Read Pashto Bible (Yusufzai) — د پښتو مقدس کتاب لاويان 3 Bible Online

لاويان 3 - Pashto Bible (Yusufzai) — د پښتو مقدس کتاب bible

لاويان 3

¹کله چې څوک خپل يو څاروے د سلامتۍ د نذرانې په توګه پېش کوى، نو هغه دې يو داسې غوَيے يا غوا وى چې هيڅ عېب په کښې نۀ وى.

²هغه کس به خپل لاس د هغه ځناور په سر کېږدى اؤ د مالِک خُدائ د حضُور مُقدسې خېمې د دروازې په خُلۀ کښې به يې حلال کړى. د هارُون د کورنۍ اِمامان به هغه وينه د قُربان‌ګاه څلورو واړو طرفُونو ته وشيندى

³اؤ هغه دې د هغه ځناور دا حِصې مالِک خُدائ ته په اور سوزېدُونکې نذرانې په توګه پېش کړى. په دې کښې به په کولمو باندې ټوله وازګه،

⁴پښتورګى اؤ په هغې باندې چې څومره وازګه وى اؤ د اينې ښۀ حِصه هم وى.

⁵اِمامان به دا هر څۀ د سوزېدُونکې نذرانو سره په قُربان‌ګاه باندې وسوزوى. په اور سوزېدُونکې د دې نذرانې بُوئ په مالِک خُدائ باندې ښۀ لګې.

⁶کۀ چرې د رَمې نه د سلامتۍ د نذرانې په توګه څۀ پېش کولے شى، کۀ هغه نر وى يا ښځه، خو چې هيڅ عېب په کښې نۀ وى.

⁷کۀ يو کس يو ګډُورے پېش کوى،

⁸نو هغه دې خپل لاس ورله په سر کېږدى اؤ د خېمې مخې ته دې هغه حلال کړى. اِمامان به د هغۀ وينه د قُربان‌ګاه په څلورو واړو طرفُونو باندې وشيندى

⁹اؤ مالِک خُدائ ته دې د هغه ځناور دا حِصې په اور سوزېدُونکې نذرانې په توګه پېش کړى : د ټول لم وازګه چې د ملا د هډُوکى سره نزدې پرې کړے شوې وى، هغه ټوله وازګه چې په کولمو پرته وى،

¹⁰پښتورګى اؤ هغه وازګه چې ورباندې پرته وى اؤ د اينې ښۀ حِصه هم.

¹¹بيا به اِمام دا هر څۀ په اور سوزېدُونکې نذرانې په توګه مالِک خُدائ ته وسوزوى.

¹²کۀ يو کس چېلۍ پېش کوى،

¹³هغه دې خپل لاس ورله په سر کېږدى اؤ د خېمې مخې ته دې حلال کړى. اِمامان به د دې وينه د قُربان‌ګاه په څلورو واړو طرفُونو باندې وشيندى

¹⁴اؤ مالِک خُدائ ته دې دا حِصې په اور سوزېدُونکې نذرانې په توګه پېش کړى : هغه ټوله وازګه چې په کولمو باندې پرته وى،

¹⁵پښتورګى اؤ هغه وازګه چې ورباندې پرته وى اؤ د اينې ښۀ حِصه هم.

¹⁶اِمام به دا هر څۀ په اور سوزېدُونکې نذرانې په توګه وسوزوى، دا به په مالِک خُدائ باندې يو ښۀ لګېدُونکے بُوئ وى. د قُربانۍ ټوله وازګه د مالِک خُدائ ده.

¹⁷يو بنى اِسرائيلے به هم وازګه اؤ وينه نۀ شى خوړلے، بنى اِسرائيل چې چرته هم اوسېږى نو ټول به دا قانُون د همېشه د پاره منى.