Read Pashto Bible (Yusufzai) — د پښتو مقدس کتاب شمېر 10 Bible Online

شمېر 10 - Pashto Bible (Yusufzai) — د پښتو مقدس کتاب bible

شمېر 10

¹بيا مالِک خُدائ مُوسىٰ ته ووئيل،

²”د ټکيدلے شوو سپينو زرو نه دوه بيګلې جوړې کړه چې د خلقو په يو ځائ راغونډولو اؤ د خېمو د وړلو د خبر د پاره اِستعمالېږى.

³کله چې دواړه بيګلې وغږېږى، نو ټول قوم به زما د حضُور د مُقدسې خېمې په دروازه کښې ستا نه ګېر‌چاپېره راغونډ شى.

⁴خو چې کله صِرف يو بيګل وغږېږى، بيا به صِرف د قبيلو مشران ستا نه راغونډېږى.

⁵کله چې بيګل په لنډ آواز وغږېږى، نو د نَمرخاتۀ په طرف قبيلې به خېمې وړى.

⁶کله چې په دويم ځل بيګل وغږېږى، نو د جنُوب طرف ته قبيلې به خېمې يوسى. چې بيګل په لنډ آواز غږېږى نو خېمې به وړلے شى،

⁷د قوم د راغونډولو د خبر د پاره به دواړه بيګلې غږولے شى. خو دا آواز به لنډ نۀ وى.

⁸د هارُون اِمامان زامن به بيګل غږوى. دا قانُون به په راتلُونکى ټولو وختُونو کښې منلے شى.

⁹کله چې ستاسو په وطن کښې جنګ وى اؤ دُښمن په تاسو باندې حمله کوى، نو په لنډ آواز به د خطرې بيګل وغږوئ. زۀ، مالِک خُدائ ستاسو خُدائ پاک، به ستاسو مدد وکړم اؤ ستاسو د دُښمنانو نه به مو بچ کړم.

¹⁰د خوشحالۍ په ورځو کښې، د مياشتې په ليدو اؤ ستاسو په نورو مُقررو اخترُونو کښې، کله چې تاسو سوزېدُونکې نذرانې اؤ خپلې د سلامتۍ نذرانې پېش کوئ نو تاسو به دې باندې بيګلې غږوئ. د بيګل آواز به ما ته ستاسو سره لوظ راپه ياد کړى، زۀ مالِک خُدائ ستاسو خُدائ پاک يم.“

¹¹د دويم کال د دويمې مياشتې په شلمه ورځ د هغې نه پس چې بنى اِسرائيل د مِصر وطن نه راوتلى وُو، د مالِک خُدائ د حضُور د خېمې نه وريځ اُوچته شوه،

¹²اؤ بنى اِسرائيل د سينا د بيابان نه په سفر روان شول. وريځ د فاران په صحرا کښې ايساره شوه.

¹³هغوئ د مُوسىٰ په ذريعه د مالِک خُدائ د حُکم په مُطابق سفر شروع کړو،

¹⁴اؤ هر ځل چې هغوئ تلل، نو هغوئ به هم په هغه ترتيب باندې وُو. څوک چې د يهُوداه قبيلې د لښکر د جنډې لاندې وُو هغوئ ډله په ډله اول روان شول، د هغوئ مشر نحشون زوئ د عميناداب وو.

¹⁵نتنى‌اېل زوئ د ضُعر د يساکار قبيلې مشر وو،

¹⁶اؤ اِلياب زوئ د حيلون د زبولون قبيلې مشر وو.

¹⁷بيا به خېمه راکُوزه کړے شوه اؤ د جيرسون اؤ مرارى قبيلې به روانې شوې، چې هغوئ به خېمه وړله.

¹⁸بيا، څوک چې د روبين قبيلې د لښکر د جنډې لاندې وُو، هغوئ به ډله په ډله، روان شول، د هغوئ مشر اليصور زوئ د شدِيُور وو.

¹⁹د شمعُون قبيلې مشر سلومى‌اېل زوئ د صورى‌شدى وو،

²⁰اِلياسف زوئ د عواېل د جاد قبيلې مشر وو.

²¹بيا به قُهاتيان روان شول، هغوئ به مُقدس سامان وړلو، چې هغوئ به کُوم وخت د خېمو بل ځائ ته ورسېدل، نو خېمه به بيا ودرولے شوې وه.

²²بيا، څوک چې د اِفرائيم قبيلې د لښکر د جنډې لاندې وُو، هغوئ به ډله په ډله روان شول، د هغوئ مشر اليسمع زوئ د عميهود وو.

²³د منشه قبيلې مشر ګملى‌اېل زوئ د فداهصور وو،

²⁴اؤ د بنيامين قبيلې مشر ابِدان زوئ د جدعونى وو.

²⁵په آخِر کښې، څوک چې د دان قبيلې د لښکر د جنډې لاندې وُو، چا چې د ټولو لښکرو د وروستو نه حِفاظت کولو، هغوئ ډله په ډله روان شول، د هغوئ مشر د عمى‌شدى زوئ اخيعزر وو.

²⁶د آشر قبيلې مشر فجعى‌اېل زوئ د عکران وو،

²⁷اؤ د نفتالى قبيلې مشر اخيرع زوئ د عينان وو.

²⁸نو داسې، بنى اِسرائيل ډله په ډله، په دې ترتيب روان وُو، چې کله به هم هغوئ خېمې وړلې اؤ سفر يې کولو.

²⁹مُوسىٰ خپل اوښى حوباب ته ووئيل چې د يترو ميديانى زوئ وو، ”مُونږ هغه ځائ ته په سفر روانېږُو چې مالِک خُدائ وئيلى دى چې هغه به يې مُونږ له راکړى. هغۀ وعده کړې ده چې هغه به اِسرائيليان مالدار کړى، نو زمُونږ سره لاړ شه اؤ مُونږ به تا سره ښېګړه وکړُو.“

³⁰حوباب ووئيل، ”نه، زۀ واپس خپل وطن ته ځم چې د خپلو خلقو سره يم.“

³¹مُوسىٰ ورته ووئيل، ”زۀ تا ته مِنت کوم چې زمُونږ نه مۀ ځه، تا ته پته ده چې مُونږ به په صحرا کښې چرته خېمې ولګوُو اؤ تۀ به مُونږ ته لار ښائې.

³²کۀ تۀ زمُونږ سره لاړ شې، نو چې مالِک خُدائ مُونږ له څومره برکتُونه هم راکوى نو په هغې کښې به ستا حِصه وى.“

³³کله چې خلق د مالِک خُدائ د غرۀ سينا نه روان شول، هغوئ درې ورځې سفر وکړو. د مالِک خُدائ د تړون صندُوق به همېشه د هغوئ نه مخکښې تلو چې د هغوئ د پاره د دَمې کولو ځائ پېدا کړى.

³⁴چې هغوئ به چرته خېمې وړلې، نو د ورځې به د مالِک خُدائ وريځ د هغوئ د پاسه وه.

³⁵چې کله به هم د تړون صندُوق روان شو، نو مُوسىٰ به وئيل، ”مالِکه خُدايه! پاڅه، خپل دُښمنان خوارۀ وارۀ کړه اؤ هغه خلق چې څوک ستا نه نفرت کوى هغوئ دې ته مجبُور کړه چې وتښتى.“

³⁶اؤ چې کله به د تړون صندُوق ودرېدلو، نو هغۀ به وئيل، ”مالِکه خُدايه! بې‌شمېره بنى اِسرائيلو ته راواپس شه.“