هغوئ دې د خپلو خلقو نه وشړلے شى، هغۀ د خپلې خور سپکاوے کړے دے اؤ هغوئ ته دې د خپلو بدو سزا مِلاؤ شى.

¹⁸کۀ يو سړے د يوې ښځې سره د هغې د مياشتنۍ بيمارۍ په دوران کښې څملى، نو هغوئ دواړه به د قوم نه شړلے شى، ځکه چې هغوئ د پاکوالى په باره کښې اصُول مات کړى دى.

¹⁹کۀ يو سړے د خپلې مور خور سره يا د پلار خور سره څملى، نو هغوئ ته دې خامخا د خپلو بدو سزا مِلاؤ شى.

²⁰کۀ يو سړے د خپلې ترۀ ښځې سره څملى، نو هغۀ د خپل ترۀ سپکاوے کوى، نو ذِمه وارى به د هغوئ په خپله غاړه وى، اؤ د هغوئ بچى به نۀ پېدا کېږى.

²¹کۀ يو سړے خپله ورنداره وادۀ کړى اؤ ورور يې ژوندے وى، نو هغوئ به بې اولاده مړۀ شى. هغۀ يو ناپاکه کار کړے دے اؤ هغۀ د خپل ورور سپکاوے کړے دے.

²²مالِک خُدائ ووئيل، ”زما ټول قانُون اؤ حُکمونه ومنئ، نو داسې د کنعان وطن نه به ونۀ شړلے شئ کُوم وطن له چې زۀ تاسو راولم.

²³د هغه خلقو په رِواجُونو پسې مۀ ځئ کُوم چې هلته اوسېږى، هغه غېرقومُونه به ترې نه وباسم نو تاسو به هغه وطن ته ورننوځئ. زۀ د هغوئ د ټولو بدو عملُونو په وجه د هغوئ نه کرکه کوم.

²⁴خو ما ستاسو سره وعده کړې ده چې هغه وطن ستاسو خپل شى چې زرخېز اؤ آباد وى اؤ هغه به زۀ تاسو له درکړم. زۀ مالِک خُدائ ستاسو خُدائ پاک يم اؤ ما تاسو د نورو قومُونو نه جُدا کړى يئ.

²⁵نو تاسو خامخا د حلالو اؤ حرامو ځناورو اؤ مارغانو په مېنځ کښې فرق وکړئ. حرام ځناور اؤ حرام مارغان مۀ خورئ. ما ورته ناپاک وئيلى دى اؤ چې تاسو دا وخورئ نو ناپاک به شئ.

²⁶تاسو به مُقدس شئ اؤ صِرف زما به شئ، ځکه چې زۀ مالِک خُدائ يم اؤ زۀ مُقدس يم. ما تاسو د نورو قومُونو نه جُدا کړى يئ تاسو صِرف زما اوسئ.

²⁷هر يو سړے يا ښځه چې د مړو يا د پېريانو مشورې ورکوى هغه دې سنګسار کړے شى چې مړۀ شى، څوک چې دا کار کوى نو هغه به د خپل خُون ذِمه وار وى.“