Read Pashto Bible (Yusufzai) — د پښتو مقدس کتاب شمېر 8 Bible Online

شمېر 8 - Pashto Bible (Yusufzai) — د پښتو مقدس کتاب bible

شمېر 8

¹بيا مالِک خُدائ مُوسىٰ ته ووئيل چې،

²”هارُون ته ووايه چې کله هغه اووۀ ډيوې په ډيوټ باندې ږدى، نو هغه به يې داسې ږدى چې د ډيوټ مخې ته رڼا ورکوى.“

³هارُون هم هغه شان وکړل اؤ ډېوې يې داسې کېښودې چې د ډيوټ مخې ته رڼا وه.

⁴د سر نه تر بېخه پورې ډيوټ د ټکولو شوو سرو زرو نه جوړ وو، هم د هغې نقشې په مُطابق چې مالِک خُدائ مُوسىٰ ته ښودلې وه.

⁵بيا مالِک خُدائ مُوسىٰ ته ووئيل،

⁶”ليويان د نورو بنى اِسرائيلو نه جُدا کړه اؤ هغوئ پاک کړه،

⁷طريقه دا ده : په هغوئ باندې د پاکوالى اوبۀ وشينده اؤ هغوئ ته ووايه چې ټول بدن کل کړى اؤ خپلې جامې ووينځى. نو هغوئ به پاک شى.

⁸بيا يو څخے اؤ د غلې نذرانې د پاره اوړۀ چې د زيتُونو تېل ورسره ګډ وى دا به هغوئ واخلى، اؤ د ګُناه نذرانې د پاره به تۀ يو بل غوَيے بوځې.

⁹بيا د بنى اِسرائيلو ټول قوم راغونډ کړه اؤ ليويان زما د حضُور خېمې په مخکښې ودروه.

¹⁰بنى اِسرائيل دې خپل لاسُونه د ليويانو په سرُونو کېږدى،

¹¹اؤ بيا به هارُون ليويان د بنى اِسرائيلو نه د خاص تُحفې په توګه ما ته وقف کړى، چې هغوئ زما خِدمت وکړى.

¹²ليويان به بيا خپل لاسُونه د دوو غوَيانو په سرُونو کېږدى، يو به د ګُناه نذرانې په توګه اؤ بل د سوزېدُونکې نذرانې په توګه مالِک خُدائ ته پېش کېږى، د دې د پاره چې د ليويانو کفاره ادا شى.

¹³ليويان ما ته د خاص تُحفې په توګه وقف کړه اؤ هارُون اؤ د هغۀ زامن د هغوئ مشران جوړ کړه.

¹⁴نو ليويان د نورو بنى اِسرائيلو نه جُدا کړه چې هغوئ زما شى.

¹⁵کله چې تۀ ليويان پاک اؤ وقف کړې، نو هغوئ د خِدمت د پاره مُقدسې خېمې ته دننه تلے شى.

¹⁶د بنى اِسرائيلو د ټولو مشرانو زامنو په ځائ ليويان زما دى اؤ هغوئ صِرف زما دى.

¹⁷کله چې ما د مِصر په وطن کښې ټول مشران زامن ووژل، ما د بنى اِسرائيلو د هرې کورنۍ مشر زوئ اؤ هر يو وړومبے پېدا شوے ځناور خپل ځان ته وقف کړو.

¹⁸اوس زۀ د بنى اِسرائيلو د ټولو وړومبو پېدا شوو زامنو په ځائ ليويان اخلم،

¹⁹اؤ ليويان د بنى اِسرائيلو نه د خاص تُحفې په توګه د هارُون اؤ د هغۀ زامنو په حواله کوم چې په مُقدسه خېمه کښې د بنى اِسرائيلو د پاره خِدمت وکړى اؤ هغوئ به د بنى اِسرائيلو د پاره کفاره ادا کوى چې کله هغوئ مُقدس ځائ ته ډېر نزدې راشى نو چې وبا يې هلاک نۀ کړى.“

²⁰نو مُوسىٰ، هارُون اؤ ټولو بنى اِسرائيلو ليويان وقف کړل، هم هغه شان چې څنګه مالِک خُدائ مُوسىٰ ته حُکم کړے وو.

²¹ليويانو خپل ځانُونه پاک کړل اؤ جامې يې ووينځلې اؤ هارُون هغوئ مالِک خُدائ ته د خاص تُحفې په توګه پېش کړل. هارُون د هغوئ د پاره د پاکوالى کفاره ادا کړه.

²²خلقو هم هغه شان وکړل چې څنګه مالِک خُدائ د ليويانو په باره کښې مُوسىٰ ته حُکم کړے وو. نو ليويان په مُقدسه خېمه کښې د خِدمت کولو د پاره د هارُون اؤ د هغۀ زامنو د مشرۍ لاندې لاړل.

²³بيا مالِک خُدائ مُوسىٰ ته ووئيل،

²⁴”د پينځۀ ويشتو کالو عُمر نه واخله هر يو ليوے به زما د حضُور په خېمه کښې خپله د خِدمت ذِمه وارى ادا کوى،

²⁵اؤ چې عُمر يې پنځوس کاله شى نو هغه به نور خِدمت نۀ کوى.

²⁶د هغې نه پس، هغه د خپل هغه ليوى سره مدد کولے شى کُوم چې په خېمه کښې خپله ذِمه وارى ادا کوى، خو په خپله به هيڅ خِدمت نۀ کوى. نو داسې به تاسو ليويانو ته ذِمه وارۍ حواله کوئ.“