Read Pashto Bible (Yusufzai) — د پښتو مقدس کتاب لاويان 27 Bible Online

لاويان 27 - Pashto Bible (Yusufzai) — د پښتو مقدس کتاب bible

لاويان 27

¹بيا مالِک خُدائ مُوسىٰ ته ووئيل چې،

²”بنى اِسرائيلو ته دا اصُول وښايه. کله چې د يو خاص منختې په پُوره کېدو کښې يو کس مالِک خُدائ ته وقف کېږى، نو هغه به د دې قيمت په ورکولو سره آزاد کړے شى،

³کُوم چې د منلے شوى معيار په مُطابق وى : بالِغ نارينه چې عُمر يې د شلو کالو نه تر شپيتو کالو پورې وى : پنځوس د سپينو زرو سيکې. بالِغه ښځه : دېرش د سپينو زرو سيکې. نارينه ځوان، چې عُمر يې د پينځو نه واخله شلو کالو پورې وى : شل د سپينو زرو سيکې. ځوانه ښځه : لس د سپينو زرو سيکې. ماشُوم چې عُمر يې د پينځو کالو نه کم وى : پينځۀ د سپينو زرو سيکې. ماشُومه : درې د سپينو زرو سيکې. هغه نارينه چې عُمر يې د شپېتو کالو نه زيات وى : پينځلس د سپينو زرو سيکې. هغه ښځه چې عُمر يې د شپېتو کالو نه زيات وى : لس د سپينو زرو سيکې.

⁸کۀ يو کس منخته منلې وى اؤ ډېر غريب وى چې هغه معيارى قيمت نۀ شى ورکولے، نو هغه کس دې اِمام ته راولى اؤ اِمام به کم قيمت مُقرر کړى، چې د هغه کس د وس مُطابق وى.

⁹کۀ هغه منخته يو ځناور وى چې مالِک خُدائ ته د يوې نذرانې په توګه د قبلېدو قابِل وى، نو داسې تُحفه چې مالِک خُدائ ته پېش کېږى هغه مُقدسه ده،

¹⁰اؤ کۀ يو کس منخته ومنى نو هغه ځناور په بل ځناور نۀ شى بدلېدلے. کۀ چرې هغه بدل کړى، نو داوړه ځناور به د مالِک خُدائ وى.

¹¹خو کۀ هغه ځناور حرام وى، کُوم چې مالِک خُدائ ته د نذرانې په توګه د قبلېدو قابِل نۀ وى، نو هغه کس به هغه ځناور اِمام ته بوځى.

¹²اِمام به د دې ښۀ‌والى اؤ بد‌والى په مُطابق قيمت مُقرر کړى اؤ دا به آخرى قيمت وى.

¹³کۀ هغه کس دا واپس اخستل غواړى، نو هغه به د دې قيمت سره شل فى‌صده زيات ورکړى.

¹⁴کله چې يو کس خپل کور مالِک خُدائ ته وقف کوى، نو اِمام به د دې د ښۀ‌والى يا بد‌والى په مُطابق د دې قيمت مُقرر کړى اؤ دا به آخرى قيمت وى.

¹⁵کۀ هغه کس چا چې دا کور وقف کړے وى اؤ دا واپس اخستل غواړى، نو هغه به خامخا د دې قيمت سره شل فى‌صده زيات ورکړى.

¹⁶کۀ څوک د خپلې زمکې څۀ حِصه مالِک خُدائ ته وقف کوى، نو د دې قيمت به د هغه تُخم په مُطابق مُقررولے شى چې څومره په کښې کَرل په کار وى، دا قيمت به د سپينو زرو لس سيکې د شلو کيلو اوربشو د پاره وى.

¹⁷کۀ هغه کس دا زمکه د واپس اخستلو کال باندې وقف کړى، نو د دې زمکې قيمت به پُوره ورکولے شى.

¹⁸خو کۀ چرې هغه کس خپله زمکه د دې نه وروستو وقف کړى، اِمام به د هغې بيعه د هغو کلونو د شمېر په مطابق حساب کړى چې د واپس اخستلو تر راتلُونکى کال پورې پاتې وى او د کالونو د کمى په وجه به کمه بيعه مقرر کړى.

¹⁹چا چې دا زمکه وقف کړې وى کۀ هغه کس دا واپس اخستل وغواړى، نو هغه به خامخا د دې قيمت سره شل فى‌صده زيات ورکوى.

²⁰کۀ هغه کس دا زمکه د مالِک خُدائ نه واپس اخستلو نه مخکښې په بل چا باندې خرڅه کړى، نو د هغۀ حق نۀ جوړېږى چې دا واپس واخلى.

²¹د واپس اخستلو پسې کال به هغه پټے د همېشه د پاره د مالِک خُدائ شى، دا به د اِمامانو وى.

²²کۀ څوک مالِک خُدائ ته يو پټے وقف کوى چې هغۀ اخستے وى،

²³اِمام به د واپس اخستلو پسې کال پورې د کالونو د شمېر په مُطابق د دې د قيمت اندازه ولګوى اؤ هغه کس به خامخا هم په هغه ورځ د دې قيمت ورکړى، دا پېسې به د مالِک خُدائ شى.

²⁴د واپس اخستلو په کال به دا پټې واپس د دې اصلى مالِک يا د هغۀ اولاد ته ملاوېږى.

²⁵ټول قيمتُونه به د منلے شوى معيار په مُطابق مُقررولے شى.

²⁶په ځناور کښې د ټولو نه وړومبى پېدا شوى بچى د مالِک خُدائ وى، نو هيڅ څوک دا هغۀ ته د يوې رضاکارانه نذرانې په توګه نۀ شى پېش کولے. يو څخے، ګډُورے يا يو د چېلۍ بچے دا د مالِک خُدائ وى،

²⁷خو وړومبے پېدا شوے يو حرام ځناور د معيارى قيمت سره شل فى‌صده زيات ورکولو باندې واپس اخستلے شى. کۀ دا واپس وانۀ خستلے شى، نو دا دې په چا باندې په معيارى قيمت خرڅ کړے شى.

²⁸کُوم څيز چې مالِک خُدائ ته بغېر د څۀ شرط نه وقف شوے وى، نو هيڅ څوک به دا نۀ خرڅولے شى اؤ نۀ به يې واپس اخستلے شى، کۀ هغه بنيادم، ځناور، يا زمکه وى، دا به د همېشه د پاره د مالِک خُدائ وى.

²⁹کۀ په چا باندې د مرګ فېصله شوې وى نو هغه به خامخا وژلے شى اؤ واپس به نۀ شى اخستلے.

³⁰د زمکې د ټول پېداوار لسمه حِصه د مالِک خُدائ ده، کۀ هغه غله وى يا مېوه وى.

³¹کۀ يو کس دا واپس اخستل غواړى، نو هغه به خامخا د منلے شوى قيمت سره شل فى‌صده زيات ورکوى.

³²هر يو لسم څاروے د مالِک خُدائ دے. کله چې ځناور شمېرلے شى، نو هر يو لسم به د مالِک خُدائ وى.

³³مالِک دې ځناورو له داسې ترتيب نۀ ورکوى چې خراب ځناور ترې خوښ کړے شى اؤ بدلولے را بدلولے يې هم نۀ شى. کۀ هغۀ يو ځناور په بل ځناور بدل کړو، نو بيا به دواړه د مالِک خُدائ وى اؤ واپس به نۀ شى اخستلے.“

³⁴دا هغه حُکمونه دى چې مالِک خُدائ مُوسىٰ له د سينا په غرۀ باندې د بنى اِسرائيلو د پاره ورکړل.