Read Pashto Bible (Yusufzai) — د پښتو مقدس کتاب شمېر 20 Bible Online

شمېر 20 - Pashto Bible (Yusufzai) — د پښتو مقدس کتاب bible

شمېر 20

¹په وړومبۍ مياشت کښې د بنى اِسرائيلو ټول قوم د صين صحرا ته راغلو اؤ په قادِس کښې يې خېمې ولګولې. مريم هلته مړه شوه اؤ دفن شوه.

²چرته چې هغوئ خېمې لګولې وې هلته اوبۀ نۀ وې، نو خلق په مُوسىٰ اؤ هارُون باندې راغونډ شول

³اؤ هغوئ وغورېدل چې : ”دا به ښۀ وے چې مُونږ د خپلو بنى اِسرائيلو سره د مالِک خُدائ د خېمې په مخکښې مړۀ شوى وے.

⁴تاسو مُونږ دې صحرا ته د دې د پاره راوستلى يُو چې دلته د خپلو څاروو سره مړۀ شُو؟

⁵تاسو مُونږ ولې د مِصر نه راوويستلُو اؤ دې خراب ځائ ته مو راوستلو چې دلته هيڅ هم نۀ کېږى. نۀ غله دانه، نۀ اينځر، نۀ انګُور اؤ نۀ انار شته. د څښلو اوبۀ هم نشته!“

⁶مُوسىٰ اؤ هارُون د خلقو نه لرې لاړل اؤ د خېمې د دروازې په خُله کښې ودرېدل. هغوئ پړمخې د عِبادت د پاره پرېوتل اؤ د مالِک خُدائ د حضُور سپين جلال هغوئ ته راڅرګند شو.

⁷مالِک خُدائ مُوسىٰ ته ووئيل،

⁸”هغه امسا واخله چې کُومه د تړون صندُوق مخې ته ده اؤ بيا تۀ اؤ هارُون ټول قوم راغونډ کړئ. هلته د هغوئ ټولو په مخکښې هغه ګټ ته ووايه اؤ د هغې نه به اوبۀ راووځى. نو داسې تۀ به د خلقو د پاره د ګټ نه اوبۀ راوباسې اؤ هغوئ اؤ د هغوئ ځناور به يې وڅښى.“

⁹مُوسىٰ لاړو اؤ امسا يې راواخستله، چې څنګه مالِک خُدائ حُکم کړے وو.

¹⁰مُوسىٰ اؤ هارُون د ګټ په مخکښې ټول قوم راغونډ کړو اؤ مُوسىٰ ووئيل، ”اے باغيانو واورئ! آيا مُونږ ستاسو د پاره د دې ګټ نه اوبۀ راوباسُو څۀ؟“

¹¹بيا مُوسىٰ امسا پورته کړه اؤ دوه ځله يې هغه ګټ پرې ووهلو اؤ ډېرې زياتې اوبۀ ترې نه راووتلې اؤ ټولو خلقو اؤ ځناورو وڅښلې.

¹²خو مالِک خُدائ مُوسىٰ اؤ هارُون ته ووئيل، ”تاسو په ما ايمان ونۀ لرلو چې زما مُقدس طاقت مو د بنى اِسرائيلو په مخکښې څرګند کړے وے، نو اوس تاسو به هغوئ هغه وطن ته بونۀ ځئ چې ما يې د ورکولو وعده کړې ده.“

¹³د دې ځائ نُوم د مريبه اوبۀ شو، ځکه چې بنى اِسرائيلو د مالِک خُدائ خِلاف شکايت وکړو اؤ هغۀ ورته هلته وښودل چې هغه مُقدس دے.

¹⁴مُوسىٰ د قادِس نه ادومى بادشاه له پېغام وړُونکى ولېږل. هغوئ ورته ووئيل، ”دا پېغام ستاسو د خپلوانو، د اِسرائيليانو د طرف نه دے. تاسو ته پته ده چې په مُونږ کُوم تکليفُونه تېر شوى دى،

¹⁵چې زمُونږ پلار‌نيکۀ څنګه مِصر ته لاړل، هلته مُونږ ډېر وخت اوسېدلو. مِصريانو زمُونږ د پلار‌نيکۀ اؤ زمُونږ سره بد سلُوک کولو،

¹⁶اؤ مُونږ مالِک خُدائ ته فرياد وکړو. اؤ هغۀ زمُونږ فرياد واؤرېدو اؤ يوه فرِښته يې راولېږله، چې د مِصر نه يې راوويستلُو. اوس مُونږ ستاسو د علاقې سره نزدې په يو ښار قادِس کښې يُو.

¹⁷تاسو مِهربانى وکړئ اؤ مُونږ پرېږدئ چې ستاسو د وطن نه تېر شُو. مُونږ اؤ زمُونږ څاروى به د لارې نه يو خوا بل خوا نۀ اؤړُو، نۀ به ستاسو پټو يا د انګُورو باغُونو ته ورننوځُو اؤ نۀ به ستاسو د کُوهو نه اوبۀ څښُو. مُونږ به په هغه لويه لاره روان يُو اؤ ستاسو علاقې نه به ووځُو.“

¹⁸خو ادوميانو ورته ووئيل، ”تاسو د دې ځائ نه نۀ شئ تيريدلے! کۀ تاسو داسې وکړل، مُونږ به راووځُو اؤ په تاسو به حمله وکړُو.“

¹⁹بنى اِسرائيلو ووئيل، ”مُونږ په لويه لاره روان يُو اؤ کۀ مُونږ اؤ زمُونږ څاروو ستاسو اوبۀ وڅښلې، نو مُونږ به د هغې پېسې درکړُو. مُونږ صِرف ستاسو په وطن کښې تېرېدل غواړُو نور هيڅ هم نه.“

²⁰خو ادوميانو بيا ووئيل، ”تاسو مۀ تېرېږئ!“ اؤ هغوئ د يو طاقتور لښکر سره په بنى اِسرائيلو باندې حملې د پاره راغلل.

²¹ځکه چې ادوميانو بنى اِسرائيل په خپله علاقه کښې تېرېدو ته نۀ پرېښودل، نو اِسرائيليان په بله لار لاړل.

²²د بنى اِسرائيلو ټول قوم د قادِس نه لاړل اؤ د حُور غرۀ ته ورسېدل،

²³چې د ادوم په سرحد باندې دے. هلته مالِک خُدائ مُوسىٰ اؤ هارُون ته ووئيل،

²⁴”هارُون به هغه وطن ته ورننه نۀ وځى د کُوم چې ما بنى اِسرائيلو له د ورکولو وعده کړې ده، هغه به مړ شى، ځکه چې په مريبه کښې تاسو زما د حُکم نه بغاوت کړے وو.

²⁵هارُون اؤ د هغۀ زوئ اِلعازر بره د حُور غرۀ ته بوځه،

²⁶اؤ هلته د هارُون نه د اِمامانو لِباس وباسه اؤ اِلعازر ته يې ورواچوه. هارُون به هلته مړ شى.“

²⁷مُوسىٰ هم هغه شان وکړل چې څنګه مالِک خُدائ حُکم ورکړے وو. هغوئ د ټول قوم په مخکښې د حُور غرۀ ته وختل،

²⁸اؤ مُوسىٰ د هارُون نه د اِمامانو لِباس وويستلو اؤ اِلعازر ته يې ورواغوستلو. هارُون هلته د غرۀ په سر باندې مړ شو اؤ مُوسىٰ اؤ اِلعازر د غرۀ نه راکُوز شول.

²⁹د اِسرائيليانو ټول قوم ته پته ولګېده چې هارُون مړ دے اؤ دېرش ورځې هغوئ د هغۀ په غم غمژن وُو.