Read Pashto Bible (Yusufzai) — د پښتو مقدس کتاب متى 11 Bible Online

متى 11 - Pashto Bible (Yusufzai) — د پښتو مقدس کتاب bible

متى 11

¹کله چې عيسىٰ خپلو دولسو مريدانو ته هدايت ورکول ختم کړل نو بيا هغه د هغه ځائ نه روان شو چې د هغوئ په ښارونو کښې تعليم ورکړى او بيان وکړى.

²کله چې يحيىٰ بپتسمه ورکونکې په قيدخانه کښې د مسيح د کارونو نه خبر شو، نو خپل يو څو مريدان يې وروليږل چې د عيسى نه دا تپوس وکړى چې

³”ولې هغه راتلونکې تۀ يې څهٔ؟ او يا که نه، مونږ د بل چا اِنتظار وکړو؟“

⁴عيسىٰ ورله جواب ورکړو، ”لاړ شئ، څۀ چې تاسو اورئ او ګورئ، هغه يحيىٰ ته ووايئ

⁵چې ړاندۀ بينا کيږى، شل ګرځى، جزاميان پاکيږى، کاڼۀ اورى او مړى بيا ژوندى کيږى او غريبانان ښهٔ زيرے اورى.

⁶او بختور دى هغه څوک چې ما نهٔ آزاروى.“

⁷څۀ وخت چې د يحيىٰ مريدان واپس رُخصت شول نو عيسىٰ خلقو ته د يحيىٰ په حقله دا وفرمائيل، ”تاسو د څۀ ليدلو دپاره بيابان ته تلى وئ؟ يوه لوخه چې باد خوزوله څۀ؟

⁸نو بيا تاسو د څهٔ ليدو له وتلى وئ؟ يو کس چې ښکلى او نرمې جامې يې اچولې وې؟ ګورئ، هغه څوک چې نرمې جامې اچوى هغه په محلونو کښې اوسيږى.

⁹نو بيا تاسو بهر د څهٔ ليدو له وتلى وئ؟ آو، رښتيا چې د يو نبى نه هم څۀ ډير لوئ.

¹⁰دا هغه څوک دے چې د چا په حقله چې ليکلې شوې دى چې، ”ګوره، زهٔ خپل پېغمبر ستا نه وړاندې ليږم چې ستا مخى ته لاره تياره کړى.“

¹¹زهٔ تاسو ته دا وايم د زمکى په مخ بل څوک د يحيىٰ بپتسمه ورکونکې نه لوئ نِشته خو بيا هم د خُدائ په بادشاهۍ کښې د ټولو نه کمزورې کس د هغۀ نه لوئ دے.

¹²د بپتسمه ورکونکى يحيىٰ د راتلو د ورځو نه پس لا تر اوسه د آسمان په بادشاهۍ باندې زور کولې شى او زورور يې په زور رانيسى.

¹³ځکه چې د يحيىٰ د راتلو نه وړاندې ټولو نبيانو او د موسىٰ شريعت د دې وخت انتظار کړې وو.

¹⁴نو که تاسو غواړئ چې هغه ومنئ نو هغه په خپله الياس دے څوک چې راتلونکې دے.

¹⁵څوک چې غوږونه لرى نو هغه دې واورى.

¹⁶زۀ د دې پيړۍ مِثال څنګه درکړم؟ دوئ لکه په بازار کښې د ناستو ماشومانو په شان دى چې يو بل ته نارې وهى چې

¹⁷مونږ درته شپيلۍ وغږوله او تاسو ګډ نهٔ شوئ، مونږ درته ځان ووهلو او وير مو وکړو خو تاسو ونهٔ ژړل.

¹⁸ځکه کله چې يحيىٰ روژه په خولهٔ راغلو نو هغوئ وئيل چې هغه پيرى نيولې دے.

¹⁹اِبن آدم په خوړلو څښلو ورته راغلو او دوئ وائى چې دۀ ته ګورئ، يو ګيډور او شرابى، د محصولچيانو او بدکارانو ملګرې. خو بيا هم خلقو ته حکمت په خپلو کارونو کولو صادِق ثابت شو.“

²⁰نو بيا عيسىٰ په توبه نهٔ کولو د هغه ښارونو خلق ملامته کړل چرته چې هغهٔ ډيرې معجزې سرته رسولې وې.

²¹هغۀ وفرمائيل چې ”اَفسوس اَے خورازينه، په تا اَفسوس بيتِ صيدا، ځکه کومې معجزې چې په تا کښې وشوې که چرې دا په صور او صيدا کښې شوې وې نو دوئ به ډير پخوا د ځانه ټاټ تاو کړې وو او په ايرو کښې به يې توبه ايستې وه.

²²خو زۀ تاسو ته دا وايم چې د قيامت په ورځ به د صور او صيدا حال ستاسو د حال نه ښۀ وى.

²³او اَے کفرنحُومه، ولې تۀ دا ګڼې چې ستا مقام به تر آسمانه پورته کړې شې څۀ؟ نه، تۀ به تاترين ته وغورزولې شې. ځکه چې کومې معجزې چې په تا کښې ښکاره کړې شوې، که په سدوم کښې شوې وے نو سدوم به تر ننه آباد وو.

²⁴خو زۀ تاسو ته دا وايم چې د قيامت په ورځ به د سدوم د خلقو حال ستاسو د حال نه ښۀ وى.“

²⁵په هغه وخت عيسىٰ داسې وفرمائيل چې ”اَے پلاره. د آسمان او د زمکې مالِکه. زۀ ستا ثنا او صِفت کوم چې تا دا خبرې د پوهانو او هوښيارو نه پټې کړې او وړو ماشومانو ته دې څرګندې کړې.

²⁶آو، پلاره، دا ستا رضا وه.

²⁷هر څۀ ما ته زما پلار سپارلى دى، او هيڅوک بې د پلاره زوئ نۀ پيژنى، او نه څوک پلار پيژنى بې له زويه او بې له هغوئ نه چې زوئ يې ورته په ګوته کوى.

²⁸اَے تاسو ټول چې خوارى کوئ او پنډ مو دروند دے، ما له راشئ او زۀ به آرام درکړم.

²⁹زما جغ په غاړه کړئ او له ما نه زده کړئ، ځکه چې زۀ په زړهٔ نرم او په روح کښې عاجز يم، او تاسو به په زړهٔ کښې آرام حاصل کړئ.

³⁰ځکه چې زما جغ په وړلو کښې پوست دے او زما پنډ سپک دے.“