Read Pashto Bible (Yusufzai) — د پښتو مقدس کتاب لوقا 12 Bible Online

لوقا 12 - Pashto Bible (Yusufzai) — د پښتو مقدس کتاب bible

لوقا 12

¹په دې وخت کې په زرګونو خلک راټول شول، او دومره زیات وو چې یو او بل یې تر پښو لاندې کول، نو عیسی لومړی خپلو شاګردانو ته خبرې پیل کړې: «د فریسیانو د خمیرې یعنې د هغوی د منافقت څخه ځانونه ساتئ.

²داسې پټ شی نشته چې ښکاره به نه شي او نه داسې پټ راز شته چې ښکاره به نه شي.

³نو هرڅه چې تاسو په تیاره کې ویلي هغه به په رڼا ورځ واورېدل شي او هرڅه چې تاسو د تړلو دروازو شاته یو بل ته په غوږ کې پټ پټ ویلي دي هغه به د بامونو څخه په لوړ آواز واورېدل شي.

⁴ای زما دوستانو! زه تاسو ته وایم د هغو خلکو څخه مه وېرېږئ چې بدن وژني او له هغې وروسته نور هیڅ نه شي کولی.

⁵خو زه تاسو خبروم چې د چا څخه باید وویرېږئ. له هغه چا څخه وویرېږئ چې د وژلو څخه وروسته دا اختیار لري چې تاسو په دوزخ کې واچوي. هو، زه تاسو ته وایم چې باید د هغه څخه وویرېږئ.

⁶آیا پنځه مرغۍ په دوه روپۍ نه خرڅیږي؟ خو بیاهم له دوی څخه یوه يې هم خدای نه هېروي.

⁷تر دې پورې چې ستاسو د سر ویښتان هم شمېرل شوي دي، نو هیڅ مه وېرېږئ، تاسو د بې شمېره مرغیو څخه زیات ارزښت لرئ.»

⁸عیسی زیاته کړه: «زه تاسو ته وایم هرڅوک چې د خلکو په مخکې په دې اقرار وکړي چې هغه زما د پیروانو څخه دی، نو د انسان زوی به هم د خدای د فرښتو په مخکې اقرار وکړي چې هغه زما د پیروانو څخه دی.

⁹خو هرڅوک چې د خلکو په مخکې زما څخه انکار وکړي نو د انسان زوی به هم د خدای د فرښتو په مخکې د هغه څخه انکار وکړي.

¹⁰هر څوک چې د انسان د زوی په خلاف کومه خبره وکړي نو هغه به وبخښل شي، خو که څوک د روح القدس په ضد کفر ووایي هغه به ونه بخښل شي.

¹¹کله چې هغوی تاسې د محاکمې دپاره کنیسا ګانو یا والیانو یا واکمنانو ته راولي نو په دې هکله اندیښنه مه کوئ چې د خپل ځان څخه به څنګه دفاع کوئ یا څه به وایئ.

¹²ځکه چې په هماغه ساعت به روح القدس تاسو ته درزده کړي چې څه باید ووایئ.»

¹³د ګڼې ګوڼې له منځ څخه یو سړي عیسی ته وویل: «استاده! زما ورور ته ووایه چې زمونږ د پلار میراث زما سره ووېشي.»

¹⁴عیسی هغه ته ځواب ورکړ: «ای وروره! زه چا ستاسو ترمنځ قاضي ټاکلی یم چې ستاسو میراث ووېشم؟»

¹⁵بیا یې خلکو ته وویل: «پام کوئ او خپل ځانونه د هر ډول حرص څخه وساتئ، ځکه چې د انسان رښتینی ژوند په دې نه جوړیږي چې هغه دې ډېره شتمني ولري.»

¹⁶بیا عیسی هغوی ته دا مثال راوړ: «یو شتمن سړی ؤ چې ځمکه یې لرله او هغې ځمکې ښه حاصل ورکړ.

¹⁷هغه د خپل ځان سره فکر وکړ چې: «څه وکړم؟ ما سره دومره ځای نشته چې خپلې غلې دانې په کې وساتم.»

¹⁸بیا هغه وویل: «اوس پوه شوم چې څه وکړم. زه به خپل ګودامونه وران کړم او د هغو نه به لوی ګودامونه جوړ کړم او خپلې غلې دانې او نور شیان به په کې ذخیره کړم.

¹⁹بیا به خپل ځان ته ووایم: ای بختور انسانه! تا سره ډېر زیات ښه ښه شیان شته چې د ډېرو کلونو دپاره دې بس دي. اوس آرام ژوند تېروه، خوره، څښه او مزې کوه.»

²⁰خو خدای هغه ته وویل: «ای کم عقله! همدا نن شپه به دې ساه ووځي، نو دا ټول شیان چې تا د خپل ځان دپاره ساتلي دي هغه به د چا شي؟»

²¹داسې به د هغو خلکو سره کیږي چې د ځانونو دپاره شتمني راټولوي خو د خدای په نظر کې به غریب وي.»

²²بیا عیسی خپلو شاګردانو ته وویل: «نو تاسو ته وایم چې د خپل ژوند په هکله دا اندیښنه مه کوئ چې څه شی به خورئ او هم د خپل بدن په خاطر چې څه به اغوندئ.

²³ځکه چې ژوند د خواړو څخه او بدن د کالیو څخه ډېر ارزښتناک دی.

²⁴کارغانو ته وګورئ، هغوی نه څه کري او نه څه ریبي، نه ساتن ځایونه لري او نه ګودامونه، خو خدای ورته روزي رسوي. تاسو د مرغانو څخه ډېر زیات ارزښت لرئ.

²⁵آیا په تاسو کې څوک کولای شي چې په اندیښنو سره د خپل عمر یو ساعت هم زیات کړي؟

²⁶نو که چېرې تاسو داسې یو کوچنی کار نه شئ کولی، نو بیا ولې د نورو شیانو په هکله اندیښنه کوئ؟

²⁷ځنګلي ګلانو ته وګورئ چې څنګه لوییږي. هغوی نه کار کوي او نه د ځانونو دپاره کالي جوړوي. خو تاسو ته وایم چې حتی سلیمان پادشاه هم د خپل ټول شان او شوکت سره د دې ګلانو په شان ښکلی او سینګار شوی نه ؤ.

²⁸که چېرې خدای د صحرا واښو ته چې نن دلته دي او سبا ته په تنور کې سوځول کیږي داسې ښکلا ورکوي، نو هغه به تاسو ته د هغو څخه ښه کالي در نه کړي؟ ستاسو ایمان څومره کمزوری دی!

²⁹نو اندیښنه مه کوئ چې تاسو به څه خورئ او څه به څښئ.

³⁰ځکه چې د دې نړۍ خلک د دې شیانو په هکله اندیښنه کوي. خو ستاسو آسماني پلار پوهیږي چې تاسو دې شیانو ته اړتیا لرئ.

³¹د دې په ځای تاسو خپلو ځانونو ته د خدای پادشاهي وغواړئ نو هغه به تاسو ته دا شیان هم درکړي.»

³²«ای د شاګردانو کوچنۍ ډلې! مه وېرېږئ، ځکه چې ستاسو د آسماني پلار دا خوښه ده چې تاسو ته پادشاهي درکړي.

³³هرڅه چې لرئ هغه خرڅ کړئ او پیسې یې غریبانو ته ورکړئ. د خپلو ځانونو دپاره د پیسو داسې کڅوړې تیارې کړئ چې هیڅکله نه زړیږي یعنې په آسمان کې داسې خزانې جوړې کړئ چې هیڅکله نه کمیږي، ځکه چې هیڅ یو غل ورته نږدې کېدای نه شي او نه یې چینجي خوړلی شي.

³⁴ځکه په هرځای کې چې ستاسو خزانه وي نو ستاسو زړونه به هم هلته وي.»

³⁵«خپلې ملاګانې وتړئ، د کار دپاره تیار اوسئ او څراغونه مو بل وساتئ.

³⁶د هغو نوکرانو په شان اوسئ چې خپل بادار ته د واده د میلمستیا څخه د بېرته راتللو په انتظار وي. نو چې کله راشي او دروازه وټکوي نو سمدلاسه یې ورته خلاصه کړي.

³⁷بختور دي هغه نوکران چې کله یې بادار راشي او وویني چې هغوی بیداره ناست دي. زه تاسو ته رښتیا وایم چې بادار به خپله ملا وتړي، هغوی به دسترخوان ته کښینوي او رابه شي او د هغوی خدمت به وکړي.

³⁸بختور دي هغه نوکران چې کله یې بادار په نیمه شپه یا د هغې څخه هم ناوخته راشي او وویني چې هغوی بیداره ناست دي.

³⁹خو تاسو باید په دې پوه شئ چې که چېرې د کور خاوند پوهېدلی چې غل به څه وخت راځي نو نه به یې پرېښوده چې د هغه کور ته ورننوځي.

⁴⁰نو تاسو هم باید تیار اوسئ، ځکه چې د انسان زوی به په داسې وخت کې راشي چې تاسو به یې د راتلو انتظار هم نه لرئ.»

⁴¹پطروس وویل: «ای استاده! آیا دا مثال یوازې زمونږ دپاره دی او که د ټولو دپاره؟»

⁴²عیسی ځواب ورکړ: «نو هغه وفادار او هوښیار نوکر څوک دی چې بادار یې د خپلو نوکرانو په سر وټاکي تر څو په خپل وخت هغوی ته خپله برخه خواړه ورکړي؟

⁴³بختور دی هغه نوکر چې بادار یې راشي او هغه په خپل کار کې بوخت وویني.

⁴⁴په رښتیا سره زه وایم چې بادار به هغه د خپل ټول مال او جایداد مسئولیت هغه ته وسپاري.

⁴⁵خو که هغه نوکر د خپل ځان سره ووایي چې بادار به مې دومره ژر رانه شي او د ټولو نورو نوکرانو په وهلو ټکولو پیل وکړي، وخوري، وڅښي او نېشې وکړي،

⁴⁶نو بادار به یې په داسې ورځ راشي چې هغه به یې انتظار هم نه لري او په داسې وخت کې به راشي چې هغه به خبر هم نه وي. نو بادار به هغه ته سخته سزا ورکړي او هغه به په بې ایمانانو کې وشمېرل شي.

⁴⁷هغه نوکر چې په دې پوهیږي چې خپل بادار یې ترې څه غواړي، خو بیاهم تیار نه دی چې هغه کار وکړي، نو هغه به سخت ووهل شي.

⁴⁸مګر هغه نوکر چې په دې نه پوهیږي چې بادار یې څه غواړي او کوم غلط کار وکړي چې د سزا وړ وي، نو لږ به ووهل شي. چا ته چې ډېر ورکړل شي نو ډېر به ورڅخه غوښتل کیږي. څومره ډېر چې چا ته سپارل کیږي هماغومره ډېر ورڅخه غوښتل کیږي.»

⁴⁹عیسی زیاته کړه: «زه د دې دپاره راغلی یم چې په ځمکه اور ولګوم او کاشکې دا اور لا پخوا لګیدلی وای.

⁵⁰زه به د یو سخت تعمید څخه تیرېږم او تر څو پورې چې هغه تر سره شوی نه وي نو زما زړه به ناآرامه وي.

⁵¹آیا تاسو ګومان کوئ چې زه د دې دپاره راغلی یم چې نړۍ ته سوله راولم؟ نه، د سولې دپاره نه، بلکه د بې اتفاقۍ اچولو دپاره راغلی یم.

⁵²ځکه له دې وروسته چې پنځه تنه په یو کور کې وي سره به جلا شي، درې تنه به د دوه تنو او دوه تنه به د درې تنو په خلاف شي.

⁵³پلار به د زوی په خلاف شي او زوی به د پلار په خلاف، مور به د لور او لور به د مور په خلاف، خواښې به د نږور او نږور به د خواښې په خلاف شي.»

⁵⁴همدارنګه عیسی خلکو ته وویل: «کله چې تاسو ووینئ چې ورېځې د لمر پرېواته له خوا راپورته کیږي، نو سمدستي وایئ چې باران به وشي او همداسې کیږي.

⁵⁵کله چې باد د جنوب له خوا ولګیږي نو تاسو وایئ چې سخته ګرمي به شي او همداسې کیږي.

⁵⁶ای منافقانو! تاسو کولای شئ چې ځمکې او آسمان ته په کتلو سره د هوا د حالت پیشګویي وکړئ، نو بیا څنګه اوسنۍ زمانه نه شئ پېژندلی؟

⁵⁷تاسو خپله ولې دا پرېکړه نه شئ کولی چې کومه لاره سمه ده؟

⁵⁸کله چې له خپل مدعي سره قاضي ته ځئ، نو په لاره کې کوښښ وکړئ چې د هغه سره روغه وکړئ، که نه، نو هغه به مو قاضي ته راکاږي او قاضي به تاسو پولیس ته وسپاري او په زندان کې به واچول شئ.

⁵⁹زه تاسو ته وایم چې ترهغې پورې به له زندان څخه راخلاص نه شئ چې ترڅو پورې مو د خپل پور یوه یوه پیسه نه وي ورکړې.»