Read Pashto Bible (Yusufzai) — د پښتو مقدس کتاب مرقوس 15 Bible Online

مرقوس 15 - Pashto Bible (Yusufzai) — د پښتو مقدس کتاب bible

مرقوس 15

¹هر کله چه سحر شو نو مشرانو کاهنانو، دَ شرعے عالمانو اَؤ اولسى مشرانو په صلاح دا فيصله وکړه اَؤ عيسىٰ ئے په ځولنو کښے وتړلو، بيا ئے هغه روان کړو، پيلاطوس ته ئے حواله کړو.

²پيلاطوس دَ هغۀ نه تپوس وکړو چه ”تۀ دَ يهوديانو بادشاه ئے څۀ؟“ هغۀ جواب ورکړو، ”تا په خپله ووے.“

³اَؤ مشرانو کاهنانو په هغۀ ډير اِلزامُونه ولګول.

⁴پيلاطوس دَ هغۀ نه بيا تپوس وکړو، ”آيا تۀ په خپله صفايئ کښے څۀ وينا نۀ لرے؟ تۀ ګورے چه دوئ په تا څومره اِلزامُونه لګوى.“

⁵خو پيلاطوس په دے خبره حيران شو چه عيسىٰ بل هيڅ جواب ورنۀ کړو.

⁶دَ اختر په موقع به دَ حاکم دا دستور وو چه دَ خلقو په خوښه به ئے يو قيدى آزادوو.

⁷په دغه وخت کښے برابا نومے يو مُجرم دَ باغيانو سره په قيد کښے وو چه دَ بغاوت په وخت ئے قتل کړے وو.

⁸کله چه خلق دَ دستور په مُطابق سوال له راغلل نو پيلاطوس جواب ورکړو چه

⁹”تاسو دا غواړئ چه زَۀ دَ يهوديانو بادشاه تاسو ته آزاد کړم؟“

¹⁰ځکه چه هغۀ ته دا پته وه چه هغوئ عيسىٰ تش په حسد هغۀ له راوستے دے.

¹¹خو مشرانو کاهنانو خلق ولمسول چه هغۀ ته ووائى چه ”عيسىٰ نه بلکه برابا راپريږده.“

¹²پيلاطوس بيا هغوئ ته ووئيل چه ”کُوم سړى ته چه تاسو دَ يهوديانو بادشاه وايئ، دَ هغۀ سره څۀ وکړم؟“

¹³هغوئ چغے کړے، ”هغه په سولئ وخيژوه!“

¹⁴پيلاطوس تپوس وکړو چه ”ولے، هغۀ څۀ بد کار کړے دے؟“ خو هغوئ نورے هم چغے تيزے کړے، ”هغه په سولئ وخيژوه!“

¹⁵نو پيلاطوس دَ خلقو دَ تسلئ دَ پاره برابا ور آزاد کړو اَؤ دَ عيسىٰ دَ پاره ئے حُکم وکړو چه په کروړو دِ ووهلے شى اَؤ په سولئ دِ کړے شى.

¹⁶بيا سپاهيانو هغه غولى ته دَ ننه کړو، دَ حاکم دَ قلعه ټوله پلټنه ئے راجمع کړه.

¹⁷عيسىٰ ته ئے سرے جامے واغوستے اَؤ دَ ازغو تاج ئے ور په سر کړو.

¹⁸اَؤ بيا ئے هغۀ ته په دے ټکو سلامى کوله، ”اَئے دَ يهوديانو بادشاه! سلام.“

¹⁹بيا هغوئ هغه په بينت په سرسر وهلو اَؤ تُوکاڼى ئے پرے تُو کړل اَؤ بيا هغۀ ته په ګوډو شول اَؤ دَ ټوقو سجدے ئے ورته وکړلے.

²⁰کله چه هغوئ خپلے ټوقے بس کړلے نو دَ هغۀ نه ئے هغه سرے جامے لرے کړے اَؤ خپلے ئے ورته واچولے. بيا هغوئ هغه بهر ته بوتلوچه په سولئ ئے کړى.

²¹دَ سکندر اَؤ روفوس پلار شمعُون څوک چه دَ کيرينى اوسيدُونکے وو دَ ميرے نه په هغه لاره راتيريدو اَؤ هغوئ هغه په بيګار ونيوو چه دَ عيسىٰ سولئ يوسى.

²²هغوئ عيسىٰ ګولګتا نُومے ځائے ته راوستو چه مطلب ئے دَ کُپرئ ځائے دے.

²³هغۀ ته ئے دَ مُر سره ګډ کړى شراب ورکړل خو هغۀ ونۀ څښل.

²⁴بيا هغوئ هغه په سولئ پورے وتړلو اَؤ دَ هغۀ جامے ئے په خپلو کښے وويشلے، هسک ئے پرے واچوو چه کُوم شے دَ چا شى.

²⁵دَ سولئ وخت دَ سحر نهه بجے وو.

²⁶اؤ دَ هغۀ خلاف لګولے شوے اِلزام چه په تخته ئے ليکلے وو، داسے وو، ”دَ يهوديانو بادشاه.“

²⁷دوه ډاکوان ئے هم دَ هغۀ سره په سولئ کړى وُو، يو دَ هغۀ ښى لاس ته اَؤ بل دَ هغۀ ګس لاس ته.

²⁸دغه شان دَ صحيفو دا پيشن ګوئى صحيح ثابته شوه چه ”هغه دَ مُجرمانو سره يو ځائے شو.“

²⁹په لاره تيريدُونکو هغۀ ته کنځلے کولے، هغوئ چغے کړے، سرُونه ئے وخوزول چه ”واه! تۀ چه دَ خُدائے کور نړوے اَؤ په دريو ورځو کښے به ئے بيا جوړوے!

³⁰دَ دے سولئ نه راکُوز شه اَؤ خپل ځان بچ کړه!“

³¹دغه شان مشرانو کاهنانو اَؤ دَ شرعے عالمانو هم په خپلو کښے ورپورے ټوقے کولے اَؤ وئيل ئے چه ”هغۀ خو نور خلق بچ کول خو خپل ځان نۀ شى بچ کولے.

³²پريږدئ چه مسيح، دَ اِسرائيلو بادشاه، اوس دِ دَ سولئ نه راکُوز شى. که مُونږ دا ووينُو نو ايمان به پرے راؤړُو.“ تر دے چه هغه څوک چه دَ هغۀ سره په سولئ شوى وُو هغوئ هم هغه ملامتولو.

³³دَ غرمے مال په ټوله مزکه تيارۀ راخوره شوه اَؤ دَ کُوز ماسپښين تر دريو بچو پورے وه.

³⁴اَؤ درے بجے عيسىٰ په زوره چغے کړے چه ”ايلى! ايلى! لما شبقتنى؟“ چه ترجمه ئے دا ده، ”زما خدايه! زما خدايه! تا زَۀ ولے پريښودلم؟“

³⁵ځنے ولاړو خلقو چه دا واؤريدل نو وئے وئيل، ”وګورئ! هغه اِلياس ته نعرے وهى.“

³⁶يو سړى دؤ کړو، يو اسفنج ئے دَ سرکے نه ډک کړو اَؤ دَ هغۀ شُونډو ته ئے دَ يوے لښتے په سر ونيولو اَؤ هغۀ ووئيل چه ”ګورُو چه اِلياس راشى اَؤ دَئے راکُوز کړى.“

³⁷بيا عيسىٰ يوه کريکه وويسته اَؤ ساه ئے ورکړه.

³⁸اَؤ دَ خُدائے دَ کور پرده دَ يو سر نه بل سر ته دوه ټوټے شوه.

³⁹اَؤ کُوم صوبه دار چه هغۀ ته مخامخ ولاړ وو چه هغۀ وليدل چه هغۀ څنګه ساه ورکړه نو وئے وئيل، ”رښتيا دى چه دا سړے دَ خُدائے زوئے وو!“

⁴⁰يو څو ښځے هم هلته موجُودے وے اَؤ دَ ورايه ئے ننداره کوله. په هغوئ کښے مريم مګدلينى، دَ کشر يعقُوب اَؤ يوسيس مور مريم اَؤ سلومى وے.

⁴¹څۀ وخت چه هغه په ګليل کښے وو نو دوئ ټولے دَ هغۀ سره وے اَؤ خدمت ئے ورله کاوو اَؤ نورے ډيرے داسے وے څوک چه دَ هغۀ سره بيتُ المُقدس ته راغلے وے.

⁴²اوس ماښام شوے وو اَؤ هر کله چه دا دَ سبت نه وړُومبئ دَ تيارئ ورځ وه،

⁴³دَ اريمتيه يُوسف نومے يو سړے راغے څوک چه دَ جرګے يو عزتمن غړے وو اَؤ هغه سړے چه دَ خُدائے دَ بادشاهئ دَ راتلو په اِنتظار وو، په زړه ورتيا سره پيلاطوس ته لاړو اَؤ دَ عيسىٰ لاش ئے ترے وغوښتو.

⁴⁴پيلاطوس په دے خبر آؤريدو حيران شو چه هغه بيا مړ هم دے، نو هغۀ صوبه دار راوغوښتو اَؤ تپوس ئے ترے وکړو چه ”دَ هغۀ ډير ساعت کيږى چه مړ دے؟“

⁴⁵اَؤ هر کله چه هغۀ دَ صوبه دار بيان واؤريدو نو هغۀ يُوسف له اِجازت ورکړو چه لاش يوسى.

⁴⁶بيا يُوسف مهينه لټه راؤړه، هغه ئے دَ سولئ نه راکُوز کړو اَؤ په کفن کښے ئے ونغښتو، بيا ئے هغه په ګټه کښے په کنستى ګنبد کښے کيښودو اَؤ يو لوئے کاڼے ئے دَ ګنبد خُلے ته راورغړوو.

⁴⁷اَؤ مريم مګدلينى اَؤ دَ يوسيس مور مريم هغه ځائے وليدو اَؤ هغه ځائے ئے په نخښه کړو چه هغه ئے په کښے ايښے وو.