Read Pashto Bible (Yusufzai) — د پښتو مقدس کتاب لاويان 25 Bible Online

لاويان 25 - Pashto Bible (Yusufzai) — د پښتو مقدس کتاب bible

لاويان 25

¹بيا مالِک خُدائ د سينا په غرۀ باندې مُوسىٰ ته ووئيل اؤ حُکم يې ورکړو چې،

²”بنى اِسرائيلو ته دا اصُول وښايه. کله چې تاسو هغه وطن ته ورننوځئ چې مالِک خُدائ يې تاسو له درکوى، د مالِک خُدائ د درناوى د پاره په هر اوؤم کال تاسو هغه زمکه مۀ کَرئ.

³شپږ کاله به تاسو خپل پټى وکَرئ، په باغُونو کښې به د انګُورو څانګې پرې کړئ اؤ فصلُونه به راغونډ کړئ.

⁴خو په اوؤم کال دې زمکه شاړه پاتې شى. دا به مالِک خُدائ ته وقف شوے کال وى. خپل پټى مۀ کَرئ اؤ په خپلو باغُونو کښې د انګُورو څانګې مۀ پرې کوئ.

⁵هغه فصل مۀ رېبئ چې د کَرلو نه بغېر په خپله راشين کېږى اؤ د خپلو باغُونو نه هغه انګُور مۀ راټولوئ چې څانګې يې کهنچې شوى نۀ وى، دا هغه کال دے چې زمکه به په کښې پُوره آرام کوى.

⁶کۀ په هغه کال کښې زمکه کَرلے شوے هم نۀ وى، خو د هغې نه به ستاسو د پاره، ستاسو غُلامانو، مزدُورانو اؤ د مُسافرو د پاره چې ستاسو سره اوسېږى، خوراک مِلاؤ شى،

⁷داسې ستاسو څاروو د پاره اؤ ستاسو په پټو کښې د ځنګلى ځناورو د پاره هم. زمکه چې هر څۀ راشنۀ کړى نو هغه خوړلے شى.

⁸اووۀ ځلې اووۀ کالونه وشمېرئ چې يو کم پنځوس کاله جوړېږى.

⁹نو د اوومې مياشتې په لسمه ورځ يعنې د کفارې په ورځ به په ټول وطن کښې بيګل وغږولے شى.

¹⁰نو تاسو پنځوسم کال خاص وګڼئ اؤ د وطن ټولو خلقو ته د آزادۍ اِعلان وکړئ. په دې کال هغه هر څۀ هم چې خرڅ شوى وى نو هغه به اصلى مالِک يا د هغۀ اولاد ته واپس ملاوېږى اؤ هر څوک چې د غُلام په توګه خرڅ شوے وى نو هغه به خپلې کورنۍ ته واپس شى.

¹¹تاسو به خپل پټى نۀ کَرئ نۀ به هغه فصل رېبئ چې په خپله راشين شوے وى اؤ نۀ به په باغُونو کښې هغه انګُور راټولوئ چې څانګې يې پرې کړے شوې نۀ وى.

¹²هغه ټول کال به ستاسو د پاره مُقدس وى، تاسو به صِرف هغه څۀ خورئ چې پټو په خپله راشنۀ کړى وى.

¹³په دې کال هغه هر څۀ چې خرڅ شوى وى نو هغه به واپس خپل اصلى مالِک ته مِلاؤ شى.

¹⁴کله چې تاسو په خپل بنى اِسرائيلى باندې زمکه خرڅوئ يا يې ترې نه اخلئ، نو يو بل له دهوکه مۀ ورکوئ.

¹⁵قيمت به يې د کالونو د شمېر په مُطابق مُقررولے شى چې په هغه زمکه کښې د واپس ورکولو کال نه مخکښې څومره فصل کېږى.

¹⁶کۀ چرې پاتې شوى کالونه ډېر وى، نو قيمت به يې اُوچت وى، خو کۀ صِرف يو څو کالونه پاتې وى، نو قيمت به يې کم وى، ځکه چې څۀ هم خرڅېږى نو هغه د فصلُونو د هغه شمېر په مُطابق به وى چې په هغه زمکه کښې پېدا کېږى.

¹⁷خپل بنى اِسرائيليان مۀ دهوکه کوئ، خو د مالِک خُدائ ستاسو د خُدائ پاک نه ويرېږئ. ځکه چې زۀ مالِک خُدائ ستاسو خُدائ پاک يم.

¹⁸د مالِک خُدائ ټول قانُون اؤ حُکمونه منئ، نو تاسو به هغه وطن کښې په آمن سره اوسېږئ.

¹⁹هغه زمکه به فصلُونه پېدا کوى اؤ د خوراک هغه هر څۀ به درته ملاوېږى چې تاسو يې غواړئ اؤ په آمن کښې به ژوند کوئ.

²⁰خو کېدے شى چې ستاسو نه يو کس تپوس وکړى چې پټى ونۀ کَرلے شى اؤ فصلُونه راغونډ نۀ شى نو په اوؤم کال به څۀ خورو.

²¹مالِک خُدائ به په شپږم کال هغه زمکې له برکت ورکړى نو هغه زمکه به د دوه کالونو د پاره ښۀ ډېر خوراک پېدا کړى.

²²کله چې تاسو په اتم کال خپل پټى کَرئ، نو چې په شپږم کال تاسو څۀ رېبلى وى هغه به تر اوسه پورې خورئ اؤ په نهم کال به هم تاسو هغه څۀ خورئ کُوم چې تاسو په اتم کال کَرئ اؤ رېبئ.

²³تاسو خپله زمکه د همېشه د پاره مۀ خرڅوئ، ځکه چې زمکه ستاسو نۀ ده، د خُدائ پاک ده اؤ تاسو د مُسافرو په شان يئ چا ته چې دا اِجازت وى چې صِرف ګټه ترې نه واخلى.

²⁴کله چې زمکه خرڅېږى، نو د دې د اصلى مالِک د واپس اخستلو حق به خامخا منلے شى.

²⁵کۀ يو بنى اِسرائيلے غريب شى اؤ زمکې خرڅولو ته مجبُور شى، نو د هغۀ د ټولو نه نزدې خپلوان به زمکه واپس اخلى.

²⁶کۀ د چا خپلوان نۀ وى چې دا واپس واخلى نو کېدے شى وروستو مالدار شى اؤ ډېرې پېسې ولرى چې دا واپس واخلى.

²⁷نو په داسې حال کښې به خامخا هغه سړى له قيمت ورکوى چا چې اخستے وى، دا قيمت به د واپس ورکولو کال پورې د پاتې کالونو د پاره وى، تر هغې پورې چې هغۀ ته خپله زمکه واپس شى.

²⁸خو کۀ د هغۀ سره ډېرې پېسې نۀ وى چې زمکه واپس واخلى نو دا به د واپس اخستلو نه ورستوکال پورې د هغه سړى په قبضه کښې وى. په هغه کال دې دا خپل اصلى مالِک ته واپس شى.

²⁹کۀ څوک په يو دېوال لرُونکى ښار کښې کور خرڅ کړى، نو هغه د دې د خرڅېدو د تاريخ نه واخله په هغه وړومبى ټول کال د واپس اخستلو حق لرى.

³⁰خو کۀ هغه يې په يو کال کښې واپس وانۀ خلى نو د واپس اخستلو حق د هغۀ د لاس نه لاړ شى اؤ هغه کور به د اخستُونکى اؤ د هغۀ د اولاد د همېشه د پاره وى، دا به د واپس اخستلو په کال نۀ واپس کېږى.

³¹خو چې کُوم کورُونه په بې‌دېواله کلو کښې دى نو په هغو باندې به د پټو په شان کار کېږى، د دې اصلى مالِک دا حق لرى چې دا واپس واخلى اؤ دا به د واپس اخستلو په کال کښې واپس کولے شى.

³²خو، ليويان هر وخت دا حق لرى چې په ښارُونو کښې خپل هغه جائيداد واپس واخلى چې هغوئ ته حواله شوے وى.

³³کۀ چرې يو ليوے په ښارُونو کښې يو کور خرڅ کړى اؤ واپس وانۀ خستلے شى، نو د واپس اخستلو په کال کښې به دا خامخا واپس اخستلے شى، ځکه چې د ليويانو په خپلو ښارُونو کښې چې کُوم کورُونه دى دا د بنى اِسرائيلو په مېنځ کښې د هغوئ د همېشه د پاره جائيداد دے.

³⁴خو د ليويانو د ښارُونو نه ګېر‌چاپېره مېدان به هيڅ کله نۀ خرڅېږى، دا د همېشه د پاره د هغوئ دے.

³⁵کۀ ستاسو سره يو نزدې اوسېدُونکے بنى اِسرائيلے دومره غريب شې چې خپل ځان نۀ شى ساتلے، نو تاسو خامخا د هغۀ مدد کوئ لکه څنګه چې تاسو د پردى وطن کس سره مدد کوئ، نو چې هغه ستاسو سره نزدې پاتې شى.

³⁶د هغوئ نه هيڅ سُود مۀ اخلئ، د خُدائ پاک نه ويرېږئ اؤ خپل بنى اِسرائيلے هم هغه شان ستاسو سره نزدې اوسېدو ته پرېږدئ.

³⁷تاسو چې کُومې پېسې هغوئ له په قرض ورکړئ نو د هغې سُود ترې نه مۀ اخلئ اؤ چې کُوم خوراک ورباندې خرڅ کړئ د هغې ګټه ترې نه مۀ اخلئ.

³⁸دا د مالِک خُدائ ستاسو د خُدائ پاک حُکم دے، چا چې تاسو د مِصر د وطن نه راوويستلئ چې د کنعان زمکه تاسو له درکړى اؤ چې د ستاسو خُدائ پاک وى.

³⁹کۀ ستاسو سره يو نزدې اوسېدُونکے بنى اِسرائيلے دومره غريب شى چې هغه خپل ځان په تاسو باندې د يو غُلام په توګه خرڅ کړى، نو د هغۀ نه به د يو غُلام کار نۀ اخلئ.

⁴⁰هغه به ستاسو سره د يو مزدُور په شان وى اؤ د بل واپس ورکولو تر کال پورې به ستاسو خِدمت کوى.

⁴¹په هغه وخت به هغه اؤ د هغۀ بچى ستاسو نه لاړ شى اؤ خپلې کورنۍ اؤ د خپل پلار نيکۀ جائيداد ته به راستُون شى.

⁴²بنى اِسرائيل د مالِک خُدائ غُلامان دى اؤ هغوئ يې د مِصر وطن نه راوويستل، هغوئ دې د غُلامانو په توګه نۀ خرڅېږى.

⁴³د هغوئ سره ظلم مۀ کوئ اؤ د خُدائ پاک نه ويرېږئ.

⁴⁴کۀ تاسو ته د غُلامانو ضرُورت وى، نو د خوا‌ؤشا قومُونو نه غُلامان اخستلے شئ.

⁴⁵تاسو د هغه مُسافرو اولاد هم اخستلے شئ کُوم چې ستاسو سره اوسېږى. کُوم چې ستاسو په وطن کښې پېدا شوى وى نو هغه به ستاسو ميراث شى،

⁴⁶اؤ هغوئ خپلو بچو ته د ميراث په توګه پرېښودلے شئ، تر څو چې هغوئ ژوندى وى نو ستاسو د بچو خِدمت به کوى. خو چې تاسو د خپل بنى اِسرائيلى سره ظلم ونۀ کړئ.

⁴⁷فرض کړئ يو مُسافر چې ستاسو سره اوسېږى اؤ هغه مالدار شى، خو ستاسو بنى اِسرائيلے غريب شى اؤ خپل ځان په هغه مُسافر يا د هغۀ د کورنۍ په يو کس باندې خرڅ کړى.

⁴⁸د هغۀ د خرڅېدو نه پس، هغه بيا هم دا حق لرى چې واپس واخستلے شى. د هغۀ يو ورور

⁴⁹يا د هغۀ ترۀ، د ترۀ زوئ يا د هغۀ بل يو نزدې خپلوان هغه واپس اخستلے شى. يا کۀ هغه په خپله مالداره شى، نو هغه خپله آزادى په خپله اخستلے شى.

⁵⁰چا چې هغه اخستے وى د هغۀ سره به خامخا مشوره کوى اؤ هغوئ به د خرڅېدو د وخت نه واخله د واپس اخستلو نه وروستو کال پورې کالونه وشمېرى اؤ چې کُومې پېسې يو مزدُور ته ورکولے کېږى د هغه په بُنياد به د هغۀ د خلاصېدو قيمت مُقرر شى.

⁵¹د پاتى شوو کالونو د شمېر په مُطابق به هغه خامخا د خرڅېدو د قيمت يوه حِصه ورکوى،

⁵²

⁵³لکه چې هغه د کال په بُنياد باندې مزدُور کړے شوے وو. د هغۀ مالِک به د هغۀ سره ظلم نۀ کوى.

⁵⁴کۀ هغه په داسې څۀ طريقه آزاد نۀ کړے شى، نو هغه اؤ د هغۀ بچى به په واپس ورکولو پسې کال باندې خامخا آزاد وى.

⁵⁵يو بنى اِسرائيلے به همېشه د پاره غُلام نۀ وى، ځکه چې بنى اِسرائيل د مالِک خُدائ غُلامان دى. هغۀ هغوئ د مِصر وطن نه راوويستل، هغه مالِک خُدائ د هغوئ خُدائ پاک دے.“