Read Pashto Bible (Yusufzai) — د پښتو مقدس کتاب متى 28 Bible Online

متى 28 - Pashto Bible (Yusufzai) — د پښتو مقدس کتاب bible

متى 28

¹د سبت ورځ تيره شوه او د اِتوار د ورځې سحر کيدونکے وو چې مريم مګدلينى او هغه بله مريم د قبر ليدو ته راغلې.

²ناګهانه يوه سخته زلزله راغله، د آسمان نه د رب يوه فرښته راکوزه شوه، غار له راغله او هغه کاڼې يې ورغړولو او پرې کښيناسته.

³مخ يې د بريښنا په شان ځليدو او جامې يې لکه د واورو په شان سپينې وې.

⁴څوکيداران يې په ليدو د ويرې نه په لړزيدو شول او لکه د مړو پريوتل.

⁵فرښتې بيا ښځو ته وفرمائيل چې ”مهٔ يريږئ، ما ته پته ده چې تاسو د عيسىٰ ليدو له راغلى يئ څوک چې په سولۍ شوې وو.

⁶هغه دلته نشته، هغه بيا پورته کړې شوې دے لکه څنګه چې هغۀ فرمائيلى وُو. راشئ، هغه ځائ وګورئ چرته چې هغه پروت وو.

⁷نو بيا زر لاړې شئ او د هغۀ مريدان خبر کړئ چې هغه له مړو نه ژوندے پاڅولے شوے دے او ستاسو نه وړاندې ګليل ته روان دے، تاسو به يې هلته ووينئ. څهٔ چې درته ما ووئيل هغه ياد ساتئ.“

⁸هغوئ د قبر نه په هيبت او خوشحالۍ لاړې او په دؤ شوې چې مريدان خبر کړى.

⁹ناڅاپى عيسىٰ په لاره پرې پيښ شو او په هغوئ يې سلام واچولو. هغوئ ورغلې او د هغۀ پښې يې ونيولې او سجده يې ورته وکړله.

¹⁰بيا عيسىٰ هغوئ ته وفرمائيل چې ”يريږئ مه، لاړې شئ او زما وروڼو ته دا پېغام ورکړئ چې هغوئ دې ګليل ته لاړ شى، ما به هلته ووينى.“

¹¹ښځې لا په خپله لار تللې چې ځينې څوکيداران ښار ته ننوتل او مشرانو اِمامانو ته يې ټوله قيصه تيره کړه.

¹²بيا هغوئ مشران راغونډ کړل او صلاح يې وکړه. او مشرانو اِمامانو سپاهيانو ته غټ رشوت ورکړو.

¹³او ورته يې ووئيل چې ”تاسو به دا ووايئ چې د شپې چې مونږ اودۀ شو نو د هغۀ مريدان راغلل او د هغۀ لاش يې پټ کړو.“

¹⁴او ورسره يې دا هم ووئيل چې، ”که دا خبر د ګورنر غوږو ته ورسيدو نو مونږ به د هغۀ سره خبره وکړو او تاسو ته به هيڅ نقصان نۀ درکوى.“

¹⁵نو هغوئ پيسې واخستلې او څۀ چې ورته وئيلے شوى وُو هم هغه شان يې وکړل. دغه قيصه تر نن ورځې په يهُوديانو کښې خوره ده.

¹⁶يوولس مريدان د ګليل هغه غر ته روان شول د کوم چې عيسىٰ ورته د تللو دپاره فرمائيلى وو.

¹⁷کله چې هغوئ هغه وليدو نو ورته په سجده شول خو ځينې شکمن وُو.

¹⁸بيا عيسىٰ ورغلو او ورته يې وفرمائيل چې ”د آسمان او د زمکې ټول اختيار ما ته راکړې شوے دے.

¹⁹ځکه تاسو په زمکه خوارۀ شئ او ټول قومونه زما مريدان کړئ او د پلار، د زوئ او د روحُ القُدس په نامه ورته بپتسمه ورکړئ.

²⁰او دا تعليم ورکوئ چې په هغه ټولو خبرو عمل کوئ چې ما تاسو ته حکم کړې دے. او دا يقين ساتئ چې زۀ به تل او د قيامته پورې تاسو سره يم.“