Read Pashto Bible (Yusufzai) — د پښتو مقدس کتاب شمېر 34 Bible Online

شمېر 34 - Pashto Bible (Yusufzai) — د پښتو مقدس کتاب bible

شمېر 34

¹مالِک خُدائ مُوسىٰ ته ووئيل

²اؤ د بنى اِسرائيلو د پاره دا اصُول يې ورته وښودل : ”کله چې تاسو کنعان ته ورننوځئ، کُوم وطن چې زۀ تاسو له درکوم، ستاسو د علاقې حدُونه به داسې وى :

³جنُوبى سرحد به د صين صحرا اؤ د عدوم سرحد پورې وى. دا به د نَمرخاتۀ په طرف د مالګې درياب د جنُوبى آخرى سر نه شروع کېږى.

⁴بيا به دا په جنُوب کښې د لړم کنډؤ طرف ته تاؤ وى اؤ د صين صحرا نه واخله تر قادِش برنيع پورې به وى. د هغه ځائ نه به دا سرحد حصر ادار اؤ عصمون ته ورسېږى،

⁵چرته چې دا به د مِصر په سرحد کښې اؤ د مديتران سيند په آخرى سر کښې د وادۍ طرف ته تاؤ وى.

⁶د مديتران سيند به يې د نمرپرېواتۀ سرحد وى.

⁷شمالى سرحد به د مديتران نه شروع کېږى چې د هور غرۀ پورې به وى،

⁸اؤ د هغه ځائ نه د حمات درې پورې به وى اؤ صدد ته به ورسېږى

⁹اؤ زفرون ته به هم ورسېږى اؤ په حصر عينان کښې به ختم شى.

¹⁰د نَمرخاتۀ سرحد به د حصر عينان نه شروع کېږى چې د شفام پورې به وى.

¹¹بيا به دا د عين نَمرخاتۀ طرف رِبله ته ورسېږى اؤ د ګليل ډنډ نَمرخاتۀ غاړې غرُونو ته به ورسېږى،

¹²بيا د اُردن سيند سره د مالګې درياب ته به ورسېږى. دا به ستاسو اؤ د دې نه ګېر‌چاپېره سرحدُونه وى.“

¹³نو مُوسىٰ بنى اِسرائيلو ته ووئيل، ”دا هغه وطن دے چې د پچې اچولو سره به تاسو ته ملاوېږى، هغه زمکه چې مالِک خُدائ نهۀ نيمو قبيلو ته په حواله کړې ده.

¹⁴د روبين اؤ جاد اؤ د منشه نيمې قبيلې ته مخکښې خپل ميراث مِلاؤ شوے دے، چې د هغوئ د کورَنو په مُطابق تقسيم شوے دے.

¹⁵دې دوه نيمو قبيلو ته د اُردن سيند نَمرخاتۀ طرف ته يريحو ته مخامخ خپله زمکه مِلاؤ شوې ده.“

¹⁶مالِک خُدائ مُوسىٰ ته ووئيل،

¹⁷”اِلعازر اِمام اؤ د نون زوئ يشوَع به په خلقو باندې زمکه تقسيم کړى.

¹⁸د هرې قبيلې نه يو يو سړے هم خوښ کړه چې د دې په تقسيمولو کښې د هغوئ مدد وکړى.“

¹⁹دا هغه سړى دى چې مالِک خُدائ خوښ کړل : د يهُوداه قبيلې نه کاليب زوئ د يفُنه، د شمعُون قبيلې نه شلوميئيل زوئ د عميهود، د بنيامين قبيلې نه اليداد زوئ د کسلون، د دان قبيلې نه بُقى زوئ د يجلى، د منشه قبيلې نه حنيئيل زوئ د ايفود، د اِفرائيم قبيلې نه قمواېل زوئ د سِفتان، د زبولون قبيلې نه اليصفن زوئ د فرناح، د يساکار قبيلې نه فلطيئيل زوئ د عزان، د آشر قبيلې نه اخيهود زوئ د شلومى اؤ د نفتالى قبيلې نه فدهيئيل زوئ د عميهود.

²⁹دا هغه کسان دى چې مالِک خُدائ د کنعان په وطن کښې په خلقو باندې د زمکې تقسيمولو د پاره مُقرر کړل.