Read Pashto Bible (Yusufzai) — د پښتو مقدس کتاب متى 2 Bible Online

متى 2 - Pashto Bible (Yusufzai) — د پښتو مقدس کتاب bible

متى 2

¹د هيروديس بادشاه په ورځو کښې د يهوديه په بيتُ لحم کښې عيسىٰ پېدا شو. د هغۀ د پېدايښت نه پس يروشلم ته د نمر ښاتۀ طرف نه د ستورو علم لرونکى راغلل

²او وئيل يې چې، ”هغه د يهُوديانو بادشاه کيدونکې ماشوم چې پېدا شوې دے چرته دے؟ ځکه چې مونږ د نمرخاتۀ نه د هغۀ ستورې په راختو ليدلې دے او هغۀ ته سجده کولو له راغلى يُو.“

³هيروديس بادشاه او د يروشلم ټول خلق په دې اوريدو سره پرېشانه شول.

⁴هغۀ د يهُوديانو ټول مشران اِمامان او د شرعې عالمان راوبلل او د هغوئ نه يې دا تپوس وکړو چې، ”مسيح به چرته پېدا کيږى؟“

⁵هغوئ ووئيل چې، ”د يهوديه په بيتُ لحم کښې.“ او هغوئ د هغې پېشګويۍ حواله ورکړه چې په کښې د نبى په وسيله ليکلې شوى دى چې،

⁶”اَے د يهوداه د زمکې بيتُ لحم ښاريې. تۀ د يهوداه په لويو ښارونو کښې هيڅکله هم ورکوټې نۀ يې، ځکه چې ستا نه به هغه سردار راوځى چې زما د خلقو بنى اِسرائيلو شپون به وى.“

⁷هيروديس بيا د ستورو علم لرونکى په پرده کښې راوبلل او د ستورى د راختو وخت يې ترې معلوم کړو.

⁸هغۀ بيا دوئ بيتُ لحم ته وليږل او ورته يې ووئيل چې، ”لاړ شئ او د هغه ماشوم په باره کښې پوره پوره تلاش وکړئ، او چې يې بيامومئ نو ما خبر کړئ چې زۀ هم ورشم او ورته سجده وکړم.“

⁹د بادشاه په حُکم هغوئ روان شول او هغه ستورې چې دوئ په راختو ليدلې وو د دوئ په وړاندې روان وو او آخر په هغه ځائ ودريدو چرته چې ماشوم پروت وو.

¹⁰هغوئ د ستورى په ليدو ډير زيات خوشحاله شول.

¹¹کور ته په ننوتو يې ماشوم د خپلې مور مريم په غيږ کښې وليدو او ورته په سجده پريوتل. پس له هغې يې خپلې تيلۍ پرانستې او هغۀ ته يې نذرانې پېش کړې چې په کښې سرۀ زر، او د خوشبويئ دپاره لوبان او د مُر چيړ وُو.

¹²خُدائ هغوئ ته په خوب کښې دا خبردارې ورکړو چې هيروديس بادشاه له واپس مه ځئ، نو هغوئ بيا په بله لار خپل مُلک ته واپس شول.

¹³کله چې هغوئ رُخصت شول نو يوسف ته د خُدائ يوه فرښته په خوب کښې راغله او ورته يې ووئيل چې، ”پاڅه، ماشوم او مور يې د ځان سره کړه او مِصر ته هِجرت وکړه، او تر هغې هلته ايسار شه چې زۀ درته ووايم، ځکه چې هيروديس د دې ماشوم په تلاش کښې دے چې قتل يې کړى.“

¹⁴نو يوسف د خوبه بيدار شو او شپه په شپه يې ماشوم او د هغۀ مور مِصر ته بوتلل،

¹⁵او هلته د هيروديس تر مرګه پورې ايسار وو. دا د خُدائ هغه وينا پوره کول وُو چې هغۀ د نبى په وسيله فرمائيلى وُو چې، ”ما خپل زوئ د مِصر نه راوبللو.“

¹⁶هر کله چې هيروديس د ستورو علم لرونکو په دوکه پوهه شو نو سخت په قهر شو او حُکم يې وکړو چې د بيتُ لحم او د خوا او شا هغه ټول ماشومان چې عُمر يې دوه کاله يا د دې نه کم وى، قتل يې کړئ. د ستورو علم لرونکو د وينا په مطابق هغهٔ دا د وخت اندازه لګولې وه.

¹⁷دغه رنګ هغه پېشګوئې چې د يرمياه پېغمبر په وسيله شوې وه پوره شوه چې،

¹⁸”په راما کښې د چغو آواز واوريدلې شو، د لوئ ماتم او ژړا آواز. راحيل په خپلو بچو ژړا کوى، هيڅ قسم تسلې نهٔ قبلوى ځکه چې د هغې ماشومان مړهٔ شوى دى.“

¹⁹نو د هيروديس د مرګ نه وروستو، د خُدائ فرښته په مِصر کښې يوسف ته په خوب کښې راغله او ورته يې وفرئيل چې،

²⁰”پاڅه! ماشوم او مور يې د ځان سره کړه او د دوئ سره د بنى اِسرائيلو مُلک ته لاړ شه، ځکه چې د چا نه چې د دې ماشوم سر ته خطره وه هغه مړ شوې دے.“

²¹نو هغه پاڅيدو، ماشوم او مور يې د ځان سره روان کړل او د بنى اِسرائيلو مُلک ته راغلل.

²²خو کله چې يوسف دا واوريدل چې د خپل پلار هيروديس په ځائ ارخلاوس د يهوديه بادشاه شوې دے، نو هلته د تللو نه وويريدو. نو کله چې بيا په خوب کښې ورته دا خبردارې ورکړې شو نو هغه د ګليل علاقې ته لاړو،

²³هلته هغه په ناصرت نومې ښار کښې ديره شو. دا د نبيانو په وسيله د وئيلې شوې هغه پېشګوئې تر سره کول وُو چې، ”هغۀ ته به ناصرى وئيلې شى.“