Read Pashto Bible (Yusufzai) — د پښتو مقدس کتاب متى 4 Bible Online

متى 4 - Pashto Bible (Yusufzai) — د پښتو مقدس کتاب bible

متى 4

¹روح القُدس هغه وخت عيسىٰ بيابان ته بوتلو چې په اِبليس يې وآزمائى.

²هغۀ څلويښت ورځې او څلويښت شپې روژه ونيوله او په آخر کښې هغه نار نهور شو.

³بيا اِبليس ورغلو او ورته يې ووئيل، ”که تۀ د خُدائ زوئ يې نو دې کاڼو ته ووايه چې روټۍ شى.“

⁴عيسىٰ جواب ورکړو، ”صحيفې وائى چې، بنى آدم تش په روټۍ نۀ پائى خو هغه په هر هغه خبره پائى چې د خُدائ د خولې نه راوځى.“

⁵بيا اِبليس هغه مقدس ښار ته بوتلو او د خُدائ د کور په مناره يې ودرولو

⁶او ورته يې ووئيل چې، ”که تۀ د خُدائ زوئ يې نو خپل ځان دلته نه ښکته وغورزوه، ځکه چې صحيفې وائى چې، هغه به ستا په حقله خپلو فرښتو له حُکم ورکړى، او هغوئ به تا په خپلو لاسونو کښې پورته کړى هسې نه چې په کاڼى تيندک وخورى.“

⁷عيسىٰ جواب ورکړو چې، ”صحيفې دا هم وائى چې، تاسو په خپل مالِک خُدائ آزميښت مه کوئ.“

⁸بيا ابليس هغه د يو ډير اوچت غرهٔ څوکې ته وخيژولو او د دُنيا ټولې بادشاهۍ او د هغې شان او شوکت يې ورښکاره کړل

⁹او ورته يې ووئيل چې، ”دا هر څۀ به تا له درکړم خو که تۀ راته صرف سجده او عبادت وکړې.“

¹⁰خو عيسىٰ ورته وفرمائيل چې، ”ورک شه اِبليس. صحيفې وائى چى، تۀ تش مالِک خُدائ ته سجده کوه او صرف هم د هغهٔ عبادت کوه.“

¹¹نو اِبليس هغه پريښودو او فرښتې راغلې او د هغۀ په خِدمت کښې حاضرې شوې.

¹²هر کله چې عيسىٰ واوريدل چې يحيىٰ ګرفتار شوې دے نو هغه ګليل ته واپس راغلو.

¹³ناصرت يې پريښودو او په کفرنحُوم ښاريې کښې ديره شو چې د درياب په غاړه دے چې د زبولون او نفتالى په سرحد دے.

¹⁴دا د يشعيا نبى خبرې پوره کول وُو يعنې،

¹⁵”د زبولون او د نفتالى علاقه، د درياب طرف ته د اُردن نه په خوا کښې، د غير قومونو ګليل.

¹⁶کوم خلق چې په تيارۀ کښې ناست وُو، هغوئ يوه لويه رڼا وليدله، او څوک چې په زمکه د مرګ په سورى کښې ناست وُو، پرې رڼا وځليدله.“

¹⁷د هغې ورځې نه عيسىٰ دا بيان شروع کړو چې، ”توبه ګار شئ ځکه چې د خُدائ بادشاهى ستاسو مينځ ته راغلى ده.“

¹⁸عيسىٰ د ګليل درياب په غاړه ګرځيدو چې دوه وروڼه يې وليدل، يو شمعون چې د پطروس په نوم ياديږى او د هغۀ ورور اندرياس. هغوئ په درياب کښې جال اچولو ځکه چې هغوئ ماهى ګير وُو.

¹⁹عيسىٰ ورته وفرمائيل چې، ”ما پسې راځئ او زۀ به تاسو آدم ګير جوړ کړم.“

²⁰هغوئ سمدستى خپل جالونه پريښودل او په هغۀ پسې روان شول.

²¹کله چې عيسىٰ د دې ځائ نه په وړاندې لاړو نو دوه وروڼه يې وليدل، يعقوب د زبدى زوئ او د هغۀ ورور يوحنا چې په کشتئ کښې يې د خپل پلار زبدى سره جالونه مرمت کول. هغوئ يې راوبلل.

²²هغوئ سمدستى کشتئ او خپل پلار پريښودل او په هغۀ پسې روان شول.

²³عيسىٰ په ټول ګليل کښې ګرځيدو، د يهُوديانو په عبادت خانو کښې يې تعليم ورکولو او د خُدائ د بادشاهۍ د زيرى بيان يې کولو او د خلقو هر رنځ او بيمارې يې روغوله.

²⁴د هغۀ آوازه په ټول شام کښې خوره شوه او د هر رنځ بيماران چې په عذاب آخته وُو، يعنې هغوئ چې پيريانو نيولى وُو، ميرګو نيولى او شل يې ورله راوستل نو هغۀ روغ کړل.

²⁵ډير خلق ورپسې روان شول چې د ګليل، د دِکپولس، د يروشلم، د يهوديه او د اُردن د پورې غاړې اوسيدونکى وُو.