Read Pashto Bible (Yusufzai) — د پښتو مقدس کتاب متى 23 Bible Online

متى 23 - Pashto Bible (Yusufzai) — د پښتو مقدس کتاب bible

متى 23

¹عيسىٰ بيا خپلو مريدانو او خلقو ته داسې خبرې وکړلې چې

²”د شرعې عالمان او فريسيان د موسىٰ په ګدئ ناست دى،

³نو هر څۀ چې دوئ تاسو ته وائى هغه کوئ د هغوئ خبرو ته غوږ نيسئ، خو د هغوئ په شان کارونه مهٔ کوئ ځکه چې دوئ وائى يو څۀ او کوى بل څۀ.

⁴دوئ مذهبى درانۀ پيټى تړى او د خلقو په اوږو يې باروى خو دا نۀ غواړى چې يو ته د اوچتولو دپاره خپله ګوته هم وروړى.

⁵دوئ چې هر څۀ کوى دا د خلقو د ليدو دپاره کوى. هغوئ خپل تعويذونه غټ جوړوى او د خپلو چوغو ځونډى لويوى.

⁶دوئ په دعوت کښې خاص ځايونه خوښوى او په عبادت خانو کښې د مشرۍ کرسئ،

⁷او په بازارونو کښې د عزت په سلامونو ډير خوشحاليږى چې د استاذ په نامه ياد شى.

⁸خو تاسو ته دې څوک استاذ ونۀ وائى ځکه چې ستاسو خو يو استاذ شته او تاسو ټول وروڼه يئ.

⁹په دې دُنيا هيچا ته پلار مه وايئ ځکه چې ستاسو خو يو پلار شته او هغه په آسمان کښې دے.

¹⁰او تاسو ته دې څوک استاذ ونۀ وائى ځکه چې ستاسو يو استاذ شته او هغه مسيح دے.

¹¹په تاسو کښې دې د ټولو نه لوئ ستاسو خادم وى.

¹²او هر هغه څوک چې ځان اُوچتوى، هغه به عاجز شى او هر هغه څوک چې ځان عاجز کړى، هغه به اُوچت کړې شى.“

¹³خو په تاسو دې افسوس وى، اے د شرعې عالمانو، فريسيانو ځکه چې سخته سزا ستاسو دپاره مقرر شوې ده. اے مُنافقانو، ځکه چې تاسو د آسمان د بادشاهۍ دروازې د خلقو دپاره بندوئ. او تاسو نۀ په خپله په کښې ورننوځئ او نۀ ورته نور خلق پريږدئ .

¹⁵اَے د شرعې عالمانو، فريسيانو. مُنافقانو، ځکه چې تاسو په زمکه او سمندر سفر کوئ د دې دپاره چې يو کس خپل دين ته راواړوئ او کله چې هغه راواړوئ نو تاسو هغه د خپل ځان نه دوه چنده دوزخى جوړ کړئ لکه څنګه چې تاسو يئ.

¹⁶اے ړندو لارښوونکو، په تاسو دې افسوس وى، ځکه چې تاسو وايئ چې که څوک د خُدائ په کور قسم وخورى نو دا څهٔ خبره نهٔ ده، خو که چرته يو کس د هغهٔ په سرو زرو قسم وخورى، نو هغه د خپل قسم پابند دے.

¹⁷اَے ړندو کم عقلو، په دې دواړو کښې کوم څيز اهم دے، سرۀ زر او که د خُدائ کور چې سرهٔ زر هم پاکوى؟

¹⁸يا تاسو دا وايئ که څوک په قربانګاه قسم وخورى نو هيڅ خبره نۀ ده، خو که څوک د قربانګاه په شکرانې قسم وخورى نو هغه به پابند وى.

¹⁹اَے ړندو، کوم څيز زيات اهم دے، شکرانه که هغه قربانګاه چې شکرانه هم پاکوى؟

²⁰نو هرکله چې څوک په قربانګاه قسم خورى نو هغه په قربانګاه او د هغې په شکرانو دواړو قسم خورى.

²¹څوک چې د خُدائ په کور قسم خورى، نو هغه په هغهٔ او څوک چې هلته اوسى، په دواړو قسم خورى.

²²او څوک چې په آسمان قسم خورى نو دا داسې دى لکه چې هغه د خُدائ په تخت او د خُدائ په ذات باندې قسم خورى.

²³اَے د شرعې عالمانو، فريسيانو، مُنافقانو، په تاسو اَفسوس چې تاسو خو د پودنى د کاږو او د زيرې لسمه حصه ورکوئ خو د شريعت معتبرې خبرې لکه اِنصاف، رحم او وفادارى مو پريښى ده. په اصل کښې په کار دا وُو چې تاسو په دې هم عمل کولے او هغه مو هم نۀ پريښولے.

²⁴اے ړندو لار ښوُونکو، تاسو خو اوبهٔ د ماشى دپاره چڼوئ خو اوښ لواړ تيروئ.

²⁵اَے د شرعې عالمانو، فريسيانو، مُنافقانو، په تاسو افسوس. تاسو خو د کنډول او رکيبئ بهر مخ وينځئ خو دننه مو هغه د لوټ او د خود غرضئ د مال نه ډک کړى وى.

²⁶اَے ړندو فريسيانو، اول د دننه نه کنډول او رکيبئ وينځئ، نو بهر نه به هم وينځلے شى.

²⁷اَے د شرعې عالِمانو، فريسيانو، مُنافقانو، په تاسو اَفسوس. ستاسو مِثال د هغه قبرونو دے چې بهر سپين کړى او ښائسته ښکارى خو دننه د مَړو د هډوکو او د نورې ګندګئ نه ډک وى.

²⁸دغه حال ستاسو هم دے، په ظاهره خو تاسو صادِقان ښکارئ، خو د دننه د منافقت او بې شرعې کارونو نه ډک يئ.

²⁹اَے د شرعې عالمانو، فريسيانو، مُنافقانو، په تاسو اَفسوس چې تاسو د نبيانو زيارتونه جوړوئ او د صادِقانو قبرونه سېنګاروئ

³⁰او دا وايئ چې که چرې مونږ د خپل پلار نيکه په زمانه کښې ژوندى وے نو د نبيانو په قتلولو کښې به شريک شوى نۀ وُو.

³¹دغسې تاسو په ځان ګواهى کوئ چې تاسو د هغو خلقو زامن يئ چا چې نبيان وژلى وُو.

³²نو ځئ او د خپل پلار نيکه نيمګړے کنډول ډک کړئ.

³³اَے مارانو او د مارانو بچو، تاسو به د دوزخ د سزا نه څنګه خلاص شئ؟

³⁴ځکه زۀ تاسو ته نبيان، هوښياران او د خُدائ د لارى عالمان درليږم نو په تاسو کښې به ځينى مړۀ کړى، ځينې به په سولۍ کړى او ځينې به په خپلو عبادت خانو کښې په کروړو ووهى او د يو ښار نه به مو بل ښار ته وشړى.

³⁵دغه شان به په زمکه د ټولو صادقانو د توئ شوې وينې ذمه وارى ستاسو په غاړه وى، د بې ګناه هابيل نه د برکياه د زوئ زکرياه تر وينې پورې، څوک چې تاسو د خُدائ د کور او قربانګاه په مينځ کښې مړ کړو.

³⁶زۀ تاسو ته دا وايم، چې دې پيړئ ته به د دې ټولو سزا ملاويږى.

³⁷اَے يروشليمه، اَے د يروشلم ښاريې چې تۀ نبيان وژنې او رسولان سنګساروې کوم چې تا ته راليږلے شوى دى. ما څو ځله دا ارمان وکړو چې ستا بچى راغونډ کړم، داسې لکه چې چرګه خپل بچى د وزرو لاندې راغونډوى، خو تا دا نۀ غوښتل.

³⁸او اوس وګوره، هغه دے ستاسو کور خوشے او شاړ پاتې کيږى.

³⁹خو بې شکه زۀ تاسو ته دا وايم چې تاسو به تر هغه وخته ما ونۀ وينئ تر څو چې دا ونۀ وايئ چې ”مبارک دے هغه څوک چې د مالِک خُدائ په نوم راځى.“