Read Pashto Bible (Yusufzai) — د پښتو مقدس کتاب شمېر 12 Bible Online

شمېر 12 - Pashto Bible (Yusufzai) — د پښتو مقدس کتاب bible

شمېر 12

¹بيا مُوسىٰ يوه حبشۍ ښځه وادۀ کړه، نو مريم اؤ هارُون په دې وجه په هغۀ اِعتراض وکړو.

²هغوئ ووئيل، ”مالِک خُدائ صِرف د مُوسىٰ په ذريعه خبرې کړې دى څۀ؟ هغۀ زمُونږ په ذريعه خبرې نۀ دى کړې څۀ؟“ هغوئ چې څۀ ووئيل نو مالِک خُدائ هغه واؤرېدل.

³مُوسىٰ يو ډېر عاجز سړے وو، هغه د زمکې په مخ د ټولو خلقو نه زيات عاجز وو.

⁴ناڅاپه مالِک خُدائ مُوسىٰ، هارُون اؤ مريم ته ووئيل، ”تاسو درې واړه بهر زما د حضُور خېمې ته لاړ شئ.“ نو هغوئ لاړل،

⁵اؤ مالِک خُدائ د وريځې په ستن کښې لاندې راغلو، د خېمې په دروازه کښې ودرېدلو اؤ هارُون اؤ مريم يې راوغوښتل. هغوئ دواړه وروړاندې شول،

⁶اؤ مالِک خُدائ هغوئ ته ووئيل، ”اوس زما خبرې په کولاؤ غوږُونو واورئ! کله چې ستاسو په مېنځ کښې پېغمبران وى، نو زۀ خپل ځان هغوئ ته په خيال کښې څرګندوم اؤ زۀ د هغوئ سره د هغوئ په خوب کښې خبرې کوم.

⁷خو زۀ خپل خِدمت‌ګار مُوسىٰ سره داسې نۀ کوم، هغه ما د خپلو خلقو اِسرائيليانو مشر جوړ کړے دے.

⁸نو زۀ د هغۀ سره مخامخ خبرې کوم، صفا اؤ واضِحه خبرې ورسره کوم، هغۀ زۀ ليدلے يم! تاسو دا جُرات څنګه کوئ چې زما د خِدمت کوُونکى مُوسىٰ خِلاف خبرې کوئ؟“

⁹مالِک خُدائ هغوئ ته په قهر شو، اؤ هغه لاړو

¹⁰اؤ کله چې د خېمې نه وريځ اُوچته شوه، نو د مريمې څرمن ناڅاپه په سخته بيمارۍ باندې پټه شوه اؤ د واورې په شان سپينه شوه. کله چې هارُون ورته وکتل نو وې ليدل چې د هغې څرمن په بيمارۍ پټه وه،

¹¹هغۀ مُوسىٰ ته ووئيل، ”صاحِبه! زمُونږ د کم‌عقل‌توب د ګُناه په وجه دا سزا مُونږ له مۀ راکوه.

¹²د مريم نه داسې څۀ مۀ جوړوه لکه چې يو ماشُوم مړ پېدا شوے وى اؤ نيمه غوښه يې نۀ وى.“

¹³نو مُوسىٰ مالِک خُدائ ته فرياد وکړو چې، ”خُدايه پاکه! هغه روغه کړه.“

¹⁴مالِک خُدائ ورته ووئيل، ”کۀ پلار ورله په مخ تُوکلے وې، نو هغې به اووۀ ورځې خپل شرم نۀ وو برداشت کړے څۀ؟ نو هغه دې اووۀ ورځې د خېمو نه بهر کړے شى اؤ د هغې نه پس هغه واپس راولئ.“

¹⁵مريم اووۀ ورځې د خېمو نه بهر کړے شوه اؤ چې تر کُومې پورې هغه واپس نۀ وه راوستلے شوې نو خلقو سفر نۀ کولو.

¹⁶بيا هغوئ د حصيروت نه لاړل اؤ د فاران په صحرا کښې يې خېمې ولګولې.