Read Pashto Bible (Yusufzai) — د پښتو مقدس کتاب مرقوس 7 Bible Online

مرقوس 7 - Pashto Bible (Yusufzai) — د پښتو مقدس کتاب bible

مرقوس 7

¹فريسيان اَؤ ځنے دَ شرعے عالمان دَ بيتُ المُقدس نه عيسىٰ له راغلل اَؤ جرګه ئے وکړله.

²نو هغوئ وليدل چه دَ هغۀ مُريدان په سخا ناوينځلو لاسُونو ډوډئ خورى.

³ځکه چه فريسيان اَؤ ټول يهوديان دَ خپلو رواياتو په مُطابق هيڅ کله هم په ناوينځلو لاسُونو ډوډئ نۀ خورى، تر څو چه ئے تر څنګلو پورے لاسُونه وينځلى نۀ وى.

⁴کله چه هغوئ بازار نه راشى اَؤ لامبلى ئے نۀ وى هيڅ نۀ خورى، اَؤ ډيرے نورے خبرے داسے دى چه هغوئ دَ روياتو پابندى کوى، لکه دَ رکابو اَؤ دَ تانبے دَ لوښو وينځل.

⁵ځکه دوئ فريسيانو اَؤ دَ شرعے عالمانو دَ هغۀ نه تپوس وکړو چه ”ستا مُريدان دَ مشرانو دَ رواياتو پابندى ولے نۀ کوى چه په ناوينځلو لاسُونو ډوډئ خورى؟“

⁶هغۀ جواب ورکړو چه ”ستاسو په شان دَ مُنافقانو په حقله يشعياه نبى په رښتيا دا پيشن ګوئى کړے وه : ”دا خلق تش په خُلۀ زما عزت کوى خو زړُونه ئے رانه ډير لرے دى.

⁷خو دوئ بے فائدے زما عبادت کوى ځکه چه دوئ دَ اِنسانى حُکمُونو تعليم ورکوى.“

⁸تاسو دَ خُدائے حُکم خو شاته غورزوئ اَؤ دَ بنى آدمو دَ رواياتو پابندى کوئ.“

⁹عيسىٰ هغوئ ته دا هم ووئيل چه ”تاسو به دَ خُدائے حُکم څرنګ شا ته وغورزوئ، تش دَ دے دَ پاره چه دَ رواياتو پابندى وکړئ.

¹⁰ځکه چه مُوسىٰ ووئيل، ”دَ خپل پلار اَؤ مور عزت کوئ“ اَؤ ”کُوم سړے چه خپل پلار اَؤ مور ته بد رد وائى هغه دِ ضرور قتل کړے شى.“

¹¹خو تاسو دا وايئ چه که چرے يو سړے خپل مور يا پلار ته دا ووائى چه زما هر هغه څيز چه ستا پکاريدے شى ما قُربان کړو، مطلب دا چه ما دَ خُدائے په نامه ورکړو،

¹²نو هغه دَ مور اَؤ پلار دَ حق نه بيخى بے غمه شو.

¹³نو دغه شان تاسو دَ خپلو رواياتو په وجه دَ خُدائے حُکمُونه منسُوخ کوئ اَؤ دغه شان نور هم ډير کارُونه تاسو په دے شان کوئ.“

¹⁴په بله موقع هغۀ خلق راوبلل اَؤ ورته ئے ووئيل، ”تاسو ټول زما خبره واؤرئ اَؤ ځان پرے پوهه کړئ.

¹⁵داسے هيڅ څيز نِشته چه اِنسان ئے تير کړى اَؤ هغه پرے پليت شى خو هر هغه څيز چه دَ اِنسان نه وزى هغه اِنسان پليتوى.

¹⁶که تاسو دَ آؤريدو قابل غوږُونه لرئ نو واؤرئ.“

¹⁷هر کله چه عيسىٰ دَ دے خلقو نه بيل شو اَؤ کورته لاړو نو دَ هغۀ مُريدانو دَ مِثالُونو په حقله دَ هغۀ نه تپوس وکړو.

¹⁸هغۀ هغوئ ته ووئيل، ”تاسو هم دَ نورو غوندے ناپوهه يئ؟ تاسو دا نۀ وينئ چه دَ بهر نه چه هر څۀ په اِنسان کښے ننوزى په دے هغه نۀ پليتيږى.

¹⁹ځکه چه دا دَ هغۀ په زړۀ کښے نۀ ننوزى بلکه دَ هغۀ خيټے ته ځى اَؤ دَ حاجت په لارے بهر وزى.“ ځکه هغۀ ټولو خوراکُونو ته پاک ووئيل.

²⁰هغۀ وړاندے ووئيل، ”څۀ چه دَ اِنسان نه روازى هم هغه سړے پليتوى.

²¹ځکه چه دَ اِنسان دَ زړۀ نه بد خيالُونه راوزى، حرام کارئ،

²²غلاګانے، خُونُونه، زِناکارى، حرص، بدئ، ټګئ، بے شرمى، بد نظر، کُفر، مغرُورتيا اَؤ بے وقُوفى.

²³دا ټول بد کارُونه دَ ننه نه راوُزى اَؤ دا سړے پليتوى.“

²⁴بيا عيسىٰ دَ هغه ځايه رُخصت شو اَؤ دَ صور سرحد ته راغے. هلته هغه يو کور ته ورغے، هغۀ دا غوښتل چه څوک ترے خبر نۀ شى، خو دا کله کيدئے شو؟

²⁵سمدستى يوه ښځه چه وړه لُور ئے پيريانو نيولے وه ترے خبره شوه. هغه دَ ننه راغله اَؤ دَ دَۀ په پښو پريوته.

²⁶هغه دَ يُونانى نسل اَؤ دَ شام دَ فينکى نه وه. هغے هغۀ ته عرض وکړو چه ”زما دَ لُور نه پيرى لرے کړه.“

²⁷هغۀ هغے ښځے ته ووئيل چه ”اول بچى په خيټه مړول پکار دى، دا مناسب نۀ دى چه دَ بچو نه دِ ډوډئ وتروړلے شى اَؤ سپو ته دِ وغورزولے شى.“

²⁸هغے ورته ووئيل، ”مالِکه! خو سپى هم دَ بچو دَ ميز دَ لاندے ټُکړے خورى.“

²⁹هغۀ هغے ته ووئيل، ”تا چه دا ووئيل نو خاطر جمع کور ته لاړه شه، پيريان ستا دَ لُور نه وتلى دى.“

³⁰اَؤ هر کله چه هغه کور ته راغله نو لُور ئے په کټ کښے پرته وليده اَؤ پيريان ترے تلى وُو.

³¹دَ صور دَ علاقے نه په واپسئ عيسىٰ دَ صيدا په لارے دَ دِکپولس په حدُونو تير شو اَؤ دَ ګليل دَ درياب علاقے ته ورسيدلو.

³²نو خلقو هغۀ له يو کُوڼ سړے راوستو چه هم چاړا وو اَؤ سوال ئے ورته وکړو چه په هغۀ خپل لاس کيږدى.

³³هغۀ هغه سړے دَ خلقو نه يو خوا ته بوتلو، خپلے ګوتے ئے دَ هغۀ په غوږُونو کښے کيښوے، لاړے ئے ورتُو کړے اَؤ ژبه ئے ورله مسحه کړه.

³⁴بيا ئے آسمان ته وکتل اَؤ آسويلے ئے وکړو اَؤ هغۀ ته ئے ووئيل، ”اِفتح،“ يعنے پرانستے شه.

³⁵دَ دے سره دَ هغۀ غوږُونه خلاص شول اَؤ سمدستى ئے ژبه ګويا شوه.

³⁶عيسىٰ هغوئ منع کړل، وئيل ئے چه چا ته حال مه وايئ. خو هر څومره چه هغۀ منع کول، دومره به هغوئ خبره خوروله.

³⁷دَ هغوئ دَ تعجب څۀ حد نۀ وو. هغوئ ووئيل چه ”دَۀ خو هر څۀ سم کړى دى، څۀ چه هغه کوى ډير ئے ښۀ کوى، تر دے چه هغه کُوڼ له غوږُونه اَؤ چاړا ګانو ته ژبے ورکوى.“