Read Pashto Bible (Yusufzai) — د پښتو مقدس کتاب لوقا 11 Bible Online

لوقا 11 - Pashto Bible (Yusufzai) — د پښتو مقدس کتاب bible

لوقا 11

¹یوه ورځ عیسی په یو ځای کې دعا کوله. کله چې هغه خپله دعا خلاصه کړه نو د شاګردانو څخه یو تن هغه ته وویل: «ای استاده! لکه څنګه چې یحیی خپلو شاګردانو ته دعا کول زده کړي وو، ته یې هم مونږ ته رازده کړه.»

²عیسی هغوی ته وویل: «کله چې تاسو دعا کوئ نو داسې ووایئ: ای آسماني پلاره! ستا نوم دې پاک وي، ستا پادشاهي دې راشي.

³زمونږ ورځینۍ رزق هره ورځ مونږ ته راکړه.

⁴زمونږ ګناهونه وبخښه ځکه چې مونږ هم هغه خلک بخښو چې زمونږ سره بدي کوي او مونږ په ازمایښت کې مه اچوه.»

⁵بیا عیسی خپلو شاګردانو ته وویل: «فرض کړئ ستاسو څخه کوم یو دوست ولري او په نیمه شپه کې د هغه دوست کور ته ورشي او ورته ووایي: «ای دوسته! ماته درې ډوډۍ په پور راکړه.

⁶زما یو دوست چې په سفر کې ؤ زما کور ته راغلی دی او زما سره څه نشته چې د هغه په مخکې یې کېږدم چې ویي خوري.»

⁷او ستاسو دوست د کور له دننه څخه تاسو ته ځواب درکړي: «ما مه نا آرامه کوه، دروازې اوس بندې دي او زه او زما بچیان په خپلو بسترو کې پراته یو. زه نه شم کولی چې راپاڅېږم او تاته کوم څه درکړم.»

⁸زه تاسو ته وایم که چېرې هغه د دوستۍ په خاطر راپانڅیږي او ډوډۍ درنه کړي، خو بیاهم په دې خاطر چې تاسو په سوال کولو نه شرمېږئ نو هغه به راپاڅیږي او هرڅه ته چې اړتیا ولرئ تاسو ته به یې درکړي.

⁹همدارنګه تاسو ته وایم چې وغواړئ نو تاسو ته به درکړل شي، ولټوئ نو پیدا به یې کړئ، دروازه وټکوئ نو درته خلاصه به شي.

¹⁰ځکه هرڅوک چې څه وغواړي نو لاسته به یې راوړي او هرڅوک چې څه ولټوي نو پیدا به یې کړي او هرڅوک چې دروازه وټکوي نو ورته خلاصه به شي.

¹¹آیا په تاسو کې داسې پلار شته چې زوی یې ورڅخه ماهي وغواړي او هغه د ماهي په ځای ورته مار ورکړي؟

¹²یا هغه ورڅخه هګۍ وغواړي او هغه ورته لړم ورکړي؟

¹³نو تاسو چې دومره بد خلک یئ، په دې پوهېږئ چې خپلو اولادونو ته څنګه ښه شیان ورکړئ، نو ستاسو آسماني پلار به څومره زیات روح القدس هغو خلکو ته ورکړي چې ورڅخه یې وغواړي.»

¹⁴عیسی د یو داسې سړي څخه پیری وویست چې ګونګی ؤ او کله چې هغه پیری ووت نو هغه ګونګي سړي په خبرو پیل وکړ او خلک حیران شول.

¹⁵خو ځینو خلکو وویل چې هغه د پېریانو د مشر بعلزبول یعنې شیطان په مرسته پېریان وباسي.

¹⁶نورو د ازمایښت په ډول د عیسی څخه آسماني معجزه وغوښتله،

¹⁷خو عیسی د هغوی په خیالونو پوهېده، نو هغوی ته یې وویل: «هره پادشاهي چې په خپل منځ کې ووېشل شي هغه له منځه ځي. په هره کورنۍ کې چې بې اتفاقي رامنځته شي نو هغه کورنۍ ټوټې ټوټې کیږي.

¹⁸او که چېرې شیطان د خپل ځان په خلاف شي نو د هغه پادشاهي به څنګه پاتې شي؟ خو بیاهم تاسو وایئ چې زه د بعلزبول په مرسته پېریان وباسم.

¹⁹که چېرې زه د بعلزبول په مرسته پېریان وباسم، نو ستاسو خپل پیروان یې د چا په مرسته وباسي؟ نو هغوی به ستاسو په هکله قضاوت وکړي.

²⁰خو که چېرې زه د خدای په قدرت سره پېریان وباسم، نو په دې پوه شئ چې د خدای پادشاهي تاسو ته راغلې ده.

²¹کله چې یو زورور سړی چې په وسله سمبال وي د خپل کور ساتنه کوي نو د هغه مال او جایداد به خوندي وي،

²²خو کله چې د هغه څخه کوم زیات زورور سړی په هغه باندې حمله وکړي او هغه ته ماتې ورکړي، نو د هغه څخه به هغه ټوله وسله چې ورباندې ډاډه ؤ، واخلي او کوم شیان چې هغه غلا کړي دي هغه به په خپلو کې سره ووېشي.

²³څوک چې زما سره نه دی، هغه زما په خلاف دی او څوک چې زما سره د خلکو په راغونډولو کې مرسته نه کوي، هغه یې خپاره واره کوي.

²⁴کله چې د یو سړي څخه پیری راوځي، نو په دښتو کې سرګردانه ګرځي او د آرام کولو دپاره ځای لټوي، خو کله چې داسې ځای پیدا نه کړي نو د خپل ځان سره وایي: «زه به بېرته هغه کور ته لاړ شم چې ورڅخه راوتلی وم.»

²⁵نو کله چې بېرته راشي نو هغه کور جارو شوی او منظم وویني.

²⁶بیا هغه لاړ شي او د ځان څخه بدتر نور اووه پېریان راولي او هغوی ټول راشي، په هغه کس کې ورننوځي او هلته اوسیږي. نو د هغه حال له مخکې څخه هم خراب شي.»

²⁷کله چې عیسی دا خبرې کولې، د خلکو له منځ څخه یوې ښځې په لوړ آواز هغه ته وویل: «بختوره ده هغه ښځه چې ته ورڅخه پیدا شوی یې او تاته یې شیدې درکړي دي.»

²⁸خو عیسی ځواب ورکړ: «هو، لیکن هغه څوک بختور دی چې د خدای کلام اوري او عمل ورباندې کوي.»

²⁹کله چې د عیسی په شاوخوا ډېر خلک راغونډ شول، هغه داسې وویل: «د دې زمانې خلک څومره بدکاره دي. هغوی معجزه غواړي، خو یواځینۍ معجزه چې هغوی ته به وښودل شي هغه د یونس پیغمبر معجزه ده.

³⁰لکه څنګه چې یونس پیغمبر د نینوا د خلکو دپاره یوه نښه وه، نو همداسې به د انسان زوی د دې زمانې د خلکو دپاره یوه نښه وي.

³¹د سبا ملکه به د قیامت په ورځ راپاڅیږي او د دې زمانې خلک به ملامته کړي، ځکه چې هغه د نړۍ د بل سر نه راغلې وه چې د سلیمان د حکمت څخه ډکې خبرې واوري. خو ګورئ اوس دلته یو څوک شته چې د سلیمان نه لوی دی.

³²د قیامت په ورځ به د نینوا خلک راپورته شي او د دې زمانې خلک به ملامته کړي، ځکه چې هغوی د یونس د وعظ په اورېدلو سره توبه وویستله، خو ګورئ څوک چې اوس دلته دی هغه د یونس نه ډېر لوی دی.

³³هیڅوک څراغ د دې دپاره نه روښانه کوي چې هغه په یو پټ ځای کې کیږدي او یا یې د یوې کاسې لاندې کیږدي، بلکې هغه په څراغدان باندې ږدي چې کله خلک راشي نو رڼا یې وویني.

³⁴ستا سترګې ستا د بدن دپاره لکه د څراغ په شان دي. کله چې دې سترګې روغې وي نو ټول بدن به دې هم رڼا وي، خو کله چې دې سترګې خرابې وي نو ستا بدن به هم تیاره وي.

³⁵نو پام کوه، هسې نه په تا کې چې کومه رڼا ده هغه تیاره نه وي.

³⁶که چېرې ستا ټول بدن د روښنایئ څخه ډک وي او یوه برخه یې هم په تیاره کې نه وي، نو ټول بدن به دې داسې روښانه وي لکه څراغ چې په خپله رڼا تا روښانه کړي.»

³⁷کله چې عیسی خپلې خبرې خلاصې کړې، نو یو فریسي هغه ته د ډوډۍ دپاره بلنه ورکړه. عیسی د هغه کور ته ورغی او دسترخوان ته کښېناست.

³⁸کله چې فریسي ولیدل چې عیسی له خوراک څخه مخکې لاسونه ونه وینځل، نو حیران شو.

³⁹عیسی هغه ته وویل: «تاسو فریسیان د خپلو پیالو او قابونو باندینۍ برخې پاکوئ، خو ستاسو زړونه د حرص او بدیو څخه ډک دي.

⁴⁰ای کم عقلو خلکو! چا چې باندینۍ برخه جوړه کړې ده آیا هغه دنننۍ برخه نه ده جوړه کړې؟

⁴¹خو څه چې ستاسو په پیالو او قابونو کې دي هغه غریبانو ته خیرات ورکړئ نو بیا به ټول شیان ستاسو دپاره پاک شي.

⁴²خو ای فریسیانو! ستاسو په حال دې افسوس وي. تاسو د ویلني او سپیلني او نورو بوټو لسمه برخه ورکوئ، خو په انصاف کولو او د خدای سره په مینه کولو کې بې پروایي کوئ. تاسو باید په دې ټولو باندې عمل کولی او هغه نور مو هم له نظره نه غورځولی.

⁴³ای فریسیانو! ستاسو په حال دې افسوس وي. تاسو دا خوښوئ چې په کنیسا ګانو کې مخکې چوکۍ ونیسئ، او دا خوښوئ چې په بازارونو کې دې درته سلامونه واچول شي.

⁴⁴ستاسو په حال دې افسوس وي. تاسو د هغو بې نښو او بې شناختو قبرونو په شان یئ چې خلک ورباندې ګرځي او نه یې پېژني.»

⁴⁵د شریعت د عالمانو څخه یو تن عیسی ته په ځواب کې وویل: «استاده! کله چې داسې خبرې کوې نو زمونږ سپکاوی کوې.»

⁴⁶عیسی ځواب ورکړ: «ای د شریعت عالمانو! ستاسو په حال دې هم افسوس وي. تاسو خلکو ته داسې بارونه ورپه شا کوئ چې په سختۍ سره یې وړي، خو خپله ورته ګوتې هم نه وروړئ.

⁴⁷ستاسو په حال دې افسوس وي. تاسو د هغو پیغمبرانو دپاره زیارتونه جوړوئ چې ستاسو نیکونو وژلي وو.

⁴⁸ستاسو نیکونو چې کوم کارونه کړي دي تاسو په خپله هغه منئ او تصدیقوئ. هغوی پیغمبران ووژل او تاسو ورته زیارتونه جوړوئ،

⁴⁹له دې امله خدای په خپل حکمت سره وویل: «زه به هغوی ته پیغمبران او رسولان ورولېږم. خو هغوی به له دوی څخه ځینې ووژني او نور به وځوروي.»

⁵⁰نو د دې زمانې د خلکو څخه به د هغو پیغمبرانو د وینو ځواب چې د نړۍ د پیدایښت راهیسې توی شوي دي وغوښتل شي.

⁵¹د هابیل له وژلو نیولې د زکریا تر وژلو پورې چې د قربانۍ د ځای او مقدس ځای ترمنځ ووژل شول. هو، زه تاسو ته وایم چې د دې زمانې خلک به د دې هرڅه دپاره ځواب ورکوي.

⁵²ای د شریعت عالمانو! ستاسو په حال دې افسوس وي. تاسو د علم د کور د دروازې کیلي اخیستې، په خپله هم نه ورننوځئ او څوک چې ورننوځي هغوی هم نه پرېږدئ.»

⁵³کله چې عیسی له هغه کوره ووت، د شریعت عالمانو او فریسیانو د هغه سره ډېر سخت مخالفت پیل کړ او د ډېرو شیانو په هکله یې ورڅخه سختې پوښتنې کولې.

⁵⁴هغوی کوښښ کاوه چې هغه په خپلو خبرو کې راونیسي.