Read Pashto Bible (Yusufzai) — د پښتو مقدس کتاب شمېر 15 Bible Online

شمېر 15 - Pashto Bible (Yusufzai) — د پښتو مقدس کتاب bible

شمېر 15

¹مالِک خُدائ مُوسىٰ ته ووئيل

²چې بنى اِسرائيلو ته دا اصُول وښايه چې په هغه وطن کښې پرې عمل کوى کُوم يې چې هغوئ له ورکولو.

³يو غوَيے، ګډه، يا يو چېلے مالِک خُدائ ته د سوزېدُونکې نذرانې په توګه يا د يوې منختې د پُوره کولو د نذرانې، يا د رضاکارانه نذرانې يا د ستاسو په مُقررو اخترُونو کښې د يوې نذرانې په توګه پېش کولے شى، د دې نذرانو بُوئ په مالِک خُدائ باندې ښۀ لګې.

⁴هر څوک چې يو ګډ يا چېلے مالِک خُدائ ته د سوزېدُونکې نذرانې په توګه پېش کوى نو هغه به د دې هر يو ځناور سره يو کيلو اوړۀ راوړى چې د زيتُونو تېل ورسره ګډ وى، دا به د غلې نذرانې په توګه وى، يو ليټر به د انګُورو شراب ورسره هم وى.

⁶کله چې يو ګډ پېش کېږى، نو دوه کيلو اوړۀ چې يو نيم ليټر د زيتُونو تېل ورسره ګډ وى، دا به د غلې نذرانې په توګه پېش کېږى،

⁷يو نيم ليټر د انګُورو شراب به ورسره هم وى. د دې نذرانې بُوئ په مالِک خُدائ باندې ښۀ لګې.

⁸کله چې يو غوَيے د سوزېدُونکې نذرانې په توګه يا د يوې منختې پُوره کولو د نذرانې يا د سلامتۍ د نذرانې په توګه مالِک خُدائ ته پېش کېږى،

⁹د درې کيلو اوړو د غلې يوه نذرانه به پېش کېږى چې دوه ليټره د زيتُونو تېل ورسره ګډ وى،

¹⁰دوه ليټره د انګُورو شراب به ورسره هم وى. د دې نذرانې بُوئ په مالِک خُدائ باندې ښۀ لګې.

¹¹دا هغه څۀ دى چې د هر يو غوَيى، ګډ، ګډُورى، يا چېلۍ سره به پېش کولے شى.

¹²د ځناورو د شمېر په مُطابق به د دې څيزُونو مِقدار هم زياتولے شى.

¹³د وطن ټول اصلى پېدائشى خلق چې کله يوه په اور تيارېدُونکې نذرانه پېش کوى نو هغوئ به داسې کوى، د دې بُوئ په مالِک خُدائ باندې ښۀ لګې.

¹⁴اؤ کۀ ستاسو په مېنځ کښې د بل وطن کس وى، کۀ هغه د لږ وخت يا د ډېر وخت د پاره اوسېدُونکے وى، نو هغه به په اور تيارېدُونکې نذرانه پېش کوى، د دې بُوئ په مالِک خُدائ باندې ښۀ لګې، نو هغوئ به هم هغه شان اصُول منى.

¹⁵په راتلُونکى ټولو وختُونو کښې، تاسو اؤ ستاسو سره اوسېدُونکى د بل وطن خلق به دا اصُول منى. تاسو اؤ هغوئ د مالِک خُدائ په نظر کښې يو شان يئ،

¹⁶ستاسو اؤ د هغوئ د پاره به يو شان قانُون اؤ اصُول وى.

¹⁷مالِک خُدائ مُوسىٰ ته ووئيل

¹⁸چې بنى اِسرائيلو ته دا اصُول وښايه چې په هغه وطن کښې پرې عمل کوى کُوم چې مالِک خُدائ هغوئ له ورکولو.

¹⁹کله چې تاسو د هغه وطن د فصل نه خوراک کوئ، د هغې نه به څۀ برخه مالِک خُدائ ته د خاص برخې په توګه پېش کولے شى.

²⁰کله چې تاسو ډوډۍ پخوئ، نو د نوې غلې د وړومبۍ پېړې ډوډۍ به مالِک خُدائ ته د خاص برخې په توګه پېش کولے شى. دا به هم هغه شان پېش کولے شى چې څنګه تاسو په درمن کښې صفا شوې غله د خاص برخې په توګه پېش کوئ.

²¹په راتلُونکى ټولو وختُونو کښې، تاسو چې کُومه ډوډۍ پخوئ نو دا نذرانه به مالِک خُدائ له ورکوئ.

²²خو کۀ څوک په غلطۍ سره په دې اصُولو باندې عمل کولو کښې ناکام شى کُوم چې مالِک خُدائ مُوسىٰ له ورکړى دى،

²³اؤ فرض کړئ کۀ راتلُونکى نسلُونه په دې هر څۀ کولو کښې ناکام شى چې مالِک خُدائ يې د مُوسىٰ په ذريعه حُکم کړے دے،

²⁴کۀ يوه داسې غلطى شوې وى چې قوم ته پته نۀ وى لګېدلې، نو هغوئ به يو غوَيے د سوزېدُونکې نذرانې په توګه پېش کړى، د دې بُوئ په مالِک خُدائ باندې ښۀ لګې، دا به د معيارى غلې نذرانې اؤ د څښلو نذرانې سره پېش کېږى. د دې نه علاوه، هغوئ به يو چېلے د ګُناه نذرانې په توګه هم پېش کوى.

²⁵اِمام به د قوم د پاره کفاره ادا کړى اؤ هغوئ به معاف کړے شى، ځکه چې هغه کار په غلطۍ سره شوے وو اؤ هغوئ خپله د ګُناه نذرانه په اور تيارېدُونکې نذرانې په توګه مالِک خُدائ ته راؤړله.

²⁶نو د بنى اِسرائيلو ټول قوم اؤ د هغوئ سره اوسېدُونکى د پردى وطن خلق به معاف کړے شى، ځکه چې ټول په دې غلطۍ کښې شامِل وُو.

²⁷کۀ يو کس په غلطۍ سره ګُناه وکړى، نو هغه به د يو کال چېلۍ د ګُناه نذرانې په توګه پېش کوى.

²⁸اِمام به په قُربان‌ګاه باندې د هغه کس د پاره کفاره ادا کړى، چا چې په غلطۍ سره ګُناه کړې وى اؤ هغه به معاف شى.

²⁹دا اصُول د هغه هر چا د پاره يو شان دى چې څوک په غلطۍ سره ګُناه وکړى، کۀ هغه په حقيقت کښې بنى اِسرائيلے وى يا د هغوئ سره اوسېدُونکے د پردى وطن کس وى.

³⁰خو کۀ يو کس د قصده ګُناه وکړى، کۀ هغه د خپل وطن يا د پردى وطن وى، نو د ګُناه په وجه هغۀ د مالِک خُدائ بې عِزتى کړې ده اؤ هغه به وژلے شى،

³¹ځکه چې هغۀ د مالِک خُدائ د وېنا سپکاوے کړے دے اؤ قصداً يې د هغۀ يو حُکم مات کړے دے. نو هغه د خپل مرګ په خپله ذِمه وار دے.

³²کله چې بنى اِسرائيل لا په صحرا کښې وُو، نو يو سړے وليدے شو چې د سبت په ورځ يې خشاک راټولولو.

³³نو هغه مُوسىٰ، هارُون اؤ ټول قوم ته راوستلے شو،

³⁴اؤ قېد کړے شو، ځکه چې دا پته نۀ وه چې د هغۀ سره څۀ وکړے شى.

³⁵نو مالِک خُدائ مُوسىٰ ته ووئيل، ”هغه سړے دې خامخا ووژلے شى، ټول قوم به هغه د خېمو نه بهر سنګسار کړى.“

³⁶نو ټول قوم هغه د خېمو نه بهر بوتلو اؤ سنګسار يې کړو، هم هغه شان چې څنګه مالِک خُدائ حُکم کړے وو.

³⁷مالِک خُدائ مُوسىٰ ته ووئيل،

³⁸چې بنى اِسرائيلو ته ووايه : د خپلو جامو په ګوټُونو باندې مزى راځوړند کړئ اؤ په هر يو مزى باندې يې يو د آسمانى رنګ تار ولګوئ. داسې به تاسو په راتلُونکى ټولو وختُونو کښې کوئ.

³⁹چې هر کله هم تاسو دا مزى ګورئ نو تاسو ته به زما ټول حُکمونه دريادېږى اؤ عمل به پرې کوئ، نو تاسو به زما نه نۀ اؤړئ اؤ د خپلو سترګو اؤ زړۀ په خواهِشُونه پسې به نۀ ګرځئ.

⁴⁰هغه مزى به تاسو ته دا دريادوى چې زما ټول حُکمونه منئ اؤ تاسو به په پُوره توګه زما يئ.

⁴¹زۀ مالِک خُدائ ستاسو خُدائ پاک يم، ما تاسو د مِصر وطن نه راوويستلئ چې ستاسو خُدائ پاک يم. زۀ مالِک خُدائ يم.“