Read Pashto Bible (Yusufzai) — د پښتو مقدس کتاب لاويان 5 Bible Online

لاويان 5 - Pashto Bible (Yusufzai) — د پښتو مقدس کتاب bible

لاويان 5

¹په دې حالاتو کښې د ګُناه نذرانې ضرُورى ګڼلے کېږى : کۀ څوک د ګواهۍ ورکولو د پاره عدالت ته وغوښتلے شى اؤ هغه معلُومات نۀ ورکوى چې څۀ يې ليدلى يا اؤرېدلى وى، نو هغۀ ته دې د خپلو بدو سزا مِلاؤ شى.

²کۀ څوک په غلطۍ سره يو حرام څيز له لاس وروړى، لکه چې يو مړ مُردار ځناور له، نو هغه ناپاک اؤ ګُناهګار دے چې څنګه ورته پته ولګې چې هغۀ دا خطا کړى دى.

³کۀ څوک په غلطۍ سره د يو اِنسان يو ناپاک ځائ يا څيز له لاس وروړى، چې دا څۀ څيز هم وى، نو هغه ناپاکه اؤ ګُناهګار دے چې څنګه ورته پته ولګې چې هغۀ دا خطا کړى دى.

⁴کۀ څوک بغېر د سوچ کولو نه قسم وخورى، چې دا قسم د هر څيز په باره کښې وى کۀ قسم ښۀ وى اؤ يا بد وى، نو هغه ناپاکه اؤ ګُناهګار دے چې څنګه ورته پته ولګې چې هغۀ څۀ کړى دى.

⁵کله چې يو کس ګُناه وکړى، نو هغه دې خامخا د ګُناه اِقرار وکړى،

⁶اؤ د خپلې ګُناه په جُرمانه کښې به هغه خامخا يوه ګډه يا چېلۍ مالِک خُدائ ته د نذرانې په توګه راولى. اِمام به د هغه کس د ګُناه د پاره کفاره ادا کړى.

⁷کۀ هغه کس ګډه يا چېلۍ نۀ شى اخستلے، نو هغه به د خپلې ګُناه د پاره په بدل کښې دوه ګُوګُوشتکې يا دوه کونترې راوړى، يوه به د ګُناه د نذرانې د پاره اؤ يوه به د سوزېدُونکې نذرانې د پاره وى.

⁸هغه به دا اِمام ته راوړى، نو وړومبۍ به مارغۀ د ګُناه د نذرانې د پاره پېش کړى. د دې څټ به تاؤ کړى خو چې سر ترې نه بېل نۀ شى

⁹اؤ څۀ وينه دې د قُربان‌ګاه په يو طرف باندې وشيندى، پاتې شوې وينه دې د قُربان‌ګاه په بېخ کښې وڅڅولے شى. دا د ګُناه د لرې کولو د پاره يوه نذرانه ده.

¹⁰بيا د اصُولو په مُطابق هغه دويم مارغۀ دې د سوزېدُونکې نذرانې په توګه پېش کړى. داسې به اِمام د هغه کس د ګُناه د پاره کفاره ادا کړى کُومه چې هغۀ کړې ده اؤ هغه به معاف شى.

¹¹کۀ هغه کس دوه ګُوګُوشتکې يا دوه کونترې هم نۀ شى راوړلے، نو هغه به يو کيلو اوړۀ د ګُناه د نذرانې په توګه راوړى. هغه دې په دې کښې د زيتُونو تېل يا خوشبوئى نۀ اچوى، ځکه چې دا د ګُناه نذرانه ده.

¹²هغه کس به دا اِمام ته راوړى، اِمام به يو مُوټے ترې نه د نښې په توګه واخلى چې دا ټول مالِک خُدائ ته پېش کړى شوى دى اؤ په اور سوزېدُونکې نذرانې سره به يې په قُربان‌ګاه باندې وسوزوى. دا يوه داسې نذرانه ده چې ګُناه لرې کوى.

¹³داسې اِمام به د هغه کس د ګُناه د پاره کفاره ادا کړى چې په دې مُختلفو ګُناهونو کښې يې کُومه ګُناه هم کړې وى اؤ هغه به معاف شى. پاتې شوى اوړۀ به هم د غلې نذرانې په شان د اِمام وى.

¹⁴مالِک خُدائ مُوسىٰ ته دا اصُول وښودل.

¹⁵کۀ يو کس په غلطۍ سره داسې ګُناه وکړى اؤ د هغه قيمت په ورکولو کښې ناکام شى چې کُوم مالِک خُدائ ته پېش کول وُو، نو هغه به د تاوان د نذرانې په توګه يو داسې ګډ يا چېلے مالِک خُدائ ته راولى چې هيڅ عېب په کښې نۀ وى. د دې قيمت به د منلے شوى معيار په مُطابق مُقررولے شى.

¹⁶هغه به خامخا هغه پېسې ورکوى چې د کُومو په ورکولو کښې ناکام شوے وى اؤ شل فى‌صده زياتې دې هم ورکړى. هغه به دا پېسې اِمام ته ورکړى اؤ اِمام به د هغه کس د ګُناه د نذرانې د پاره ځناور پېش کړى اؤ هغه کس به معاف شى.

¹⁷کۀ څوک يوه داسې ګُناه وکړى چې په غلطۍ سره د مالِک خُدائ د حُکمُونو نه يو حُکم مات کړى، نو هغه ګُناهګار دے اؤ جُرمانه به ورکوى.

¹⁸هغه به خامخا اِمام ته د تاوان د نذرانې په توګه يو ګډ يا چېلے راولى چې هيڅ عېب په کښې نۀ وى. د دې قيمت به د منلے شوى معيار په مُطابق مُقررولے شى. اِمام به د هغۀ د ګُناه د پاره کفاره ادا کړى کُومه چې هغۀ په غلطۍ سره کړې وى اؤ هغه به معاف کړې شى.

¹⁹دا د هغې ګُناه د تاوان نذرانه ده کُومه چې هغۀ د مالِک خُدائ خِلاف کړے وى.