Read Pashto Bible (Yusufzai) — د پښتو مقدس کتاب شمېر 25 Bible Online

شمېر 25 - Pashto Bible (Yusufzai) — د پښتو مقدس کتاب bible

شمېر 25

¹کله چې اِسرائيليان د کيکرو په وادۍ کښې دېره وُو، نو د موآبيانو ښځو سره يې زنا شروع کړه.

²ښځو هغوئ ته ووئيل چې د هغوئ خُدايانو ته قُربانۍ وکړى، نو خلقو هغه قُربانۍ وخوړلې اؤ د هغوئ د خُدائ عِبادت يې وکړو

³چې د فعور بعل وو. نو مالِک خُدائ اِسرائيليانو ته په قهر شو.

⁴اؤ مُوسىٰ ته يې ووئيل، ”د اِسرائيليانو ټول مشران بوځه اؤ د خلقو په وړاندې يې پهانسى کړه، نو بيا به زما سخته غُصه د اِسرائيليانو نه سړه شى.“

⁵مُوسىٰ د بنى اِسرائيلى قاضيانو ته ووئيل، ”ستاسو هر يو کس به د خپلې قبيلې نه هر هغه سړے وژنئ څوک چې د فعور د بعل عِبادت کوُونکے جوړ شوے وى.“

⁶بيا يو بنى اِسرائيلى يوه ميديانې ښځه د مُوسىٰ اؤ د ټول قوم په مخکښې خپلې خېمې ته دننه بوتله، په هغه وخت کله چې هغوئ د مالِک خُدائ د حضُور خېمې په دروازه کښې ماتم کولو.

⁷نو چې فينحاس، د اِلعازر زوئ اؤ د هارُون نمسى دا وليدل، هغه د ډلې نه پاڅېدو اؤ لاړو. هغۀ نېزه راواخستله،

⁸اؤ په هغه سړى اؤ ښځې پسې خېمې ته ورننوتلو اؤ نېزه يې د هغه سړى اؤ ښځې د خېټې نه بل خوا وويستله. نو داسې هغه وبا بس شوه کُومې چې بنى اِسرائيل تباه کول،

⁹خو وبا څليريشت زره کسان وژلى وُو.

¹⁰مالِک خُدائ مُوسىٰ ته ووئيل،

¹¹”فينحاس زوئ د اِلعازر چې د هارُون اِمام زوئ دے هغۀ زما غُصه د بنى اِسرائيلو د پاره ختمه کړه چې هغوئ کښې هغۀ غېرت وکړو، نو ما د خپل غېرت په وجه بنى اِسرائيل هلاک نۀ کړل.

¹²نو ورته ووايه چې زۀ د هغۀ سره د آمن تړون کوم چې د راتلُونکى ټولو وختُونو د پاره به وى.

¹³هغه اؤ د هغۀ اولاد به د همېشه د پاره اِمامان مُقررولے شى، ځکه چې هغۀ په ما باندې غېرت وکړو اؤ د بنى اِسرائيلو د ګُناه کفاره يې ادا کړه.“

¹⁴کُوم سړے چې د ميديانې ښځې سره وژلے شوے وو د هغۀ نُوم زِمرى وو، هغه د سلُو زوئ وو، چې د شمعُون په قبيلې کښې د يوې کورنۍ مشر وو.

¹⁵د هغه ښځې نُوم کزبى وو. د هغې پلار صور، د ميديانې قبيلې د يوې ډلې مشر وو.

¹⁶مالِک خُدائ مُوسىٰ ته ووئيل،

¹⁷”په ميديانيانو حمله وکړه اؤ هغوئ تباه کړه،

¹⁸د هغه بد عمل په وجه، چې په فعور کښې يې په دهوکه په تاسو باندې عِبادت وکړو اؤ د کزبى په وجه، چې هغه د وبا په وخت په فعور کښې وژلے شوې وه.“