Read Pashto Bible (Yusufzai) — د پښتو مقدس کتاب متى 17 Bible Online

متى 17 - Pashto Bible (Yusufzai) — د پښتو مقدس کتاب bible

متى 17

¹شپږ ورځې پس عيسىٰ د ځان سره پطروس يعقوب او د هغۀ ورور يوحنا يو اوچت غرهٔ ته وخيژول.

²او د هغوئ په وړاندې د هغۀ شکل بدل کړې شو او د هغۀ مخ لکه د نمر وځليدو او د هغۀ جامې لکه د رڼا سپينې شوې.

³نو ناګهانه هغوئ ته موسىٰ او الياس ښکاره شُو چې د هغۀ سره يې خبرې کولې.

⁴نو پطروس عيسىٰ ته ووئيل چې، ”مالِکه، زمونږ دپاره دلته پاتې کيدل ښهٔ دى. که تهٔ غواړې نو زۀ به دلته درې جونګړى، يوه ستا دپاره، يوه موسىٰ دپاره او يوه الياس دپاره جوړه کړم.“

⁵هغۀ لا دا خبرې کولې چې ناګهانه يوه پړقيدنکې وريځ راخوره شوه او په هغوئ يې سورې وکړو او د وريځې نه آواز وفرمائيل، ”دا زما محبوب زوئ دے د چا نه چې زۀ راضى يم. د هغۀ خبرې واورئ.“

⁶د دې آواز په آوريدو مريدان د ويرې نه پړمخې پريوتل.

⁷خو بيا عيسىٰ هغوئ ته ورغلو، په هغوئ يې لاس ولګوو او ورته يې وفرمائيل، ”پاڅئ، مه يريږئ،“

⁸او کله چې هغوئ بره نظر واچولو نو څوک يې هم ونهٔ ليدل خو صرف عيسىٰ د هغوئ سره ولاړ وو.

⁹نو کله چې هغوئ د غرۀ نه راکوزيدل نو عيسىٰ هغوئ ته حکم ورکړو چې ”د دې رويا په حقله تر هغې چا ته څهٔ مه وايئ تر څو چې اِبن آدم د مړو نه بيا ژوندې پورته کړې شوې نهٔ وى.“

¹⁰نو مريدانو د هغهٔ نه تپوس وکړو چې ”بيا زمونږ د شرعې عالمان داسې ولې وائى چې الياس به ضرور وړومبې راځى؟“

¹¹هغۀ ورته وفرمائيل چې، ”آو، الياس به راځى او هر څۀ به سموى.

¹²خو زۀ تاسو ته وايم چې الياس خو راغلې دے، خو هغوئ نهٔ دے پيژندلې او څۀ چې دوئ غوښتل ورسره يې وکړل. او دغه شان به اِبن آدم هم د هغوئ د لاسه ودرديږى.“

¹³بيا مريدان پوهه شول چې هغه د بپتسمه ورکوونکى يحيىٰ په باب کښې فرمائى.

¹⁴کله چې هغوئ خلقو ته واپس راغلل نو يو سړے عيسىٰ ته راغلو، د هغۀ په وړاندې په ګونډو شو

¹⁵او وې وئيل، ”مالِکه، زما په زوئ رحم وکړه. په هغهٔ مِرګى راځى او ډير يې زوروى کله يې په اور او کله يې په اوبو کښې غورزوى.

¹⁶ما هغه ستا مريدانو ته راوستو خو هغوئ روغ نهٔ کړې شو.“

¹⁷عيسىٰ جواب ورکړو، ”اَے بې ايمانه او بدکاره پيړۍ، زۀ به ترڅو تاسو سره يم او زهٔ به ترڅو تاسو زغمم؟ هغه ما له دلته راولئ.“

¹⁸بيا عيسىٰ هغه پيرے ورټلو نو هغه يې پريښودو او سمدستى هغه هلک روغ شو.

¹⁹د دې نه پس مريدان عيسىٰ ته ځان له راغلل او تپوس يې وکړو چې ”دا مونږ ولې نۀ شو شړلې؟“

²⁰هغۀ جواب ورکړو چې ”ځکه ستاسو ايمان ډير کمزورې دے. زۀ تاسو ته دا وايم، که ستاسو ايمان د شړشمو د تخم هومره هم وى نو چې تاسو دې غر ته ووايئ چې دلته نه هلته لاړ شه، نو هغه به روان شى. او هيڅ کار به ستاسو دپاره ناممکن نۀ وى.“

²²کله چې هغوئ په ګليل کښې يو ځائ وُو نو عيسىٰ ورته وفرمائيل چې ”اِبن آدم به د دشمنانو لاسونو ته حواله کړې شى.

²³هغوئ به دے قتل کړى، په دريمه ورځ به هغه بيا راژوندې شى.“ نو په دې اوريدو هغوئ ډير غمژن شول.

²⁴کله چې دوئ کفرنحُوم ته راغلل نو د خُدائ د کور خزانچى پطروس له راغلو او تپوس يې ترې وکړو چې ”ولې ستا استاذ د خُدائ د کور محصُول ورکوى څۀ؟“

²⁵پطروس ورته ووئيل چې ”هغه يې ورکوى.“ خو کله چې پطروس دننه لاړو نو عيسىٰ د هغۀ د وينا نه وړاندې وفرمائيل چې ”اَے شمعونه، تهٔ په دې باره کښې څۀ وايې چې د دُنيا بادشاهان د چا نه محصُول او ماليه اخلى، د خپلو خلقو نه که د پردو نه؟“

²⁶پطروس جواب ورکړو چې ”د پردو نه.“ عيسىٰ وفرمائيل، ”نو بيا خو د دوئ خپل خلق معاف دى.

²⁷خو هرکله چې مونږ بد نۀ خوښوو نو تۀ لاړ شه، د درياب په اوبو کښې کُنډه واچوه او کوم کب چې تهٔ اول ونيسې، د هغۀ خولهٔ کولاو کړه، نو تۀ به په کښې يوه د سپينو زرو سيکه ومومې. هغه يوسه او ور يې کړه، دا به زما او ستا دواړو محصُول پوره کړى.“