Read Pashto Bible (Yusufzai) — د پښتو مقدس کتاب شمېر 27 Bible Online

شمېر 27 - Pashto Bible (Yusufzai) — د پښتو مقدس کتاب bible

شمېر 27

¹محلاه، نوعاه، حجلاه، مِلکاه اؤ تِرضاه د صِلافحاد لُوڼه وې چې هغه زوئ د حِفر، زوئ د جِلعاد، زوئ د مکير، زوئ د منشه، زوئ د يُوسف وو.

²هغوئ لاړې اؤ د مُوسىٰ، د اِلعازر اِمام، د مشرانو اؤ د ټول قوم په مخکښې د مالِک خُدائ د حضُور د خېمې په خُله کښې ودرېدلې اؤ وې وئيل،

³”زمُونږ پلار په صحرا کښې مړ شو، د هغۀ زامن نشته، خو هغه د قورح د ډلې نه نۀ وو، چا چې د مالِک خُدائ خِلاف بغاوت کړے وو، هغه د خپلې ګُناه په وجه مړ شوے وو.

⁴چې د هغۀ زامن نشته، نو د هغۀ نُوم دې ولې د اِسرائيليانو نه ختم شى؟ مُونږ له هم لکه زمُونږ د پلار د خپلوانو په شان جائيداد راکړئ.“

⁵نو مُوسىٰ د هغوئ مسئله مالِک خُدائ ته پېش کړه،

⁶اؤ مالِک خُدائ هغۀ ته ووئيل،

⁷”د صِلافحاد لُوڼه ټيک وائى، هغوئ له د هغوئ د پلار د خپلوانو په شان جائيداد ورکړه. اؤ د خپل پلار جائيداد دې هغوئ ته مِلاؤ شى.

⁸اؤ تۀ خامخا بنى اِسرائيلو ته ووايه چې د کُوم سړى زوئ نۀ وى اؤ مړ شى، نو د هغۀ لُور ته به جائيداد په ميراث کښې ملاوېږى.

⁹کۀ د هغۀ لُوڼه نۀ وى، نو ميراث به يې د وړُونو وى.

¹⁰کۀ د هغۀ ورُوڼه نۀ وى، نو ترُونه به يې ميراث اخلى.

¹¹کۀ د هغۀ ورُوڼه يا ترُونه هم نۀ وى، نو بيا به د هغۀ نزدې خپلوان د هغۀ ميراث اخلى اؤ دا به د هغوئ د خپل جائيداد په شان وى. بنى اِسرائيل به دا د قانُون په توګه منى، څنګه چې ما، مالِک خُدائ تاسو ته حُکم کړے دے.“

¹²مالِک خُدائ مُوسىٰ ته ووئيل، ”د ابيرام غرُونو ته وخېژه اؤ هغه وطن ته وګوره کُوم چې زۀ بنى اِسرائيلو له ورکوم.

¹³کله چې تۀ هغه وګورې، نو د هارُون په شان به تۀ هم مړ شې،

¹⁴ځکه چې تاسو دواړو د صين په صحرا کښې زما د حُکم نه بغاوت کړے وو. کله چې ټول قوم زما خِلاف په مريبه کښې وغورېدو، د هغوئ په مخکښې تاسو زما مُقدس طاقت څرګند نۀ کړو.“ مريبه په قادِس کښې د صين په صحرا کښې يوه چينه ده.

¹⁵مُوسىٰ مالِک خُدائ ته سوال وکړو،

¹⁶”مالِکه خُدايه تۀ خُدائ پاک يې! هر څيز له ساه ورکوُونکى يې، زۀ دا سوال کوم چې يو داسې سړے مُقرر کړه چې د دې قوم لار ښودنه کوى

¹⁷اؤ په جنګ کښې يې مشرى کوى، نو ستا قوم به د داسې ګډو په شان نۀ وى چې شپُون يې نۀ وى.“

¹⁸مالِک خُدائ مُوسىٰ ته ووئيل، ”د نون زوئ يشوَع بوځه ځکه چې هغه قابِل سړے دے اؤ خپل لاسُونه د هغۀ په سر کېږده چې ستا ذِمه وارۍ حواله شى.

¹⁹هغه د اِلعازر اِمام په مخکښې ودروه اؤ د ټول قوم په مخکښې هغۀ له مشرى ورکړه.

²⁰تۀ هغۀ له څۀ خپل اِختيارات هم ورکړه، چې ټول بنى اِسرائيل د هغۀ فرمانبردارى کوى.

²¹د فېصلې کولو د پاره به هغه د اِلعازر اِمام نه مشوره اخلى اؤ اِلعازر به اُوريم اؤ تميم زما رضا معلُومولو د پاره اِستعالوى. نو اِلعازر به د يشوَع اؤ د بنى اِسرائيلو د ټول قوم په هر څيز کښې لار ښودنه کوى.“

²²مُوسىٰ هم هغه شان وکړل چې څنګه مالِک خُدائ ورته حُکم کړے وو. هغۀ يشوَع، د اِلعازر اِمام اؤ د ټول قوم په مخکښې ودرولو.

²³چې څنګه مالِک خُدائ حُکم کړے وو، مُوسىٰ خپل لاسُونه د يشوَع په سر کېښودل اؤ خپله مشرى يې ورکړه.