Read Pashto Bible (Yusufzai) — د پښتو مقدس کتاب متى 15 Bible Online

متى 15 - Pashto Bible (Yusufzai) — د پښتو مقدس کتاب bible

متى 15

¹بيا د فريسيانو او د شرعې د عالمانو يوه ډله د يروشلم نه عيسىٰ ته راغله او دا تپوس يې ترې وکړو چې

²”ستا مريدان ولې پخوانى رسمونه ماتوى او دوئ چې څنګه د روټۍ نه وړاندې لاسونه وينځل په کار دى نهٔ وينځى؟“

³هغۀ ورته په جواب کښې وفرمائيل چې ”دا تاسو څۀ کوئ چې د خپلو رواياتو د خاطره د خُدائ حکم ماتوئ؟

⁴ځکه چې خُدائ فرمائيلى دى چې د خپل مور او پلار عزت کوئ، او هر څوک چې خپل مور يا پلار ته بد رد وائى هغه دې قتل کړې شى.

⁵خو تاسو خلقو ته دا تعليم ورکوئ چې دا ټيک خبره ده چې که څوک خپل مور او پلار ته دا ووائى چې ستا چې څهٔ په کار وُو هغه ما د خُدائ په نامه درکړل، مطلب دا چې ما د خُدائ په نامه درکړل،

⁶نو هغه نور د مور او پلار د حق نه بيخى بې غمه شو. نو دغه شان تاسو د خپلو رواياتو په وجه د خُدائ حُکمونه منسوخ کوئ .

⁷اے مُنافقانو، يشعياه نبى ستاسو په حقله په رښتيا سره دا پېشګوئې کړې وه، کله چې هغهٔ وفرمائيل چې

⁸دا خلق تش په خولهٔ زما عزت کوى خو زړونه يې رانه ډير لرې دى.

⁹دوئ بې فائدې زما عبادت کوى، ځکه چې دوئ خلقو ته د انسانانو حکمونه د تعليم په ډول ورکوى.“

¹⁰بيا هغهٔ خلقو ته آواز وکړو او وې فرمائيل چې ”زما خبره واورئ او ځان پرې پوهه کړئ.

¹¹څهٔ چې په خولهٔ دننه کيږى په هغې يو کس نهٔ پليتږى، خو په هره هغه خبره پليتږى څهٔ چې د هغهٔ د خولې نه راوځى.“

¹²بيا مريدان عيسىٰ له راغلل او وې وئيل چې ”تۀ خبر يې چې فريسيانو ستا دا خبرې بدې ګڼلى دى؟“

¹³هغۀ جواب ورکړو چې ”هر يو بوټې چې زما آسمانى پلار لګولې نۀ وى هغه به د بيخه وويستلې شى.

¹⁴د دوئ پرواه مهٔ کوئ. دا ړاندۀ لارښودونکى دى، نو که چرې يو ړوند بل ړوند ته لارښوونه کوى نو دواړه به په کنده کښې وغورزيږى.“

¹⁵بيا پطروس ووئيل چې ”مونږ ته دا مِثال تشريح کړه.“

¹⁶عيسىٰ جواب ورکړو، ”ولې تاسو هم لا تر اوسه د نورو په شان ناپوهه يئ؟

¹⁷ولې تاسو دا نهٔ وينئ چې کوم څيز چې په خولهٔ دننه شى، خيټې ته لاړ شى او بيا هغه د بدن نه بهر وځى؟

¹⁸خو چې څهٔ په خولې وئيلې شى هغه د زړۀ نه راوځى او دغه خبرې دى چې انسان پليتوى.

¹⁹ځکه چې ټول وران خيالونه، لکه قتل، زنا، حرامکارى، غلا، د دروغو ګواهى او غيبت د زړۀ نه راوزى.

²⁰او دا هغه کارونه دى چې انسان پليتوى، خو په ناوينځلو لاسونو باندې په خوراک کولو، انسان نۀ پليتيږى.“

²¹بيا عيسىٰ هغه ځائ پريښودو او د صور او د صيدا علاقې ته راغلو

²²او د هغې علاقې يوه کنعانى ښځه بهر راووتله او په چغه يې ووئيل، ”اَے مالِکه، په ما رحم وکړه. اَے د داؤد زويه، زما لور پيريانو سخته نيولې ده.“

²³خو هغۀ هيڅ جواب ورنۀ کړو. د هغۀ مريدان راغلل او زارى يې وکړه چې ”دا ښځه لرې کړه ځکه چې په مونږ پسې بې واره چغې وهى.“

²⁴عيسىٰ جواب ورکړو ”زۀ صرف د بنى اِسرائيل د خاندان د ورکو شوو ګډو دپاره راليږلې شوې يم.“

²⁵خو هغه ښځه راغله، د دۀ په پښو پريوته او چغې يې کړې، ”مالِکه، زما مدد وکړه.“

²⁶عيسىٰ په جواب کښې وفرمائيل، ”دا مناسب نۀ دى چې د ماشومانو برخه روټۍ دې څوک واخلى او سپو ته دې واچوى.“

²⁷هغې جواب ورکړو چې ”آو مالِکه، خو بيا سپى هم هغه ټوکړې خورې کومې چې د مالِکانو د دسترخوان نه وغورزيږى.“

²⁸نو بيا عيسىٰ جواب ورکړو چې ”تهٔ څومره د لوئ ايمان لرونکې ښځه يې، نو څنګه چې تۀ غواړې، هغه شان دې وشى.“ او هم په هغه ساعت د هغې لور جوړه شوه.

²⁹کله چې عيسىٰ د دغه ځايه د ګليل درياب په غاړه روان شو نو هغه بيا غرهٔ ته بره لاړو او هلته کښيناستو

³⁰نو ډير خلق ورته راغلل چې ورسره ګوډيان، ړاندهٔ، شليان، ګونګيان، او نور ډير بيماران وُو. او هغوئ هغه خلق د عيسىٰ پښو ته څملول او هغۀ هغوئ روغ کړل.

³¹هغه خلق په دې ډير حيران شول چې چاړاګانو خبرې وکړلې، مات ګوډ خلق روغ شول او ګرځيدل او ړاندۀ بينا شول او ټولو په دې د بنى اِسرائيلو د خُدائ لوئى بيان کړه.

³²عيسىٰ خپل مريدان راوبلل او ورته يې وفرمائيل چې ”په دې خلقو زما زړۀ سوزى، دوئ د دريو ورځو راسې زما سره دى او د خوراک دپاره ورسره هيڅ نشته. زۀ دوئ اوږى رخصتول نۀ غواړم، هسې نه چې په لاره کښې بې هوشه شى.“

³³مريدانو جواب ورکړو چې ”په دې خوشى بيابان کښې به دومره خلقو له مونږ روټۍ د کومه راوړو؟“

³⁴عيسىٰ ورته وفرمائيل چې ”تاسو سره څو روټۍ دى؟“ هغوئ جواب ورکړو چې ”اووۀ روټۍ او يو څو واړۀ کبان.“

³⁵نو عيسىٰ خلقو ته وفرمائيل چې په زمکه کښينئ.

³⁶نو هغه اُووۀ روټۍ او کبان يې راواخستل، او د خُدائ شُکر يې پرې وويستو، روټۍ او کبان يې ټوکړې کړل او مريدانو ته يې ورکړل، او مريدانو په خلقو وويشل.

³⁷ټولو ځانونه ښۀ ماړۀ کړل. او چې څۀ ټوکړې ترې پاتې شوې نو هغه يې راټولې کړلې. هغه دومره وې چې اووۀ غټې ټوکرۍ ترې ډکې شوې.

³⁸د بچو او ښځو نه علاوه څلورو زرو کسانو هغه روټۍ وخوړه.

³⁹هغۀ بيا خلق رُخصت کړل، کِشتئ ته وختلو او د مګدن علاقې ته لاړو.