Read Pashto Bible (Yusufzai) — د پښتو مقدس کتاب شمېر 18 Bible Online

شمېر 18 - Pashto Bible (Yusufzai) — د پښتو مقدس کتاب bible

شمېر 18

¹مالِک خُدائ هارُون ته ووئيل، ”تۀ، ستا زامنو اؤ ليويانو ته به خامخا د خپلو هغه بدو سزا مِلاؤ شى چې د هغه جُرم تعلُق زما د حضُور خېمې د خِدمت سره وى، خو د اِمامت په خِدمت کښې د څۀ ګُناه سزا به صِرف تا اؤ ستا زامنو ته ملاوېږى.

²د ليوى قبيلې خپل خپلوان هم د ځان سره راوله، چې ستا سره په کار کښې مدد وکړى، په هغه وخت کښې چې تۀ اؤ ستا زامن په خېمه کښې خِدمت کوى.

³هغوئ به ستا اؤ د خېمې د پاره خپلې ذِمه وارۍ پُوره کوى، خو هغوئ به په مُقدس ځائ کښې د مُقدس سامان سره يا د قُربان‌ګاه سره کار نۀ لرى. کۀ هغوئ داسې وکړل، نو تۀ اؤ هغوئ به ووژلے شئ.

⁴هغوئ به تا سره کار کوى اؤ په خېمه کښې به د خِدمت خپلې ټولې ذِمه وارۍ پُوره کوى، خو چې چا ته اِجازت نۀ وى نو هغه کس به تا سره خِدمت نۀ شى کولے.

⁵يواځې تۀ اؤ ستا زامن به د مُقدس ځائ اؤ د قُربان‌ګاه ذِمه وارۍ پُوره کوئ، نو داسې به زۀ بيا بنى اِسرائيلو ته نۀ په قهر کېږم.

⁶زۀ هغه څوک يم چا چې ستا خپلوان ليويان ستا د پاره د يوې تُحفې په توګه د بنى اِسرائيلو نه خوښ کړى دى. هغوئ ما ته وقف دى، چې هغوئ په خېمه کښې خپلې ذِمه وارۍ تر سره کړى.

⁷خو يواځې تۀ اؤ ستا زامن به د اِمامت هغه ذِمه وارۍ پُوره کوئ کُومې چې د قُربان‌ګاه اؤ د زيات مُقدس ځائ سره تعلُق لرى. دا ستاسو ذِمه وارۍ دى، ځکه چې ما تاسو له د اِمامت تُحفه درکړې ده. هر څوک چې حقدار نۀ وى اؤ نزدې راشى نو هغه به ووژلے شى.“

⁸مالِک خُدائ هارُون ته ووئيل، ”ګوره! زۀ تا له زما ټولې خاص برخې درکوم چې د نذرانو په توګه دې نۀ شى سوزولے. دا زۀ تا اؤ ستا اولاد له درکوم چې د همېشه د پاره ستاسو په حواله وى.

⁹ډېرې مُقدسې نذرانې کُومې چې په قُربان‌ګاه نۀ سوزولے کېږى، هغه ستاسو دى : د غلې نذرانې، د ګُناه نذرانې، د تاوان نذرانې. هر هغه څيز چې ما ته د مُقدسې نذرانې په توګه پېش کېږى هغه ستا اؤ ستا د زامنو دے.

¹⁰تاسو به خامخا دا څيزُونه په يو مُقدس ځائ کښې خورئ اؤ صِرف نران دا خوړلے شى، دا مُقدس وګڼئ.

¹¹د دې نه علاوه، بنى اِسرائيل چې نورې خاص برخې ما ته پېش کوى هغه به ستاسو وى. زۀ دا د راتلُونکى ټولو وختُونو د پاره تا، ستا زامنو اؤ ستا لُوڼو له ورکوم. ستا د کورنۍ هر يو کس چې پاک وى نو هغه دا خوړلے شى.

¹²زۀ د وړومبى پېداوار بِهترينه حِصه تاسو له درکوم کُومه چې بنى اِسرائيل ما ته هر کال پېش کوى : لکه د زيتُونو تېل، د انګُورو شراب اؤ غله دانه.

¹³دا هر څۀ ستاسو دى. د ستاسو د کورنۍ هر يو کس چې پاک وى نو هغه يې خوړلے شى.

¹⁴په اِسرائيليانو کښې چې هر څيز ما ته بغېر د څۀ شرط نه وقف شوے وى نو هغه به ستاسو وى.

¹⁵هر يو وړومبے پېدا شوے ماشُوم يا ځناور چې بنى اِسرائيل يې ما ته پېش کوى هغه به ستاسو وى. خو تاسو به خامخا هر وړومبے پېدا شوے ماشُوم واپس اخلئ اؤ هر وړومبے پېدا شوے ځناور به هم واپس اخلئ کُوم چې ناپاک وى.

¹⁶چې ماشُومان د يوې مياشتې شى نو هغوئ به په مُقرر شوى قيمت يعنې په پينځو د سپينو زرو سيکو باندې واپس اخستلے شى، دا به د منلے شوى معيار په مُطابق وى.

¹⁷خو د غواګانو، ګډو اؤ چېلو وړومبے پېدا شوے بچے به واپس نۀ شى اخستلے، دا په پُوره توګه زما وى اؤ دا به قُربانيږى. وينه يې په قُربان‌ګاه باندې وشيندئ اؤ وازګه يې په اور تيارېدُونکې نذرانې په توګه وسوزوئ، د دې بُوئ په ما باندې ښۀ لګې.

¹⁸د دې غوښه ستاسو ده، لکه د دې سينه اؤ د خاص نذرانې وروستنۍ خپه.

¹⁹کُومې خاص برخې چې بنى اِسرائيل ما ته پېش کوى هغه زۀ په راتلُونکى ټولو وختُونو کښې تا، ستا زامنو اؤ ستا لُوڼو له ورکوم، دا يو نۀ ماتېدُونکے تړون دے چې ما تا اؤ ستا اولاد سره وکړو.“

²⁰مالِک خُدائ هارُون ته ووئيل، ”تا ته به هيڅ جائيداد نۀ ملاوېږى چې ستا ميراث شى اؤ د بنى اِسرائيلو وطن هيڅ حِصه به تا ته نۀ حواله کېږى. زۀ مالِک خُدائ، ستا د پاره کافى يم.“

²¹مالِک خُدائ ووئيل، ”ما ليويانو له هره لسمه حِصه ورکړې ده کُومه چې اِسرائيليان ما ته پېش کوى. دا د هغوئ د پاره زما د حضُور د خېمې د خِدمت کولو مزدُورى ده.

²²نور به بنى اِسرائيل خېمې ته نۀ نزدې کېږى ګنى هغوئ به ځان له په خپله د مرګ سزا ورکوى.

²³صِرف ليويان به د خېمې خيال ساتى اؤ د دې پُوره ذِمه وارى به تر سره کوى. دا قانُون به د همېشه د پاره ستاسو د اولاد د پاره هم وى. د اِسرائيليانو په وطن کښې به ليويانو ته هيڅ زمکه نۀ ملاوېږى چې خپله يې شى،

²⁴ځکه چې ما هغوئ له لسمه حِصه ورکړې ده کُومه چې بنى اِسرائيل ما ته د خاص برخې په توګه پېش کوى. نو دا ځکه ما هغوئ ته ووئيل چې د اِسرائيليانو په وطن کښې به د هغوئ جائيداد نۀ وى.“

²⁵مالِک خُدائ مُوسىٰ ته ووئيل،

²⁶چې ليويانو ته ووايه : ”کله چې تاسو د بنى اِسرائيلو نه لسمه حِصه اخلئ کُومه چې مالِک خُدائ تاسو له درکوى، نو تاسو به د دې لسمه حِصه مالِک خُدائ ته د خاص برخې په توګه پېش کوئ.

²⁷دا خاص برخه به د هغې نذرانې برابره ګڼلے شى کُومه نذرانه چې زميدار د نوى فصل اؤ د نوى انګُورو شرابو نه پېش کوى.

²⁸نو تاسو به مالِک خُدائ ته يوه خاص برخه هم پېش کوئ کُومه چې تاسو د بنى اِسرائيلو د لسمې حِصې نه اخلئ. دا برخه به تاسو د مالِک خُدائ د پاره هارُون اِمام له ورکوئ.

²⁹چې څۀ تاسو ته ملاوېږى نو د هغې د ټولو نه ښه حِصه مالِک خُدائ له ورکوئ.

³⁰دا اصُول ليويانو ته وښايه چې کله تاسو ډېره ښۀ حِصه ورکړئ، نو د هغې نه پاتې شوې د ځان د پاره کېښودے شئ، هم هغه شان لکه څنګه چې يو زميدار د نذرانې ورکولو نه پس باقى پاتې شوے پېداوار د ځان سره ساتلے شى.

³¹تاسو اؤ ستاسو کورنۍ هغه پاتې شوې برخه په هر ځائ کښې خوړلے شئ، ځکه چې دا ستاسو د مُقدسې خېمې د خِدمت مزدُورى ده.

³²کۀ چرې تاسو د دې ښۀ حِصه مالِک خُدائ ته پيش کړى وى اؤ بيا تاسو دا خورئ نو تاسو ته به سزا نۀ ملاوېږى. هغه تحفى او قربانيانى چې قوم يې راوړى لازمى ده چې مُقدسې پاتې شى خو کۀ د دې د پيش کولو نه مخکښې تاسو دې نه کومه برخه وخوړه نو وبه وژلے شئ.“