Read Pashto Bible (Yusufzai) — د پښتو مقدس کتاب شمېر 23 Bible Online

شمېر 23 - Pashto Bible (Yusufzai) — د پښتو مقدس کتاب bible

شمېر 23

¹بلعام بلق ته ووئيل، ”دلته زما د پاره اووۀ قُربان‌ګاه جوړې کړه اؤ ما له اووۀ غوَيى اؤ اووۀ ګډان راوله.“

²بلق هم هغه شان وکړل چې څنګه بلعام وئيلى وُو، هغۀ اؤ بلعام يو غوَيے اؤ يو ګډ په هره يو قُربان‌ګاه باندې پېش کړل.

³بيا بلعام بلق ته ووئيل، ”دلته د خپلې سوزېدُونکې نذرانې سره ايسار شه اؤ زۀ ځم چې وګورم چې مالِک خُدائ ما ته راڅرګندېږى اؤ کۀ نه. چې هغه ما ته څۀ هم ووائى نو زۀ به تا ته ووايم.“ نو هغه يو خوشى غر ته لاړو،

⁴اؤ خُدائ پاک هغۀ ته راڅرګند شو. بلعام ورته ووئيل، ”ما اووۀ قُربان‌ګاه جوړې کړې دى اؤ يو غوَيے اؤ يو ګډ مې په هره يوه باندې پېش کړل.“

⁵مالِک خُدائ بلعام ته د وئيلو د پاره خبرې وښودلې اؤ واپس يې بلق ته ولېږلو چې هغۀ ته د هغۀ پېغام ورسوى.

⁶نو هغه واپس لاړو اؤ وې ليدل چې بلق د خپلې سوزېدُونکې نذرانې سره ولاړ وو اؤ د موآب ټول مشران ورسره وُو.

⁷بلعام دا پېغام ورکړو : ”د موآب بادشاه زۀ راوستلے يم د شام نه، د نَمرخاتۀ غرُونو نه. هغۀ ووئيل چې، راشه اؤ زما د پاره ووايه. په اِسرائيليانو باندې لعنت ووايه.

⁸زۀ پرې څنګه لعنت وايم چې هغوئ خُدائ پاک نۀ وى لعنتى کړى، چې مالِک خُدائ په څۀ اِلزام نۀ وى لګولے نو زۀ پرې څنګه اِلزام ولګوم؟

⁹د لوړو کاڼو نه زۀ هغوئ ګورم، د غرُونو نه زۀ هغوئ وينم. هغوئ هغه خلق دى چې يواځې ژوند تېروى، هغوئ ته پته ده چې دوئ د نورو قومُونو نه بختور دى.

¹⁰د اِسرائيل اولاد د شګو په شان دے، څوک داسې شته چې شګې وشمېرى؟ پرېږده چې زۀ مړ شم د خُدائ پاک د خلقو په شان، پرېږده چې د صادِقانو په شان په آرام مړ شم.“

¹¹بيا بلق بلعام ته ووئيل، ”دا تا څۀ وکړل؟ ما تۀ د دې د پاره راوستلے يې چې زما په دُښمنانو لعنت ووائې، خو تا د هغوئ د پاره صِرف برکت غوښتلے دے.“

¹²هغۀ جواب ورکړو، ”زۀ به صِرف هغه څۀ وايم څۀ چې مالِک خُدائ ما ته وائى.“

¹³بيا بلق بلعام ته ووئيل، ”زما سره يو بل ځائ ته لاړ شه چې د هغه ځائ نه لږ شان اِسرائيليان ښکارى. اؤ د هغه ځائ نه تۀ په هغوئ لعنت ووايه.“

¹⁴بلق، بلعام د پِسګه د غرۀ په سر د ضُوفيم پټى ته بوتلو. هغۀ هلته هم اووۀ قُربان‌ګاه جوړې کړې اؤ يو غوَيے اؤ يو ګډ يې په هره يوه باندې پېش کړو.

¹⁵بلعام بلق ته ووئيل، ”د خپلې سوزېدُونکې نذرانې سره ودرېږه اؤ هلته به خُدائ پاک ما ته راڅرګند شى.“

¹⁶مالِک خُدائ بلعام ته راڅرګند شو، ورته يې وئيل چې دا خبرې به کوې اؤ واپس يې بلق ته ولېږلو چې هغۀ ته دا پېغام ورسوى.

¹⁷نو هغه واپس لاړو اؤ وې ليدل چې بلق د خپلې سوزېدُونکې نذرانې سره ولاړ وو اؤ د موآب مشران هم ورسره وُو. بلق ترې نه تپوس وکړو چې مالِک خُدائ څۀ وئيلى دى،

¹⁸اؤ بلعام دا پېغام ورکړو : ”د صفور زويه بلقه پاڅه، اؤ چې زۀ درته څۀ وايم هغه واوره.

¹⁹خُدائ پاک د بنيادم په شان نۀ دے، چې دروغ ووائى، هغه بنيادم نۀ دے چې خپله فېصله بدله کړى. هغه چې کُومه وعده وکړى، نو هغه پُوره کوى، هغه چې څۀ وائى، نو هغه کوى.

²⁰ګوره! ما ته حُکم مِلاؤ شو چې د هغوئ د پاره برکت وغواړم، اؤ چې کله خُدائ پاک برکت ورکړى، نو زۀ برکت واپس نۀ شم اخستلے.

²¹زۀ د اِسرائيليانو په راتلُونکى وخت پوهېږم په هغوئ به څۀ بدبختى يا مُصيبت نۀ راځى. مالِک خُدائ د هغوئ خُدائ پاک د هغوئ مل دے، هغوئ اِعلان کوى چې هغه يې بادشاه دے.

²²خُدائ پاک هغوئ د مِصر نه راويستلى دى، هغوئ د يو ځنګلى غوَيى په شان طاقت لرى.

²³نۀ داسې جادُو شته اؤ نۀ داسې کوډې شته، چې د اِسرائيليانو په قوم باندې وشى. خلق به اوس د بنى اِسرائيلو په باره کښې ووائى، ګورئ! خُدائ پاک د هغوئ د پاره څۀ کړى دى.

²⁴د اِسرائيليانو قوم د يو تکړه زمرى په شان دے : چې د شلولو اؤ خرابولو نه مخکښې په آرام نۀ کښېنى، چې تر څو يې د ښکار کړے شوى څيز وينه نۀ وى څښلې.“

²⁵بيا بلق بلعام ته ووئيل، ”تا په اِسرائيليانو باندې د لعنت وئيلو نه اِنکار کړے دے، خو ګوره چې برکت هم ورله ونۀ غواړې!“

²⁶بلعام جواب ورکړو، ”ما تا ته نۀ دى وئيلى څۀ چې زۀ به هم هغه شان کوم څۀ چې مالِک خُدائ ما ته وئيلى دى؟“

²⁷بلق ووئيل، ”ما سره لاړ شه اؤ زۀ به تا يو بل ځائ ته بوځم. کېدے شى چې د خُدائ پاک خوښه وى چې په هغوئ باندې زما د پاره د هغه ځائ نه لعنت ووائې.“

²⁸نو هغۀ بلعام د فعور غرۀ سر ته بوتلو چې صحرا ته مخامخ دے.

²⁹بلعام هغۀ ته ووئيل، ”دلته زما د پاره اووۀ قُربان‌ګاه جوړې کړه اؤ اووۀ غوَيى اؤ اووۀ ګډان ما له راوله.“

³⁰بلق هم هغه شان وکړل چې څنګه يې وئيلى وُو اؤ يو غوَيے اؤ يو ګډ يې په هره يوه قُربان‌ګاه باندې پېش کړل.