Read Pashto Bible (Yusufzai) — د پښتو مقدس کتاب شمېر 17 Bible Online

شمېر 17 - Pashto Bible (Yusufzai) — د پښتو مقدس کتاب bible

شمېر 17

¹مالِک خُدائ مُوسىٰ ته ووئيل چې،

²”بنى اِسرائيلو ته ووايه چې تا له دولس امساګانې درکړى چې د هرې قبيلې د مشر نه يوه يوه وى. د هر سړى نُوم د هغۀ په امسا باندې وليکه

³اؤ په يوه امسا باندې د هارُون نُوم وليکه چې کُومه د ليوى قبيلې د پاره وى، چې د هرې ليوى قبيلې د مشر د پاره يوه يوه امسا وى.

⁴دا امساګانې زما د حضُور خېمې ته يوسه اؤ د تړون صندُوق په مخکښې يې کېږده، چرته چې زۀ ستا سره مِلاوېږم.

⁵بيا چې ما کُوم سړے خوښ کړے وى نو د هغۀ امسا به زرغُونه شى اؤ زۀ به د بنى اِسرائيلو، ستا خِلاف دا هر وخت غورېدل بند کړم.“

⁶نو مُوسىٰ بنى اِسرائيلو ته ووئيل چې داسې وکړئ اؤ د هغوئ هر يو مشر هغۀ له يوه امسا ورکړه، چې د هرې قبيلې د پاره يوه يوه وه، دا ټولې دولس وې اؤ په دې دولسو امساګانو کښې يوه امسا د هارُون وه.

⁷بيا مُوسىٰ هغه ټولې امساګانې په خېمه کښې د مالِک خُدائ د تړون صندُوق په مخکښې کېښودې.

⁸په ورپسې ورځ، کله چې مُوسىٰ خېمې ته دننه لاړو، نو هغۀ د هارُون امسا وليده چې د ليوى د پاره وه، هغه زرغُونه شوې وه، دې غوټۍ اؤ ګلُونه کړى وُو اؤ پاخۀ بادام يې نيولى وُو.

⁹مُوسىٰ ټولې امساګانې يوړې اؤ بنى اِسرائيلو ته يې وښودلې، هغوئ ورته وکتل اؤ هر يو مشر خپله امسا واپس واخستله.

¹⁰مالِک خُدائ مُوسىٰ ته ووئيل، ”د هارُون امسا واپس د تړون صندُوق په مخکښې کېږده. باغيانو بنى اِسرائيلو ته به دا د نښې په توګه کېښودلے شى، کۀ د هغوئ غورېدل بند نۀ شى نو هغوئ به مړۀ شى.“

¹¹مُوسىٰ هم هغه شان وکړل چې څنګه مالِک خُدائ حُکم کړے وو.

¹²بنى اِسرائيلو مُوسىٰ ته ووئيل، ”مُونږ برباد يُو، تباه يُو!

¹³چې څوک هم د مالِک خُدائ خېمې ته نزدې ورشى، نو هغه به مړ شى، نو مُونږ خو ټول مرګِ حال يُو!“