Read Pashto Bible (Yusufzai) — د پښتو مقدس کتاب شمېر 13 Bible Online

شمېر 13 - Pashto Bible (Yusufzai) — د پښتو مقدس کتاب bible

شمېر 13

¹مالِک خُدائ مُوسىٰ ته ووئيل چې،

²”د دولسو قبيلو د هرې يوې قبيلې نه يو يو مشر خوښ کړه اؤ هغوئ د جاسُوسانو په توګه ولېږه چې د کنعان وطن وګورى، کُوم چې زۀ بنى اِسرائيلو له ورکوم.“

³نو مُوسىٰ هغوئ د فاران د صحرا نه د مالِک خُدائ د حُکم په مُطابق ولېږل، چې د هغوئ ټولو سره د بنى اِسرائيلو مشران سړى وُو.

⁴د هغوئ نومُونه دا وُو : د روبين قبيلې نه، سموع زوئ د زکور،

⁵د شمعُون قبيلې نه، سافط زوئ د حورى،

⁶د يهُوداه قبيلې نه، کالب زوئ د يفُنه،

⁷د يساکار قبيلې نه، اِجال زوئ د يُوسف،

⁸د اِفرائيم قبيلې نه، هوسيع زوئ د نون،

⁹د بنيامين قبيلې نه، فلتى زوئ د رفُو،

¹⁰د زبولون قبيلې نه، جدى‌اېل زوئ د سودى،

¹¹د منشه قبيلې نه، جدى زوئ د سُوسى،

¹²د دان قبيلې نه، عمى‌اېل زوئ د جملى،

¹³د آشر قبيلې نه، ستُور زوئ د ميکااېل،

¹⁴د نفتالى قبيلې نه، نحبى زوئ د وُفسى،

¹⁵د جاد قبيلې نه، جيواېل زوئ د ماکى.

¹⁶دا هغه سړى دى چې مُوسىٰ د هغه وطن د جاسُوسۍ د پاره ولېږل. هغۀ د نون د زوئ هوسيع نُوم يشوَع ته بدل کړو.

¹⁷کله چې مُوسىٰ هغوئ لېږل، نو هغوئ ته يې ووئيل چې، ”د دې ځائ نه د صحرا په لار لاړ شئ اؤ بيا د کنعان غريزى علاقى ته ورننوځئ.

¹⁸وې ګورئ چې هغه څۀ رنګه وطن دے، چې کُوم خلق په کښې اوسېږى، هغوئ تکړه دى اؤ کۀ کمزورى دى، لږ دى اؤ کۀ ډېر دى.

¹⁹وې ګورئ چې هغه زمکه ښه ده اؤ کۀ ښه نۀ ده اؤ چې هغه خلق په خېمو کښې اوسېږى يا په داسې ښارُونو کښې اوسېږى چې دېوالُونه ترې نه تاؤ وى.

²⁰وګورئ چې هغه زمکه زرخېزه اؤ کۀ خواره ده اؤ ونې بُوټى په کښې شته اؤ کۀ نشته. اؤ تکړه شئ چې هلته کُومه مېوه کېږى لږه ترې نه راوړئ.“ دا هغه مُوسم وو چې انګُور په پخېدو شروع وُو.

²¹نو هغه سړى د صحرا په طرف لاړل اؤ هغه وطن يې د صين صحرا نه واخله تر رِحوب پورې وکتلو، چې د حمات درې ته نزدې دے.

²²هغوئ اول د هغه وطن جنُوبى برخې ته ننوتل اؤ حبرون ته راغلل، چرته چې د اخيمان، سيسى اؤ تلمى قبيلې اوسېدلې چې هغوئ عناقيان وُو اؤ د دېوانو د نسل اولاد وو. حبرون د مِصرى ښار ضعن نه اووۀ کاله مخکښې آباد کړے شوے وو.

²³هغوئ د انګُورو غُنچۍ وادۍ ته راغلل اؤ هلته هغوئ يوه څانګه راماته کړه چې د انګُورو يوه غُنچه ورباندې وه اؤ دومره درنه وه چې دا دوو سړو په يو ډانګ باندې يو خوا بل خوا راځوړنده کړه اؤ يو يې وړله. هغوئ څۀ انار اؤ اينځر هم يوړل.

²⁴په هغه وادۍ باندې ”د انګُورو غُنچه“ نُوم کېښودے شو ځکه چې بنى اِسرائيلو هلته د انګُورو غُنچه شُوکولې وه.

²⁵هغه وطن د څلوېښتو ورځو د کتلو نه پس، جاسُوسان راواپس شول

²⁶اؤ مُوسىٰ، هارُون اؤ د بنى اِسرائيلو ټول قوم ته د فاران په صحرا کښې قادِس ته راغلل. جاسُوسانو هغه خبر ورله راوړو چې څۀ يې ليدلى وُو اؤ هغه مېوه يې ورته وښودله چې کُومه يې راوړې وه.

²⁷هغوئ مُوسىٰ ته ووئيل، ”مُونږ هغه وطن وکتلو چې زرخېز اؤ آباد وو اؤ دا يې لږه شان مېوه ده.

²⁸خو د هغه ځائ اوسېدُونکى تکړه دى اؤ د هغوئ ښارونه غټ دى اؤ د ښارُونو نه يې دېوالُونه تاؤ دى. اؤ د دې نه علاوه، مُونږ هلته د دېوانو اولاد هم وليدو.

²⁹عمالقيان د هغه وطن په صحرا کښې اوسېږى، حِتيان، يبوسيان اؤ اموريان د غرُونو په وطن کښې اوسېږى، اؤ کنعانيان د مديتران سمندر اؤ د اُردن سيند سره اوسېږى.“

³⁰کالب هغه خلق غلى کړل کُومو چې د مُوسىٰ خِلاف شکايتُونه کول اؤ وې وئيل، ”راځئ چې په هغه وطن حمله وکړُو اؤ وې نيسُو، ځکه مُونږ ښۀ تکړه يُو او ورباندې برے مُوندے شُو.“

³¹خو هغه سړو ووئيل کُوم چې د کالب سره تلى وُو، ”نه! مُونږ تکړه نۀ يُو چې حمله ورباندې وکړُو، هغه خلق زمُونږ نه زيات طاقتور دى.“

³²نو هغوئ د بنى اِسرائيلو په مېنځ کښې د هغه وطن په باره کښې غلط خبر خور کړو کُوم چې هغوئ ليدلے وو. هغوئ ووئيل، ”په هغه وطن کښې دومره څۀ هم نۀ پېدا کېږى چې د هغه ځائ اوسېدُونکى خلق يې وخورى. کُوم خلق چې مُونږ وليدل ټول لوړ لوړ وُو،

³³اؤ هلته مُونږ دېوان هم وليدل، چې د عناق اولاد دے. مُونږ ته خپل ځانُونه داسې معلُومېدل لکه چې ملخان يُو اؤ مُونږ به هغوئ ته خامخا هم داسې ښکارېدلُو.“