Read Pashto Bible (Yusufzai) — د پښتو مقدس کتاب لوقا 15 Bible Online

لوقا 15 - Pashto Bible (Yusufzai) — د پښتو مقدس کتاب bible

لوقا 15

¹په دې وخت کې ډېر مالیه ټولوونکي او ګناهکاران عیسی ته ورنږدې شول چې د هغه خبرې واوري.

²خو فریسیانو او د شریعت عالمانو په خپلو کې په ګوریدلو شروع وکړه او ویل یې: «دا سړی د ګناهکارانو سره ناسته ولاړه کوي او حتی د هغوی سره یو ځای ډوډۍ خوري.»

³نو عیسی هغوی ته دا مثال راوړ:

⁴«که چېرې په تاسو کې څوک سل پسونه ولري او یو پسه ورڅخه ورک شي نو هغه به څه کوي؟ آیا هغه به هغه نهه نوي پسونه په دښته کې پرېنږدي او د هغه ورک پسه پسې به لاړ نه شي ترڅو هغه پیدا کړي؟

⁵نو کله چې هغه راپیدا کړي نو په خوشحالۍ سره به یې خپلو اوږو ته پورته کړي.

⁶او کله چې کور ته راشي، خپل ټول دوستان او ګاونډیان به سره راغونډ کړي او هغوی ته به ووایي: «زما سره په دې خوشحالۍ کې شریک شئ ځکه چې خپل ورک شوی پسه مې وموند.»

⁷زه تاسو ته وایم چې په همدې ډول کله چې یو ګناهکار توبه وباسي نو په جنت کې به د هغه دپاره د نهه نوي نېکانو په پرتله چې توبې ته اړتیا نه لري، ډېره خوشحالي وي.

⁸یا فرض کړئ د یوې ښځې سره د سپینو زرو لس سکې وي او یوه ترې ورکه شي. آیا هغه به څراغ بل نه کړي، خپل کور به نه جارو کوي او ټول ځایونه به ونه لټوي ترڅو هغه راپیدا کړي؟

⁹کله چې هغه راپیدا کړي نو خپل دوستان او ګاونډیان به سره راغونډ کړي او هغوی ته به ووایي: «زما سره خوشحالي وکړئ، ځکه چې ما خپله ورکه شوې سیکه راپیدا کړه.»

¹⁰په همدې ډول زه تاسو ته وایم کله چې یو ګناهکار توبه وباسي نو د خدای فرښتې به د هغه دپاره خوشحالي کوي.»

¹¹بیا عیسی وویل: «یو سړي دوه زامن لرل،

¹²کشر زوی یې خپل پلار ته وویل: «پلاره! ما ته مې خپله برخه جایداد راکړه.» نو هغه سړي خپل جایداد د خپلو دواړو زامنو ترمنځ ووېشلو.

¹³څو ورځې وروسته کشر زوی خپله برخه جایداد خرڅ کړ او پیسې یې واخیستلې او یو لیرې وطن ته لاړ او خپلې پیسې یې هلته په عیاشۍ کې بیځایه برباد کړلې.

¹⁴کله چې هغه خپل هرڅه مصرف کړل، په هغه وطن کې سخته قحطي راغله او هغه محتاج شو.

¹⁵نو هغه لاړ او د هغه وطن د یو سړي سره نوکر شو او هغه سړي هغه خپلو پټیو ته ولېږه چې خوګان وساتي.

¹⁶هغه په دې ارمان ؤ چې خپله ګېډه په هغو خواړو باندې مړه کړي چې خوګانو به خوړل، خو هیچا هغه ته څه نه ورکول.

¹⁷په پای کې د هغه عقل سر ته راغی او ویې ویل: «زما د پلار مزدوران دومره زیات خواړه لري چې ورڅخه پاتې کیږي او زه دلته د لوږې له لاسه مړ کېږم.

¹⁸زه به لاړ شم او خپل پلار ته به ورشم او ورته به ووایم چې پلاره! ما د خدای او ستا په وړاندې ګناه کړې ده.

¹⁹زه نور د دې وړ نه یم چې ته راته خپل زوی ووایې. ما هم یو له خپلو مزدورانو څخه وشمیره.»

²⁰نو هغه پاڅېد او د خپل پلار کور ته روان شو. هغه لا کور ته نه ؤ رسېدلی چې پلار یې هغه له لیرې ولیده، زړه یې ورباندې وسوځېده او په منډه منډه د خپل زوی خواته ورغی. هغه یې په غېږ کې ونیوه او ښکل یې کړ.

²¹زوی یې وویل: «پلاره! ما د خدای او ستا په وړاندې ګناه کړې ده. زه نور د دې وړ نه یم چې ستا زوی وګڼل شم.»

²²خو پلار یې خپلو نوکرانو ته وویل: «ژر شئ. تر ټولو ښه چپنه راوړئ او هغه ته یې واغوندئ. ګوته ورته په لاس کړئ او څپلۍ ورته په پښو کړئ.

²³یو چاغ خوسکی راولئ او حلال یې کړئ او راځئ چې میله جوړه کړو او خوشحالي وکړو.

²⁴ځکه چې زما دا زوی مړ شوی ؤ او بېرته راژوندی شوی دی. هغه ورک شوی ؤ، خو اوس پیدا شوی دی.» نو هغوی جشن پیل کړ.

²⁵خو د هغه مشر زوی په دې وخت کې په پټي کې ؤ. کله چې راغی او کور ته رانږدې شو نو د ساز او نڅا آواز یې واورېد.

²⁶نو یو نوکر یې راوغوښت او پوښتنه یې ورڅخه وکړه: «دا څه دي؟»

²⁷نوکر ځواب ورکړ: «ستا ورور راغلی دی او پلار دې یو چاغ خوسکی حلال کړی دی، ځکه چې هغه روغ رمټ بېرته راغلی دی.»

²⁸خو مشر ورور دومره په قهر شو چې نه یې غوښتل کور ته ننوځي. پلار یې دباندې راووت او هغه ته یې زاري وکړه چې کور ته ننوځي.

²⁹خو هغه خپل پلار ته په ځواب کې وویل: «ګوره، کلونه کلونه کیږي چې ما لکه د غلام په شان ستا خدمت کړی دی او هیڅکله مې ستا د امر څخه سرغړونه نه ده کړې. خو ماته دې یو سیرلی هم نه دی راکړې چې خپلو دوستانو ته مې میلمستیا ورکړې وای.

³⁰خو دې زوی دې خپل ټول جایداد په فاحشو باندې برباد کړ او کله چې بېرته کور ته راغی نو تا ورته چاغ خوسکی حلال کړ.»

³¹پلار یې ورته وویل: «زما زویه! ته تل زما سره یې او زه چې هرڅه لرم هغه ستا دي.

³²خو اوس باید جشن ونیسو او خوشحالي وکړو، ځکه چې ستا دا ورور مړ شوی ؤ، خو اوس بېرته راژوندی شوی دی، هغه ورک شوی ؤ، خو اوس پیدا شوی دی.»»