Read Pashto Bible (Yusufzai) — د پښتو مقدس کتاب لاويان 24 Bible Online

لاويان 24 - Pashto Bible (Yusufzai) — د پښتو مقدس کتاب bible

لاويان 24

¹بيا مالِک خُدائ مُوسىٰ ته ووئيل چې،

²”بنى اِسرائيلو له حُکم ورکړه چې د ډيوو د پاره ډېر ښۀ سُوچه د زيتُونو تېل راوړى کُومې چې په مُقدسه خېمه کښې دى، نو چې هر وخت رڼا وى.

³هارُون به هر ماښام دا ډيوې بلوى اؤ تر سحره پورې به يې بلې ساتى، چې د مالِک خُدائ په حضُور کښې د پړدې نه بهر د تړون صندُوق ته مخامخ دى، دا ډيوټ په زيات مُقدس ځائ کښې دے. دا اصُول دې په راتلُونکى ټولو وختُونو کښې منلے شى.

⁴هارُون به د هغه ډيوو خيال ساتى کُومې چې د سُوچه سرو زرو په ډيوټ باندې دى اؤ دې ته به پام کوى چې دا د مالِک خُدائ په حضُور کښې هر وخت بلېږى.

⁵دولس کيلو ښۀ اوړۀ واخله اؤ دولس ډوډۍ ترې نه پخې کړه.

⁶په دوه ډېرو کښې يې په هغه مېز باندې کېږده چې د سُوچه سرو زرو پترى ورباندې خېژولے شوے دے، کُوم چې د مالِک خُدائ په حضُور کښې دے اؤ چې په هر ډيرى کښې شپږ شپږ ډوډۍ وى.

⁷په هر ډيرى باندې څۀ سُوچه لوبان واچوه، دا به مالِک خُدائ ته په اور تيارېدُونکې نذرانې د يوې نښې په شان وى چې د ډوډۍ په ځائ پېش کېږى.

⁸د هر سبت په ورځ په راتلُونکى ټولو وختُونو کښې، ډوډۍ دې خامخا د مالِک خُدائ په حضُور کښې کېښودلے شى. د بنى اِسرائيلو همېشه د پاره دا تړون دے.

⁹دا ډوډۍ د هارُون اؤ د هغۀ د اولاد ده اؤ هغوئ به دا په مُقدس ځائ کښې خورى، ځکه چې دا د اِمامانو د پاره مالِک خُدائ ته په اور تيارېدُونکې نذرانې يوه ډېره مُقدسه برخه ده.“

¹⁰يو سړے وو چې د هغۀ پلار مِصرے اؤ مور يې بنى اِسرائيلۍ وه چې د هغې نُوم سلوميت وو اؤ د دان د قبيلې د دِبرى لُور وه. دې سړى په خېمو کښې د يو بنى اِسرائيلى سره جګړه وکړه. هغۀ په کنځلو کښې د خُدائ پاک د نُوم بې عِزتى وکړه، نو هغوئ هغه مُوسىٰ له بوتلو،

¹²هغه يې قېد کړو اؤ مالِک خُدائ ته يې اِنتظار کولو چې هغوئ ته وښائى چې د هغۀ سره څۀ وکړى.

¹³مالِک خُدائ مُوسىٰ ته ووئيل چې،

¹⁴”دا سړے د خېمو نه بهر بوځئ. هر چا چې د هغۀ کنځل اؤرېدلى وى نو هغه به خپل لاس د هغه سړى په سر د ګواهۍ ورکولو د پاره کېږدى اؤ بيا به ټول قوم هغه سنګسار کړى.

¹⁵بيا بنى اِسرائيلو ته ووايه چې هر څوک هم خُدائ پاک ته کنځل وکړى نو هغۀ ته به خامخا د خپلو بدو سزا مِلاؤ شى

¹⁶اؤ وبه وژلے شى. هر يو بنى اِسرائيلے يا د پردى وطن کس چې ستاسو سره اوسېږى چې هغه مالِک خُدائ ته کنځل وکړى نو ټول قوم به هغه ووژنى.

¹⁷هر څوک چې قتل وکړى نو هغه به وژلے شى،

¹⁸اؤ هر څوک چې د بل چا يو ځناور ووژنى نو تاوان به يې خامخا ورکوى. دا اصُول د ژوند په بدل کښې د ژوند والا دى.

¹⁹کۀ څوک يو بل کس زخمى کړى، هغۀ چې څۀ هم کړى وى نو هم هغه شان عمل به ورسره کېږى.

²⁰کۀ هغه يو هډُوکے مات کړى، نو د هغۀ يو هډُوکے به ماتولے شى، کۀ هغه يوه سترګه وباسى نو د هغۀ يوه سترګه به ويستلے شى، کۀ هغه يو غاښ مات کړى، نو د هغۀ يو غاښ به ماتولے شى. هغه چې څنګه هم بل کس زخمى کړى نو په بدل کښې به د هغۀ سره هم هغه عمل کېږى.

²¹هر څوک چې يو ځناور ووژنى نو تاوان به يې ورکوى، خو هر څوک چې يو اِنسان ووژنى نو هغه به ووژلے شى.

²²دا قانُون ستاسو د ټولو د پاره دے، کۀ هغه اِسرائيلے وى يا د پردى وطن کس چې ستاسو سره اوسېږى، ځکه چې زۀ مالِک خُدائ ستاسو خُدائ پاک يم.“

²³کله چې مُوسىٰ بنى اِسرائيلو ته دا ووئيل، نو هغوئ هغه سړے د خېمو نه بهر بوتلو چا چې کنځل کړى وُو اؤ سنګسار يې کړو. نو بنى اِسرائيلو هم هغه شان وکړل چې څنګه مالِک خُدائ مُوسىٰ له حُکم ورکړے وو.