Read Pashto Bible (Yusufzai) — د پښتو مقدس کتاب شمېر 5 Bible Online

شمېر 5 - Pashto Bible (Yusufzai) — د پښتو مقدس کتاب bible

شمېر 5

¹بيا مالِک خُدائ مُوسىٰ ته ووئيل،

²”بنى اِسرائيلو له حُکم ورکړه چې هر هغه څوک چې د جُذام بيمارى لرى يا يې د بدن د يو ځائ نه اوبۀ ځى اؤ هر څوک چې د مړى سره د لګېدلو په وجه ناپاک شوے وى نو هغوئ دې هغه د خېمو نه وشړى.

³نر يا ښځه چې ناپاکه وى نو هغوئ بهر ولېږه، چې خېمې پليتې نۀ کړى، چرته چې زۀ د خپلو خلقو په مېنځ کښې اوسېږم.“

⁴بنى اِسرائيلو هم هغه شان وکړل اؤ داسې خلق يې د خېمو نه بهر کړل.

⁵بيا مالِک خُدائ مُوسىٰ ته ووئيل چې،

⁶”بنى اِسرائيلو ته دا اصُول وښايه. کله چې يو نر يا ښځه د چا خِلاف جُرم وکړى نو هغه د مالِک خُدائ نافرمانى کوى نو هغه کس به قصُوروار وى،

⁷هغه دې خامخا د خپلې ګُناه اِقرار وکړى اؤ چې د چا خِلاف يې جُرم کړے وى نو هغه کس له دې پُوره تاوان ورکړى اؤ شل فى‌صده دې زيات هم ورکړى.

⁸کۀ د مظلُوم کس نزدې خپلوان نۀ وى چې د جُرم تاوان ورته مِلاؤ شى، نو د جُرم تاوان به د مالِک خُدائ په نُوم اِمام له ورکړے شى، د دې سره به د مُجرم د کفارې د پاره يو ګډ هم وى.

⁹بنى اِسرائيل چې هره يوه خاص برخه مالِک خُدائ ته پېش کوى نو هغه به د اِمام وى.

¹⁰هر يو اِمام هغه ټولې نذرانې د ځان د پاره ساتلے شى چې کُومې ورکړے شوى وى.

¹¹بيا مالِک خُدائ مُوسىٰ ته حُکم وکړو

¹²چې بنى اِسرائيلو ته دا اصُول وښائى : کۀ يو سړے شکمن شى چې خپلې ښځې ورسره بې وفائى کړې ده اؤ د بل سړى سره يې زنا کړې ده اؤ د خپل ځان بې عِزتى يې کړې ده، خو کۀ د خاوند يقين پوخ نۀ وى، او کېدے شى چې د هغۀ ښځې دا خبره پټه ساتلې وى، ګواه هم نۀ وى اؤ په دې کار پورې نيولے شوې هم نۀ وى، يا داسې وشى چې يو خاوند په خپله ښځه باندې هسې شکمن شى، کۀ هغې بې وفائى هم نۀ وى کړې.

¹⁵په داسې دواړو حالتُونو کښې سړے به خپله ښځه اِمام له بوځى. هغه به يو کيلو د اوربشو اوړۀ هم يوسى، خو هغه به په دې باندې د زيتُونو تېل نۀ اچوى اؤ نۀ به ورباندې خوشبوئى اچوى، ځکه چې دا نذرانه د شکمن خاوند د طرف نه ده، دا د دې د پاره پېش کېږى چې حقيقت څرګند شى.

¹⁶اِمام به هغه ښځه وړاندې راولى اؤ د مالِک خُدائ د قُربان‌ګاه په مخکښې به يې ودروى.

¹⁷هغه به په کنډول کښې څۀ مُقدسې اوبۀ واچوى اؤ د مالِک خُدائ د حضُور مُقدسې خېمې د دربار نه به لږه خاوره واخلى اؤ په اوبو کښې به يې واچوى چې ترخې شى.

¹⁸بيا به هغه د ښځې وېښتۀ خوارۀ کړى اؤ د اوړو نذرانه به د هغې په لاس کښې کېږدى. اِمام به هغه جام په خپلو لاسُونو کښې ونيسى چې ترخې اوبۀ په کښې دى. دا د دې د پاره چې په هغه کس باندې لعنت راولى چې کُوم ګُناهګار وى.

¹⁹بيا به اِمام هغه ښځه دې ته راضى کړى چې داسې قسم وخورى : ”کۀ تا زنا کړې نۀ وى، نو چې دا اوبۀ کُوم لعنت راولى نو هغه به تا ته نُقصان نۀ رسوى.

²⁰خو کۀ تا زنا کړې وى،

²¹نو مالِک خُدائ دې ستا نُوم ستا په خلقو کښې لعنتى کړى. تا دې شنډه کړى اؤ ستا خېټه دې وپړسوى.

²²دا اوبۀ به ستا خېټې ته ننوځى اؤ ستا خېټه دې وپړسوى اؤ تا دې شنډه کړى.“ نو ښځه به په جواب کښې داسې ووائى، ”آمين! هم داسې دې وشى.“

²³بيا به اِمام دا لعنت په يو کاغذ باندې وليکى اؤ دا ليکل به د ترخو اوبو په جام کښې ووينځى.

²⁴د هغې نه مخکښې چې په ښځه باندې دا اوبۀ وڅښى، چې په هغې باندې سخت درد راولى،

²⁵اِمام به د ښځې د لاسُونو نه د اوړو د شک نذرانه واخلى، مالِک خُدائ ته وقف کولو د پاره به يې پورته کړى اؤ په قُربان‌ګاه باندې به يې پېش کړى.

²⁶بيا به اِمام د دې نه يو مُوټے واخلى، دا به د نذرانې د يوې نښې په شان وى اؤ په قُربان‌ګاه باندې به يې وسوزوى. په آخِر کښې به هغه په ښځه باندې اوبۀ وڅښوى.

²⁷کۀ هغې زنا کړې وى، نو اوبۀ به په هغې باندې سخت درد راولى، د هغې خېټه به وپړسېږى اؤ هغه به شنډه شى. د هغې نُوم به په خپلو خلقو کښې لعنتى شى.

²⁸خو کۀ هغه بې‌ګُناه وى، نو نُقصان به ورته نۀ رسېږى اؤ د هغې به بچى پېدا شى.

²⁹دا قانُون د داسې واقعو د پاره دے کۀ چرى يو سړے غېرت وکړى اؤ شکمن شى چې د هغۀ ښځې زنا کړې ده. ښځه به د مالِک خُدائ په حضُور کښې د قُربان‌ګاه په مخکښې ودرولے شى اؤ اِمام به دا رسم ادا کړى.

³¹خاوند به د ګُناه نه خلاص وى، خو کۀ ښځه ګُناهګاره وى، نو هغې ته به خامخا د خپلو بدو سزا مِلاؤ شى.