Read Pashto Bible (Yusufzai) — د پښتو مقدس کتاب لوقا 22 Bible Online

لوقا 22 - Pashto Bible (Yusufzai) — د پښتو مقدس کتاب bible

لوقا 22

¹د فطیرې ډوډۍ اختر چې د فسحې په نامه مشهور ؤ نږدې شو.

²مشرانو کاهنانو او د شریعت عالمانو هڅه کوله چې یوه لاره پیدا کړي چې عیسی ووژني، خو له خلکو څخه وېرېدل.

³بیا شیطان د یهودا اسخریوتي په زړه کې چې د هغو دولسو رسولانو څخه ؤ ننوت.

⁴یهودا لاړ او د مشرانو کاهنانو او د خدای د کور د ساتونکو د آمرانو سره یې په دې هکله خبرې وکړې چې څنکه عیسی هغوی ته وسپاري.

⁵هغوی ډېر خوشحاله شول او د هغه سره یې د پیسو وعده وکړه.

⁶نو یهودا ورسره ومنله او د یو ښه فرصت په لټه کې شو چې کله د عیسی شاوخوا ته خلک نه وي هغوی ته یې وسپاري.

⁷بیا د فطیرې ډوډۍ د اختر ورځ چې په هغه کې باید د فسحې وری قرباني شي راورسېد.

⁸نو عیسی پطروس او یوحنا ولېږل او ورته ویې ویل: «لاړ شئ او زمونږ دپاره د فسحې ډوډۍ تیاره کړئ چې ویې خورو.»

⁹هغوی ورڅخه پوښتنه وکړه: «په کوم ځای کې غواړې چې تیاره یې کړو؟»

¹⁰هغه ځواب ورکړ: «واورئ، څنګه چې ښار ته ننوځئ نو یو سړی به ستاسو سره مخامخ شي چې د اوبو منګی به و‌ړي. هغه چې کوم کور ته ننوځي تاسو هم ورپسې لاړ شئ.

¹¹او د کور خاوند ته ووایئ: «استاد وایي د میلمنو کوټه چېرته ده چې زه په کې د خپلو شاګردانو سره د فسحې ډوډۍ وخورم؟»

¹²هغه به تاسو ته پاس په بالاخانه کې یوه لویه فرش شوې کوټه دروښایي، نو هلته ډوډۍ تیاره کړئ.»

¹³هغوی لاړل او هغه شیان یې لکه څنګه چې عیسی ورته ویلي وو په هماغه ډول ولیدل او د فسحې ډوډۍ یې تیاره کړه.

¹⁴کله چې هغه ساعت راورسېد، عیسی د خپلو رسولانو سره دسترخوان ته کښېناست.

¹⁵هغوی ته یې وویل: «زړه مې ډېر غوښتل چې د کړاوونو د ګاللو څخه مخکې ستاسو سره د فسحې ډوډۍ وخورم.

¹⁶ځکه زه تاسو ته وایم چې ترڅو پورې د فسحې د قربانۍ مقصد د خدای په پادشاهۍ کې پوره نه شي ترهغې پورې به نور دا ډوډۍ نه خورم.»

¹⁷بیا عیسی پیاله راواخیسته، شکر یې وویست او ویې ویل: «دا واخلئ او په خپل منځ کې یې ووېشئ.

¹⁸ځکه زه تاسو ته وایم چې له دې وروسته به ترهغې پورې د انګورو شربت ونه څښم ترڅو د خدای پادشاهي رانه شي.»

¹⁹بیا هغه ډوډۍ راواخیسته، برکت یې ورکړ، هغه یې ماته کړه او هغوی ته یې ورکړه او ویې ویل: «دا زما بدن دی چې ستاسو دپاره ورکول کیږي. زما په یاد همداسې کوئ.»

²⁰په همدې ډول د ماښام ډوډۍ څخه وروسته یې پیاله راواخیسته او ویې ویل: «دا پیاله د خدای او انسانانو ترمنځ نوی لوظ دی چې زما د وینې په وسیله جوړیږي چې ستاسو دپاره توییږي.

²¹خو ګورئ، هغه څوک چې زما سره به خیانت کوي هغه دلته زما سره په دسترخوان ناست دی.

²²لکه څنګه چې د خدای له خوا مقرره وه د انسان زوی به مړ کیږي، خو افسوس د هغه چا په حال چې د هغه سره خیانت کوي.»

²³بیا هغوی په خپلو کې یو د بل څخه پوښتنې شروع کړې چې په دوی کې به څوک دا کار کوي.

²⁴بیا د هغوی ترمنځ ناندرۍ شروع شوې چې په دوی کې به څوک د ټولو څخه لوی وګڼل شي.

²⁵عیسی هغوی ته وویل: «د غیریهودیانو پادشاهان په خپلو خلکو باداري کوي او واکمنان د خلکو خیرخواه ګڼل کیږي.

²⁶خو تاسو داسې مه اوسئ، بلکه په تاسو کې دې تر ټولو لوی خپل ځان کوچنی وګڼي او مشر دې د خدمتګار په شان وي.

²⁷خلک څه فکر کوي چې په دوی دواړو کې کوم یو لوی دی، هغه څوک چې ډوډۍ ته ناست دی او یا هغه څوک چې خدمت کوي؟ البته هغه څوک چې ډوډۍ ته ناست دی. خو زه ستاسو په منځ کې د یو خدمتګار په شان یم.

²⁸خو تاسو زما د ازمیښتونو په وخت کې زما سره ولاړ وئ.

²⁹لکه څنګه چې زما پلار ما ته د پادشاهۍ حق راکړی دی، زه هم تاسو ته دا حق درکوم.

³⁰تاسو به زما په پادشاهۍ کې زما په دسترخوان خورئ او څښئ او په تختونو باندې به کښینئ او د اسراییلو په دولسو قبیلو باندې به حکومت کوئ.»

³¹عیسی وویل: «ای شمعونه، ای شمعونه! واوره، شیطان وغوښتل چې تاسو ټول وازمایي، ښه او بد سره بیل کړي لکه څنګه چې دهقان د غنمو څخه بوس جلا کوي.

³²خو شمعونه! ما ستا دپاره دعا کړې ده چې ایمان دې له منځه لاړ نه شي. کله چې دې توبه وویستله او بېرته ماته راوګرځېدلې نو خپل ورونه دې قوي کړه.»

³³پطروس ځواب ورکړ: «ای استاده! زه ستا سره زندان او مرګ ته هم تیار یم.»

³⁴عیسی وویل: «ای پطروسه! زه تاته وایم چې نن شپه به د چرګ د آذان څخه مخکې درې ځلې ووایې چې ته ما نه پېژنې.»

³⁵عیسی د هغوی څخه پوښتنه وکړه: «کله چې ما تاسو بې څپلیو، بې د پیسو له کڅوړې او بې خورجینه ولېږلئ، آیا په هغه وخت کې تاسو سره د کوم شي کمی ؤ؟» هغوی ځواب ورکړ: «نه.»

³⁶عیسی وویل: «خو اوس هر څوک چې د پیسو کڅوړه لري هغه دې د ځان سره واخلي او همدارنګه خپله خورجینه هم. او د هر چا سره چې توره نه وي نو خپله چپنه دې خرڅه کړي او یوه توره دې واخلي.

³⁷ځکه زه تاسو ته وایم چې د پیغمبرانو دا لیکنه باید پوره شي چې وایي: هغه به په جنایتکارانو کې وشمېرل شي ځکه هرڅه چې زما په هکله لیکل شوي دي هغه به رښتیا شي.»

³⁸شاګردانو وویل: «ګوره استاده! زمونږ سره دلته دوه تورې دي.» عیسی ځواب ورکړ: «دا بس دي.»

³⁹عیسی دباندې ووت او د خپل عادت له مخې د زیتون غره ته روان شو او شاګردان یې هم ورپسې لاړل.

⁴⁰کله چې هغه ځای ته ورسېد نو هغوی ته یې وویل: «دعا وکړئ چې په ازمایښت کې ونه لویږئ.»

⁴¹بیا عیسی د هغوی څخه یو څو ګامه لیرې لاړ، په ګونډو شو او دعا یې وکړه.

⁴²هغه وویل: «ای پلاره! که چېرې ستا رضا وي نو دا د زهرو پیاله زما څخه لیرې کړه. خو زما رضا نه بلکه ستا رضا دې پوره شي.»

⁴³بیا د آسمان څخه یوه فرښته هغه ته راښکاره شوه او هغه ته یې قوت ورکړ.

⁴⁴عیسی په ډېر سخت حالت کې ؤ او په ډېر جوش سره یې دعا وکړه او خولې یې د وینو د څاڅکو په شان په ځمکه باندې څڅېدلې.

⁴⁵کله چې عیسی د دعا څخه راپاڅېده، نو شاګردانو ته راغی او ویې لیدل چې هغوی له غمه ستومانه او ویده شوي وو.

⁴⁶هغوی ته یې وویل: «تاسو ولې ویده یئ؟ پاڅېږئ او دعا وکړئ چې په ازمایښت کې ونه لویږئ.»

⁴⁷عیسی لا خبرې کولې چې یوه ډله راغله او یهودا چې د هغو دولسو رسولانو څخه ؤ، د هغوی څخه مخکې روان ؤ. هغه عیسی ته ورنږدې شو چې ښکل یې کړي.

⁴⁸خو عیسی وویل: «ای یهودا! آیا په ښکلولو سره د انسان زوی دښمنانو ته په لاس ورکوې؟»

⁴⁹کله چې د عیسی شاګردانو ولیدل چې څه کیږي، نو ویې ویل: «استاده! آیا په تورو یې ووهو؟»

⁵⁰د هغوی څخه یو تن د لوی کاهن په نوکر ګوزار وکړ او د هغه ښي غوږ یې پرې کړ.

⁵¹خو عیسی وویل: «بس یې دی.» عیسی د هغه سړي په غوږ باندې خپل لاس کېښود او هغه یې روغ کړ.

⁵²بیا عیسی مشرانو کاهنانو، د خدای د کور د ساتونکو آمرانو او نورو قومي مشرانو ته چې د هغه د نیولو دپاره راغلي وو، وویل: «آیا زه کوم داړه مار یم چې د تورو او کوتکونو سره زما د نیولو دپاره راغلي یئ؟

⁵³زه هره ورځ ستاسو سره د خدای په کور کې وم او تاسو زما د نیولو هڅه ونه کړه. خو دا وخت چې تیاره خپره ده نو ستاسو وخت دی.»

⁵⁴هغوی عیسی ونیوه او د لوی کاهن کور ته یې بوتلو او پطروس له لیرې ورپسې روان ؤ.

⁵⁵هغوی د حویلۍ په منځ کې اور بل کړ او ګردچاپیره ورڅخه کښیناستل او پطروس هم د هغوی سره کښېناست.

⁵⁶په داسې حال کې چې هغه د اور رڼا ته ناست ؤ یوې وینځې هغه ولید، نو په ځير ځیر یې ورته وکتل او ویې ویل: «دا سړی هم د عیسی سره ؤ.»

⁵⁷خو پطروس منکر شو او ویې ویل: «ای ښځې! زه هغه نه پېژنم.»

⁵⁸لږ وروسته یو بل سړي هم هغه ته وکتل او ویې ویل: «ته هم د هغو له ډلې څخه یې.» خو پطروس وویل: «ای وروره! زه نه یم.»

⁵⁹شاوخوا یو ساعت وروسته یو بل سړي تایید کړه او ویې وویل: «په دې کې هیڅ شک نشته چې دا سړی هم د عیسی سره ؤ، ځکه چې هغه هم جلیلي دی.»

⁶⁰خو پطروس ځواب ورکړ: «ای وروره! زه نه پوهېږم چې ته څه وایې.» هغه لا خبرې کولې چې سمدلاسه چرګ آذان وکړ.

⁶¹عیسی مخ راواړاوه او پطروس ته یې وکتل او پطروس ته د عیسی خبرې ورپه یاد شوې چې هغه ته یې ویلي وو: «نن شپه به د چرګ د آذان څخه مخکې درې ځلې ووایې چې ته ما نه پېژنې.»

⁶²پطروس دباندې ووت او په چیغو چیغو یې وژړل.

⁶³کومو خلکو چې د عیسی ساتنه کوله په هغه باندې ملنډې ووهلې او ویې واهه.

⁶⁴د هغه سترګې یې وتړلې او پوښتنه یې ورڅخه وکړه: «اوس له غیبو ووایه چې ته چا ووهلې؟»

⁶⁵او نورې ډېرې سپکې خبرې یې هم ورته وکړې.

⁶⁶کله چې ورځ شوه نو قومي مشران، د کاهنانو مشران او د شریعت عالمان سره راټول شول او عیسی یې خپلې شورا ته راوست.

⁶⁷هغوی وویل: «مونږ ته ووایه چې ته مسیح یې؟» هغه ځواب ورکړ: «که زه تاسو ته ووایم نو په ما به باور ونه کړئ

⁶⁸او که زه درڅخه پوښتنه وکړم نو تاسو به ځواب رانه کړئ.

⁶⁹خو له دې وروسته به د انسان زوی د مطلق قادر خدای ښي لاس ته ناست وي.»

⁷⁰هغوی ټولو وویل: «نو بیا ته د خدای زوی یې؟» عیسی ځواب ورکړ: «تاسو خپله وایئ چې زه یم.»

⁷¹هغوی وویل: «نور مونږ شاهدانو ته اړتیا نه لرو. مونږ هرڅه د هغه د خپلې خولې څخه واورېدل.»