Read Pashto Bible (Yusufzai) — د پښتو مقدس کتاب متى 3 Bible Online

متى 3 - Pashto Bible (Yusufzai) — د پښتو مقدس کتاب bible

متى 3

¹په دغه ورځو کښې بپتسمه ورکونکې يحيىٰ راغې چې د يهوديه په بيابان کښې يې دا بيان کولو چې،

²”توبه ګار شئ ځکه چې د آسمان بادشاهى نزدې ده.“

³دا هغه څوک دے چې د يشعياه نبى په وسيله يې ذکر شوې دے، يعنې، ”په بيابان کښې د نارې وهونکى آواز دے چې د مالِک خُدائ لاره جوړه کړئ او د هغۀ لارې نېغې کړئ.“

⁴د يحيىٰ جامې د اوښ د وړئ وې او د څرمنې پټۍ يې د ملا نه تړلې وه او مُلخان او ځنګلى شات يې خوراک وو.

⁵د يروشلم، يهوديه، او د اُردن د شا او خوا ټول خلق هغۀ ته راټول شوې وُو.

⁶هغهٔ هغوئ ته د خپلو ګناهونو په اقرار کولو سره د اُردن د سيند په اوبو بپتسمه ورکړه.

⁷خو کله چې يحيىٰ وليدل چې ډير فريسيان او صدوقيان د بپتسمې دپاره راځى نو ورته يې ووئيل، ”اَے د مارانو بچو، تاسو ته چا دا خبردارې درکړو چې د راتلونکى غضب نه وتښتئ؟

⁸او داسې کارونه وکړئ چې ورنه ستاسو د توبې ايستلو پته ولګيږى.

⁹تاسو ځان سره داسې سوچ مهٔ کوئ چې ګنې تاسو د اِبراهيم اولاد يئ، ځکه چې زۀ درته دا وايم چې خُدائ د دې کاڼو نه هم د اِبراهيم دپاره اولاد پېدا کولې شى.

¹⁰اوس هم د ونو جرړو ته تبر نيولې شوې دے او هره هغه اونه چې ښه ميوه نۀ نيسى هغه به پرې کړې شى او د اُور لمبو ته به واچولې شى.

¹¹زۀ تاسو له د توبې دپاره په اوبو بپتسمه درکوم خو څوک چې به زما نه وروستو راځى هغه زما نه ډير زورور دے. زۀ د هغۀ د څپلو پورته کولو جوګه هم نۀ يم. هغه به تاسو ته په روحُ القُدس او په اور بپتسمه درکوى.

¹²ښاخئ د هغۀ په لاس کښې ده. هغه به خپل درمند په ښۀ شان پاکوى او غنم به په خپله خمبه کښې جمع کوى، خو بوس به په هغه اور کښې سوزوى چې هيڅ کله نۀ مرى.“

¹³بيا عيسىٰ د ګليل نه د اُردن د سيند خوا له راغلو چې د يحيىٰ نه بپتسمه واخلى.

¹⁴خو يحيىٰ هغه منع کړو او ورته يې ووئيل چې، ”ما ته په کار دى چې زهٔ ستا نه بپتسمه واخلم او تهٔ ما له راغلې؟“

¹⁵عيسىٰ ورته وفرمائيل چې، ”په دې وخت هم داسې کول په کار دى ځکه چې مونږ له دغه شان د خُدائ صداقت پوره کول مناسب دى.“ او بيا يحيىٰ دا ومنله.

¹⁶د بپتسمې نه پس عيسىٰ د اوبو نه سمدستى راوختو او په هغه وخت ورته آسمان کولاو شو او د خُدائ روح يې وليدو چې د کونترې په شکل په هغۀ راکوزيدو.

¹⁷او د آسمان نه يو آواز راغلو چې، ”دا زما خوږ زوئ دے چې زۀ ترې راضى يم.“