Read Pashto Bible (Yusufzai) — د پښتو مقدس کتاب شمېر 24 Bible Online

شمېر 24 - Pashto Bible (Yusufzai) — د پښتو مقدس کتاب bible

شمېر 24

¹نو بلعام ته دا پته ولګېده چې د مالِک خُدائ رضا دا وه چې اِسرائيليانو له برکت ورکړى، نو هغه فال کتلو له لانۀ ړو، لکه چې مخکښې تلے وو. هغه د صحرا په طرف روان شو

²اؤ اِسرائيليان يې وليدل چې قبيله په قبيله يې خېمې لګولې وې. نو د خُدائ پاک رُوح په هغۀ باندې راغلو،

³اؤ هغۀ دا پېغام ورکړو : ”د بلعام د بعور د زوئ دا دے پېغام، اؤ د دې سړى خبرې رېښتُونى دى،

⁴د خُدائ پاک خبرې څوک اورى. په غړېدلو سترګو راباندې جذبه غالبه شوه د قادر خُدائ پاک د طرف نه ما يوه رويا يعنى په ويښه خوب وليدو.

⁵د اِسرائيليانو خېمې ښائسته دى،

⁶د کهجُورو اُوږدو قطارُونو په شان يا د سيند د غاړې د باغُونو په شان، د مالِک خُدائ کَرلى عُود په شان يا د اوبو په غاړه د دِيار په شان.

⁷دا به په اوبو مَړې شى اؤ د دې تُخم په اوبو مړو پټو کښې وکَره. د هغوئ بادشاه به د اجاج نه لوئ وى، اؤ د هغۀ بادشاهى به اُوچته وى.

⁸خُدائ پاک هغوئ د مِصر نه راوويستل، په هغوئ کښې د ځوان غوَيى په شان طاقت شته، هغوئ خپل دُښمنان تباه کوى، د هغوئ هډُوکى ماتوى اؤ په غشو باندې يې وولى.

⁹دا قوم د طاقتور ازمرى په شان دے، کله چې هغه ملاست وى، هيڅ څوک دا زړۀ نۀ شى کولې چې پايې‌څوى. څوک چې اِسرائيليانو د پاره برکت وغواړى نو هغوئ به په خپله برکتناک شى، اؤ څوک چې ورباندې لعنت ووائى نو هغوئ به په خپله لعنتيان شى.“

¹⁰بلق د غُصې نه غاښُونه وچيچل اؤ بلعام ته يې ووئيل، ”ما تۀ د دې د پاره راغوښتلے يې چې زما په دُښمنانو باندې لعنت ووائې، خو ګوره! د لعنت په ځائ تا د هغوئ د پاره درې ځلې برکت غوښتلے دے.

¹¹نو ورک شه اؤ خپل کور ته لاړ شه! زما خيال دا وو چې اِنعام به درکړم، خو مالِک خُدائ دا اِنعام ستا په قسمت کښې نۀ دے ليکلے.“

¹²بلعام ورته په جواب کښې ووئيل، ”کُوم پېغام وړُونکى چې تا ما ته رالېږلى وُو ما هغوئ ته ووئيل چې

¹³کۀ تۀ ما له ستا په محل کښې ټول سرۀ زر اؤ سپين زر هم راکړې، نو زۀ د ځان نه څۀ ښه يا بد نۀ شم کولے، څۀ چې ما ته مالِک خُدائ وائى نو زۀ به صِرف هغه کوم، زۀ د مالِک خُدائ د حُکم نافرمانى نۀ شم کولے.“

¹⁴بلعام بلق ته ووئيل، ”اوس زۀ واپس خپلو خلقو له ځم، خو د تلو نه مخکښې زۀ تا له خبر درکوم چې په راتلُونکى وخت کښې به اِسرائيليان ستا د خلقو سره څۀ کوى.“

¹⁵بيا هغۀ دا پېغام ورکړو : ”د بلعام د بعور د زوئ دا دے پېغام، اؤ د دې سړى خبرې رېښتُونى دى،

¹⁶څوک چې د خُدائ پاک خبرې اورى اؤ هغه حِکمت اخلى چې د خُدائ تعالٰى نه راځى. په غړېدلو سترګو راباندې جذبه غالبه شوه د قادر خُدائ پاک د طرف نه ما يوه رويا وليده.

¹⁷زۀ راتلُونکے وخت وينم، زۀ د اِسرائيليانو قوم وينم. د روښانه ستورى په شان، په دې قوم کښې به يو بادشاه پېدا شى. دا ستورے به د اِسرائيليانو نه راشى. هغه به د موآب مشران هلاک کړى اؤ هغه به د شيث ټول اولاد تباه کړى.

¹⁸هغه به په ادوم کښې په خپلو دُښمنانو بريالے شى اؤ د هغوئ وطن به قبضه کړى، اؤ اِسرائيليان به مسلسل بريالى کېږى.

¹⁹اِسرائيليان به هغوئ د خپو لاندې کړى اؤ په ښار کښې چې څوک ژوندى پاتې وى نو هغه به تباه کړى.“

²⁰بيا بلعام په خپل رويا کښې عمالقيان وليدل اؤ دا پېغام يې ورکړو : ”عمالقيان د ټولو نه زيات تکړه قوم دے، خو په آخِر کښې به د همېشه د پاره ورک شى.“

²¹هغۀ په خپل خيال کښې قينيان وليدل اؤ دا پېغام يې ورکړو : ”ستاسو د اوسېدو ځائ ډېر پوخ دے، داسې پوخ لکه چې د يو کور بُنياد يې په کاڼو ايښودے شوے وى،

²²خو تاسو قينيان به تباه شئ کله چې اسوريان تاسو قېديان بوځى.“

²³بلعام دا پېغام ورکړو : ”هغه څوک بچ کولے شى چې خُدائ پاک يې تباه کوى؟

²⁴سمندرى جهازُونه به د قبرص نه راشى، هغوئ به اسُور اؤ عيبر فتح کړى، خو په آخِر کښې به قبرص هم تباه شى.“

²⁵بيا بلعام روان شو اؤ واپس کور ته لاړو اؤ بلق هم په خپله مخه لاړو.