Read Pashto Bible (Yusufzai) — د پښتو مقدس کتاب شمېر 9 Bible Online

شمېر 9 - Pashto Bible (Yusufzai) — د پښتو مقدس کتاب bible

شمېر 9

¹د بنى اِسرائيلو د مِصر وطن نه د وتلو نه پس، د دويم کال په اولنۍ مياشت مالِک خُدائ د سينا په بيابان کښې د مُوسىٰ سره خبرې وکړې. مالِک خُدائ ورته ووئيل،

²”د دې مياشتې په څوارلسمه ورځ، د نمرپرېواتو په وخت، بنى اِسرائيل به د ټول قانُون اؤ اصُولو په مُطابق د فسحې اختر کوى.“

⁴نو مُوسىٰ بنى اِسرائيلو ته ووئيل چې هغوئ د فسحې اختر وکړى،

⁵اؤ د اولنۍ مياشتې د څوارلسمې ورځې په ماښام بنى اِسرائيلو د سينا په بيابان کښې هغه هر څۀ وکړل چې څنګه مالِک خُدائ مُوسىٰ له حُکم ورکړے وو.

⁶خو څۀ خلق ناپاک وُو ځکه چې هغوئ د مړى سره لګېدلى وُو اؤ هغوئ په هغه ورځ د فسحې اختر نۀ شو کولے. هغوئ مُوسىٰ اؤ هارُون له لاړل

⁷اؤ ورته يې ووئيل، ”مُونږ ناپاک يُو ځکه چې مُونږ د مړى سره لګېدلى يُو، خو مُونږ د نورو بنى اِسرائيلو سره ولې نۀ شُو شريکېدلے چې مالِک خُدائ ته نذرانه پېش کړُو؟“

⁸مُوسىٰ ورته ووئيل، ”تر هغې پورې صبر وکړئ! چې ما ته د مالِک خُدائ نه ستاسو په باره کښې حُکم مِلاؤ شى.“

⁹نو مالِک خُدائ مُوسىٰ ته ووئيل چې

¹⁰بنى اِسرائيلو ته ووايه، ”کله چې تاسو يا ستاسو اولاد د مړى سره لګېدلو په وجه ناپاک يئ يا په لرې سفر کښې يئ، خو بيا هم د فسحې اختر کول غواړئ،

¹¹نو تاسو ته اِجازت دے چې دا يوه مياشت وروستو وکړئ، يعنې د دويمې مياشتې د څوارلسمې ورځې په ماښام. دا اختر د پتيرې ډوډۍ اؤ ترخو بُوټو سره وکړئ.

¹²د هغه خوراک نه هيڅ هم د بل سحر پورې مۀ پرېږدئ اؤ چې د هغه قُربانۍ د ځناورو هډُوکى مات نۀ کړئ. د فسحې اختر د ټولو اصُولو په مُطابق وکړئ.

¹³خو چې څوک پاک وى اؤ لرې سفر کښې نۀ وى اؤ هغه د فسحې اختر ونۀ کړى، نو هغه به نور زما د خلقو نه نۀ شى ګڼلے، ځکه چې هغۀ ما ته په مُقرر وخت باندې نذرانه پېش نۀ کړه. هغۀ ته به خامخا د خپلې ګُناه سزا مِلاؤ شى.

¹⁴ستاسو سره چې کُوم مُسافر اوسېږى کۀ هغوئ د فسحې اختر کول غواړى، نو هغوئ به دا د ټول قانُون اؤ اصُولو په مُطابق کوى. هر څوک چې د بل وطن وى يا په دې وطن کښې پېدا شوے وى نو د دواړو د پاره يو شان قانُون دے.“

¹⁵په کُومه ورځ چې د مالِک خُدائ د حضُور خېمه ودرولے شوه، نو وريځ راغله اؤ خېمه يې پټه کړه. وريځ به د شپې د اور په شان ښکارېده.

¹⁷چې کله به هم وريځ د خېمې نه اُوچته شوه، نو بنى اِسرائيل به روان شول اؤ بيا به يې په هغه ځائ کښې خېمې ودرولې چرته به چې وريځ راکُوزه شوې وه.

¹⁸بنى اِسرائيلو به د مالِک خُدائ په حُکم خېمې وړلې اؤ د هغۀ په حُکم به يې ودرولې. کُومه پورې به چې وريځ په مُقدسه خېمه باندې ولاړه وه، نو هغوئ به په خپلو خېمو کښې ايسار وُو.

¹⁹کله به چې وريځ په مُقدسه خېمه باندې د ډېر وخت د پاره ولاړه وه، نو هغوئ د مالِک خُدائ حُکم منلو اؤ د هغه ځائ نه به نۀ تلل.

²⁰کله کله به وريځ صِرف يو څو ورځې د خېمې د پاسه ايساره وه، نو په هر حالت کښې، هغوئ د مالِک خُدائ د حُکم په مُطابق په خپلو خېمو کښې ايسارېدل يا به يې سفر کولو.

²¹کله به وريځ صِرف د ماښام نه واخله تر سحره پورې ايساره وه، چې څنګه به وريځ اُوچته شوه نو هغوئ به سفر شروع کړو.

²²کۀ وريځ به دوه ورځې، مياشت، کال، يا زياته د مُقدسې خېمې د پاسه ولاړه وه، نو هغوئ به سفر نۀ کولو، خو چې کله به وريځ اُوچته شوه، نو هغوئ به سفر کولو.

²³کُوم حُکمونه چې مالِک خُدائ د مُوسىٰ په ذريعه ورکړى وُو هغوئ د هغه په مُطابق خېمې ودرولې اؤ وړلې.