Read Pashto Bible (Yusufzai) — د پښتو مقدس کتاب لاويان 22 Bible Online

لاويان 22 - Pashto Bible (Yusufzai) — د پښتو مقدس کتاب bible

لاويان 22

¹بيا مالِک خُدائ مُوسىٰ ته ووئيل چې

²هارُون اؤ د هغۀ زامنو ته ووايه، ”تاسو زما د مُقدس نُوم سپکاوے مۀ کوئ اؤ د مُقدسو نذرانو اِحترام کوئ کُومې چې بنى اِسرائيل ما ته وقف کوى. زۀ مالِک خُدائ يم.

³هغوئ ته ووايه چې کله ستاسو د اولاد يو کس ناپاک وى اؤ مُقدسو نذرانو ته نزدې راځى کُومې چې بنى اِسرائيلو ما ته وقف کړې وى، هغه دې بيا هيڅ کله په قُربان‌ګاه کښې خِدمت ونۀ کړى. په راتلُونکى ټولو وختُونو کښې به په دې عمل کوئ. زۀ مالِک خُدائ يم.

⁴د هارُون د اولاد يو کس هم دا مُقدسې نذرانې نۀ شى خوړلے چې په هغۀ د جُذام بيمارى وى يا د هغۀ د بدن نه څۀ وځى چې تر څو پورې هغه پاک شوے نۀ وى. هر هغه اِمام ناپاک دے چې هغه داسې څۀ څيز له لاس وروړى چې هغه د يو مړى سره د لګېدو په وجه ناپاک وى يا د هغۀ د ذکر نه اوبۀ وځى

⁵يا کۀ هغه يو ناپاک ځناور يا ناپاک کس له لاس وروړى.

⁶هر يو اِمام چې ناپاک شى نو هغه به تر ماښامه پورې ناپاک وى، خو بيا به هم هغه مُقدسې نذرانې نۀ شى خوړلے چې تر څو پورې يې غُسل نۀ وى کړے.

⁷چې کله نمر پرېوزى نو هغه پاک دے اؤ بيا هغه مُقدسې نذرانې خوړلے شى، کُومې چې د هغۀ خوراک دے.

⁸هغه به د داسې ځناور غوښه نۀ خورى چې په خپل مرګ مړ وى يا ځنګلى ځناورو وژلے وى، په دې به هغه ناپاک شى. زۀ مالِک خُدائ يم.

⁹ټول اِمامان به هغه اصُول منى کُوم چې ما ښودلى دى. ګنى، هغوئ به ګُناهګار شى اؤ مړۀ به شى، ځکه چې هغوئ مُقدسو اصُولو ته سپک کتلى دى. زۀ مالِک خُدائ يم اؤ زۀ هغوئ مُقدس کوم.

¹⁰صِرف د اِمامانو د کورنۍ کس دا نذرانې خوړلے شى، بل څوک يې نۀ شى خوړلے کۀ هغه د اِمام کره مېلمه وى يا يې مزدُور وى.

¹¹خو د اِمام غُلامان، چې هغه يې په پېسو اخستى وى يا يې په خپل کور کښې پېدا شوى وى، نو هغوئ هغه خوراک خوړلے شى کُوم چې اِمام ته ملاوېږى.

¹²کۀ د اِمام لُور د يو داسې سړى سره وادۀ وکړى چې هغه اِمام نۀ وى نو هغه ښځه به دا مُقدسې نذرانې نۀ شى خوړلے.

¹³خو کۀ د هغۀ لُور کونډه يا طلاقه شوې وى چې د هغې بچى نۀ وى اؤ هغه بېرته راغلې وى اؤ د پلار په کور کښې اوسېږى نو هغه دا خوراک خوړلے شى چې کُوم يې پلار ته د اِمام په توګه مِلاؤ شوے وى. صِرف د اِمامانو د کورنۍ کس دا خوراک خوړلے شى.

¹⁴کۀ يو کس د اِمامانو د کورنۍ نه نۀ وى اؤ د مُقدسې نذرانې نه څۀ په غلطۍ سره وخورى، نو هغه به خامخا اِمام ته د دې پُوره قيمت اؤ شل فى‌صده تاوان هم ورکوى.

¹⁵اِمامان به د دې نذرانو سپکاوے نۀ کوى

¹⁶چا ته چې د مُقدسو نذرانو د خوړلو اِجازت نۀ وى نو هغه خلق به ورته نۀ شى پرېښودلے، کۀ داسې وشى نو د دې په وجه به هغه کس ګُناهګار شى اؤ سزا به ورته مِلاؤ شى. زۀ مالِک خُدائ يم اؤ زۀ نذرانې مُقدسې کوم.“

¹⁷بيا مالِک خُدائ مُوسىٰ ته ووئيل چې،

¹⁸”هارُون اؤ د هغۀ زامنو ته اؤ ټولو بنى اِسرائيلو ته دا اصُول وښايه. کله چې يو بنى اِسرائيلے يا په بنى اِسرائيلو کښې اوسېدُونکے مُسافر يوه سوزېدُونکې نذرانه پېش کوى، کۀ هغه يوه منخته يا رضاکارانه نذرانه وى، نو په هغه ځناور کښې دې هيڅ عېب نۀ وى.

¹⁹دا ځناور به خامخا نر وى، ګډ يا چېلے چې هيڅ عېب په کښې نۀ وى د دې د پاره چې دا نذرانه ستاسو نه قبُوله شى.

²⁰کۀ تاسو يو داسې ځناور پېش کوئ چې څۀ عېب په کښې وى، نو مالِک خُدائ به دا نۀ قبلوى.

²¹کله چې څوک مالِک خُدائ ته د سلامتۍ نذرانه پېش کوى، کۀ هغه يوه منخته يا رضاکارانه نذرانه وى، نو په هغه ځناور کښې به څۀ عېب نۀ وى دا د دې د پاره چې قبُوله شى.

²²مالِک خُدائ ته داسې ځناور مۀ پېش کوئ چې ړُوند، ګوډ، يا ناسُور شوے زخم په کښې وى، يا يې په څرمن کښې پمنوالے يا خارښت وى. داسې ځناور په قُربان‌ګاه باندې په اور تيارېدُونکې نذرانې په توګه مۀ پېش کوئ.

²³د رضاکارانه نذرانې په توګه تاسو داسې ځناور پېش کولے شئ چې هغه لنډ وى يا کۀ هغه صحيح شکل نۀ لرى، خو دا به په منخته کښې قبلېدُونکے نۀ وى.

²⁴مالِک خُدائ ته داسې ځناور مۀ پېش کوئ چې په ټکولو، پرې کولو، زخمى کولو يا ويستلو په وجه خصى شوے وى. ستاسو په وطن کښې به د دې قِسم نذرانو اِجازت نۀ وى.

²⁵په اور تيارېدُونکې نذرانې په توګه داسې ځناور مۀ پېش کوئ چې د يو پردى سړى نه اخستے شوے وى. داسې ځناور عېبژن ګڼلے شى اؤ قبلېدُونکى نۀ وى.

²⁶کله چې يو څخے، ګډُورے يا د چېلۍ بچے پېدا شى، نو دا به اووۀ ورځې د مور نه نۀ شى لرې کولے، خو د هغې نه پس دا به په اور تيارېدُونکې نذرانې په توګه قبلېدُونکے وى.

²⁸يوه غوا اؤ د هغې څخے يا ګډه اؤ د هغې ګډُورے يا يوه چېلۍ اؤ د هغې بچے په يوه ورځ مۀ حلالوئ.

²⁹کله چې تاسو مالِک خُدائ ته د شُکرانې قُربانى پېش کوئ، نو په هغه اصُولو عمل کوئ نو داسې به تاسو قبُول شئ،

³⁰هم په هغه ورځ باندې دا وخورئ اؤ د دې هيڅ هم بلې ورځې ته مۀ پرېږدئ.“

³¹مالِک خُدائ ووئيل، ”زما حُکمونه منئ، زۀ مالِک خُدائ يم.

³²زما د مُقدس نُوم سپکاوے مۀ کوئ، ټول بنى اِسرائيل دې دا اِقرار وکړى چې زۀ مُقدس يم. زۀ مالِک خُدائ يم اؤ زۀ تاسو مُقدس کوم،

³³اؤ ما تاسو د مِصر وطن نه راوويستلئ چې ستاسو خُدائ پاک شم. زۀ مالِک خُدائ يم.“