Read Pashto Bible (Yusufzai) — د پښتو مقدس کتاب شمېر 30 Bible Online

شمېر 30 - Pashto Bible (Yusufzai) — د پښتو مقدس کتاب bible

شمېر 30

¹مُوسىٰ د بنى اِسرائيلو د قبيلو مشرانو ته دا اصُول وښودل :

²کله چې يو سړے مالِک خُدائ ته د منختې په توګه څۀ څيز ومنى يا سخت قسم وخورى، نو هغه به خپله وعده نۀ ماتوى اؤ خامخا به يې پوره کوى.

³کله چې يوه جينۍ د پلار په کور کښې اوسېږى اؤ منخته ومنى چې يو څيز به مالِک خُدائ له ورکوى يا د څۀ څيز نه د ځان ساتلو وعده وکړى،

⁴هغه به خامخا هغه هر څۀ کوى چې هغې کُومه منخته منلې وى يا يې وعده کړې وى خو کۀ د هغې پلار ترې نه خبر شى اؤ څۀ اِعتراض وکړى نو بيا به يې نۀ پُوره کوى.

⁵خو چې کله يې پلار خبر شى اؤ ورته ووائى چې دا وعده مۀ پُوره کوه، نو د هغې د پاره ضرُورى نۀ ده چې دا وعده پُوره کړى. مالِک خُدائ به هغه معاف کړى، ځکه چې پلار يې د دې د پُوره کولو نه منع کړه.

⁶کۀ يوه ناوادۀ شوې ښځه يوه منخته ومنى، د قصده يا په بې‌خيالې کښې، يا وعده وکړى چې د څۀ څيز نه به ځان ساتى اؤ بيا وادۀ شى،

⁷نو هغې چې کُومه منخته منلې وى يا يې وعده کړې وى نو هغه به خامخا پُوره کوى خو کۀ د هغې خاوند ترې نه خبر شى اؤ څۀ اِعتراض وکړى نو هغه به نۀ پُوره کوى.

⁸خو کۀ خاوند يې خبر شى اؤ د هغه وعدې پُوره کولو نه يې منع کړى، نو د هغې د پاره دا ضرُورى نۀ ده چې دا وعده پُوره کړى. مالِک خُدائ به هغه معاف کړى.

⁹يوه کونډه يا طلاقه ښځه به خامخا خپل قسم پُوره کوى.

¹⁰کۀ يوه وادۀ شوې ښځه يوه منخته ومنى،

¹¹نو هغه به خامخا هغه هر څۀ کوى چې هغې منخته منلې وى. کۀ خاوند يې خبر شى اؤ څۀ اِعتراض وکړى نو بيا به يې نۀ پُوره کوى.

¹²خو کۀ خاوند يې خبر شى اؤ هغه د وعدې پُوره کولو نه منع کړى، نو ضرُورى نۀ ده چې دا وعده پُوره کړى. مالِک خُدائ به هغه معاف کړى، ځکه چې د هغې خاوند د دې قسم د پُوره کولو نه منع کړې ده.

¹³د هغې خاوند دا حق لرى چې هغې له د دې لوظُونو پُوره کولو اِجازت ورکړى يا ورنۀ کړى.

¹⁴خو کۀ، د ورځې د تېرېدو نه پس، هغه د دې قسم نه خبر شى اؤ څۀ اِعتراض ونۀ کړى، نو هغه دې خامخا هغه هر څۀ وکړى چې د څۀ يې قسم يا وعده کړې وى. ځکه چې په کُومه ورځ هغه خبر شو نو څۀ اِعتراض يې ونۀ کړو نو قسم دې خامخا پُوره شى.

¹⁵خو کۀ هغه وروستو قسم نۀ پُوره کوى، نو د قسم د ماتولو په وجه به هغۀ ته د خپلو بدو سزا مِلاؤ شى.

¹⁶دا هغه اصُول دى کُوم چې مالِک خُدائ مُوسىٰ ته وښودل چې د هغه قسمُونو د خوړلو په باره کښې دى چې يوه پېغله چې د خپل پلار په کور کښې اوسېږى يا يې يوه وادۀ شوې ښځه يې وخورى.