Read Pashto Bible (Yusufzai) — د پښتو مقدس کتاب شمېر 19 Bible Online

شمېر 19 - Pashto Bible (Yusufzai) — د پښتو مقدس کتاب bible

شمېر 19

¹مالِک خُدائ مُوسىٰ اؤ هارُون ته ووئيل،

²”بنى اِسرائيلو ته دا اصُول وښايئ، چې هغوئ تاسو له يوه سره غوا راولى چې لنګتون يې نۀ وى کړے او هيڅ عېب په کښې نۀ وى اؤ يوې ورباندې هيڅ کله هم نۀ وى شوې،

³اؤ هغوئ به هغه بيا اِلعازر اِمام له ورکړى. هغه به د خېمو نه بهر بوتلے شى اؤ د هغۀ په مخکښې به حلاله کړے شى.

⁴اِلعازر به بيا د هغې څۀ وينه واخلى اؤ د خپلې ګوتې سره به اووۀ ځلې وينه خېمې ته مخامخ وشيندى.

⁵ټوله غوا، سره د څرمنې، غوښې، وينې اؤ کولمو، به د اِمام په مخکښې وسوزولے شى.

⁶بيا به هغه د دِيار لرګے، څۀ وېلنى اؤ يو سُور تار راوړى اؤ دا به په اور کښې واچوى چرته چې غوا سوزېږى.

⁷د هغې نه پس، هغه به خپلې جامې ووينځى اؤ غُسل به وکړى، نو بيا هغه خېمو ته دننه راتلے شى، خو تر ماښامه پورې به ناپاک وى.

⁸چا چې غوا سوزولې وى نو هغه به خامخا خپلې جامې ووينځى اؤ غُسل به وکړى، خو هغه به هم تر ماښامه پورې ناپاک وى.

⁹بيا هغه سړے کُوم چې پاک وى هغه به د غوا ايرې راغونډې کړى اؤ د خېمو نه بهر په يو پاک ځائ کښې به يې کېږدى، هلته به دا ايرې د بنى اِسرائيلو د قوم د پاره ساتلے شى چې د ناپاکۍ د لرې کولو اوبو تيارولو د پاره به اِستعمالېږى. دا رسم به د ګُناه د لرې کولو د پاره ادا کېږى.

¹⁰چا چې ايرې راټولې کړې وى هغه به خامخا خپلې جامې وينځى اؤ تر ماښامه پورې به ناپاک وى. دا اصُول د راتلُونکى ټولو وختُونو د پاره دى، دا به د بنى اِسرائيلو اؤ د پردى وطن د خلقو د پاره وى چې د هغوئ سره اوسېږى.

¹¹هر څوک چې د مړى سره ولګې نو هغه به اووۀ ورځې ناپاک وى.

¹²هغه به خامخا په دريمه ورځ اؤ په اوومه ورځ خپل ځان د پاکوالى په اوبو باندې پاک کړى، نو هغه به پاک شى. خو کۀ هغه په دريمه ورځ اؤ په اوومه ورځ باندې خپل ځان پاک نۀ کړى، نو هغه به پاک نۀ وى.

¹³هر څوک چې د مړى سره ولګې اؤ خپل ځان پاک نۀ کړى نو هغه به ناپاک وى، ځکه چې په هغۀ باندې د پاکوالى اوبۀ نۀ دى شيندلے شوې. هغه د مالِک خُدائ د خېمې سپکاوے کوى اؤ هغه به نور د خُدائ پاک د خلقو نه نۀ شى ګڼلے.

¹⁴کۀ يو سړے په خېمه کښې مړ شى، هر څوک چې د هغۀ د مرګ په وخت په خېمه کښې وى يا ورننوځى نو هغه به اووۀ ورځې ناپاک وى.

¹⁵په خېمه کښې هر لوښے چې سر ورباندې نۀ وى هغه به هم ناپاک وى.

¹⁶کۀ څوک داسې کس له ګوتې وروړى چې قتل شوے وى يا د کور نه بهر په خپل مرګ مړ وى يا کۀ څوک د بنيادم هډُوکى يا قبر له ګوتې وروړى، نو هغه به اووۀ ورځې ناپاک وى.

¹⁷کُومه غوا چې د ګُناه د لرې کولو د پاره سوزولے شوې وه د هغې نه لږې ايرې به د ناپاکۍ لرې کولو د پاره واخستلے شى اؤ په يو لوښى کښې به واچولے شى اؤ روانې اوبۀ په کښې واچوئ.

¹⁸يو پاک سړے به وېلنے واخلى، په اوبو کښې به يې ډُوب کړى اؤ اوبۀ به په خېمه، د هغې په ټول سامان اؤ په هغه خلقو وشيندى چې کُوم هلته وى اؤ په هغه سړى باندې به اوبۀ وشيندى کُوم چې د بنيادم هډُوکى، مړى، يا قبر له ګوتې وروړې وى.

¹⁹پاک سړے به په ناپاک سړى باندې په دريمه اؤ په اوومه ورځ باندې اوبۀ وشيندى. اؤ په اوومه ورځ به هغه ناپاک سړے پاک کړى، د نمرپرېواتو په وخت د خپلو جامو وينځلو اؤ په ځان اوبۀ اچولو نه پس به پاک شى.

²⁰هر څوک چې ناپاک شوے وى اؤ خپل ځان پاک نۀ کړى نو هغه به ناپاک پاتې شى، ځکه چې په هغۀ باندې د پاکوالى اوبۀ نۀ دى شيندلے شوې. هغه د مالِک خُدائ د خېمې سپکاوے کوى اؤ نور به د خُدائ پاک د خلقو نه نۀ شى ګڼلے.

²¹تاسو به دا اصُول په راتلُونکى ټولو وختُونو کښې منئ. کُوم کس چې د پاکوالى اوبۀ شيندى نو هغه به هم خامخا خپلې جامې وينځى، هر څوک چې دې اوبو له ګوتې وروړى نو هغه به تر ماښامه پورې ناپاک وى.

²²يو ناپاک کس چې څۀ څيز له هم ګوتې وروړى نو هغه به ناپاک وى اؤ نور هر څوک چې هغه څيز له ګوتې وروړى نو هغه به هم تر ماښامه پورې ناپاک وى.“