Read Pashto Bible (Yusufzai) — د پښتو مقدس کتاب شمېر 36 Bible Online

شمېر 36 - Pashto Bible (Yusufzai) — د پښتو مقدس کتاب bible

شمېر 36

¹د جِلعاد قوم د کورَنو مشران، د ماکير زوئ اؤ د منشه نمسے چې د يُوسف زوئ وو، مُوسىٰ اؤ د بنى اِسرائيلو نورو مشرانو له لاړل.

²هغوئ ووئيل، ”صاحِبه! مالِک خُدائ تا ته حُکم درکړے دے چې زمکه د پچې په ذريعه په بنى اِسرائيلو تقسيم کړه. مالِک خُدائ دا حُکم هم کړے دے چې زمُونږ د خپلوان صلفحاد جائيداد د هغۀ لُوڼو له ورکړه.

³خو دا خبره ياده ساته! کۀ هغوئ د بلې قبيلې سړو سره ودُونه وکړل، نو د هغوئ جائيداد به د هغه قبيلې شى اؤ زمُونږ برخه به کمه شى.

⁴د واپس ورکولو په کال کښې، کله چې کُوم جائيداد خرڅ شوے وى اؤ هغه واپس خپل اصلى مالِک ته ملاوېږى، نو د صلفحاد د لُوڼو جائيداد به د همېشه د پاره هغه قبېلې ته ورکړے شى چې په کُومه کښې وادۀ شوې وى اؤ دا به زمُونږ د قبيلې د پاره د تاوان خبره وى.“

⁵نو مُوسىٰ بنى اِسرائيلو ته د مالِک خُدائ دا حُکمونه واورول. هغۀ ووئيل، ”د منشه قبيله چې څۀ وائى هغه ټيک دى،

⁶اؤ مالِک خُدائ وائى چې د صلفحاد لُوڼه آزادې دى چې د چا سره هم وادۀ کول غواړى خو په خپله قبيله کښې به يې کوى.

⁷د يوې بنى اِسرائيلۍ قبيلې جائيداد به بلې قبيلې ته نۀ شى ورکولے.

⁸هره يوه ښځه چې په کُومه بنى اِسرائيلى قبيله کښې ميراث اخلى نو هم د هغه قبيلې د سړى سره به وادۀ کوى. نو داسې ټولو بنى اِسرائيلو ته به د خپل پلار‌نيکۀ په جائيداد کښې ميراث ملاوېږى،

⁹اؤ د يوې قبيلې جائيداد به بلې قبيلې ته نۀ ملاوېږى. هره بنى اِسرائيلى قبيله به خامخا خپله د ميراث زمکه لرى.“

¹⁰نو د صلفحاد لُوڼو، محلاه، تِرضاه، حجله، مَلِکه اؤ نوعه هم هغه شان وکړل چې څنګه مالِک خُدائ مُوسىٰ ته حُکم کړے وو اؤ هغوئ خپلو د ترُونو زامنو سره ودُونه وکړل.

¹²هغوئ د يُوسف زوئ منشه قبيلې په کورَنو کښې ودُونه وکړل اؤ د هغوئ جائيداد د هغوئ د پلار په قبيله کښې پاتې شو.

¹³دا هغه اصُول اؤ قانُون دے کُوم چې مالِک خُدائ د مُوسىٰ په ذريعه د موآب په مېدانُونو کښې د اُردن نه پورې يريحو ته مخامخ بنى اِسرائيلو له ورکړو.