Read Pashto Bible (Yusufzai) — د پښتو مقدس کتاب لوقا 24 Bible Online

لوقا 24 - Pashto Bible (Yusufzai) — د پښتو مقدس کتاب bible

لوقا 24

¹د یکشنبې په ورځ سهار وختي ښځو هغه تیارې کړې خوشبویه مسالې د ځان سره واخیستلې او قبر ته لاړې.

²هغوی ولیدل چې تیږه د قبر د خولې نه رغړول شوې وه.

³کله چې دننه ورغلې نو د عیسی مسیح مړی یې هلته پیدا نه کړ.

⁴هغوی لا حیرانې ولاړې وې چې ناڅاپه دوه سړي چې ځلېدونکي کالي یې اغوستي وو د هغوی په خوا کې ودرېدل.

⁵ښځې ووېرېدلې او هغوی خپل سرونه ښکته ونیول، خو هغو سړیو ورته وویل: «تاسو ولې ژوندي په مړو کې لټوئ؟

⁶هغه دلته نشته، هغه راژوندی شوی دی. څه چې هغه درته په جلیل کې ویلي وو هغه درپه یاد کړئ،

⁷چې د انسان زوی باید ګناهکارانو ته په لاس ورکړل شي، په صلیب به وځړول شي او په دریمه ورځ به بېرته راژوندی شي.»

⁸بیا هغو ښځو ته د عیسی خبرې ورپه یاد شوې.

⁹کله چې هغوی بېرته د قبر څخه راغلې نو یوولس رسولان او نور ټول یې د دې پیښې څخه خبر کړل.

¹⁰دا ښځې مریم مجدلیه، یونا او د یعقوب مور مریم وې او نورو ښځو هم چې د هغوی سره وې رسولانو ته دا خبرې وکړې.

¹¹خو د هغوی خبرې رسولانو ته بې معنی ښکاره شوې او په هغوی یې باور ونه کړ.

¹²خو پطروس پاڅېد او د قبر خواته یې منډه کړه. کله چې ورټیټ شو او دننه یې وکتل نو له کفن پرته یې نور هیڅ هم ونه لیدل. نو په دې شوې پیښې حیران شو او لاړ.

¹³په هماغه ورځ د عیسی د پیروانو څخه دوه تنه د عماوس په نوم یو کلي ته چې د اورشلیم څخه دولس کیلومتره لیرې دی روان وو

¹⁴او له یو بله سره یې د دې ټولو پېښو په هکله خبرې کولې.

¹⁵هغوی لا یو د بله سره خبرې او بحث کاوه چې خپله عیسی راغی او د هغوی سره یوځای شو.

¹⁶دوی عیسی ولید، خو د هغوی سترګې داسې شوې لکه چې وتړل شي او هغه یې ونه پېژانده.

¹⁷عیسی هغوی ته وویل: «تاسو په لاره کې د څه شي په هکله یو د بله سره بحث کاوه؟» هغوی ودرېدل او غمجن ښکاره کېدل.

¹⁸په دوی کې یو تن چې کلیوپاس نومیده د هغه څخه پوښتنه وکړه: «آیا ته په اورشلیم کې یواځینی مسافر یې چې له دې څخه خبر نه یې چې په تېرو څو ورځو کې هلته څه پېښ شوي دي؟»

¹⁹عیسی پوښتنه وکړه: «څه شوي دي؟» هغوی ځواب ورکړ: «هغه څه چې د عیسی ناصري سره وشول. هغه د خدای او ټولو خلکو په نظر کې په وینا او عمل دواړو کې یو زورور پیغمبر ؤ.

²⁰خو زمونږ مشرانو کاهنانو او واکمنانو هغه پیلاتوس ته وسپاره چې د مرګ سزا ورته ورکړل شي او هغه یې په صلیب ځوړند کړ.

²¹مونږ هیله درلوده چې همدا سړی به اسراییلو ته خلاصون ورکوي. خو نن دریمه ورځ ده چې دا کار شوی دی.

²²برسیره پردې، زمونږ د ډلې څو ښځو مونږ حیران کړو. هغوی نن سهار وختي د هغه قبر ته تللې وې،

²³خو د هغه مړی یې پیدا نه کړ. هغوی بېرته راغلې او وایي چې په رویا کې یې فرښتې ولیدلې چې دوی ته یې وویل چې هغه ژوندی دی.

²⁴بیا زمونږ یو څو کسان قبر ته لاړل او څه چې هغو ښځو ویلي وو هغه یې ولیدل، خو عیسی یې ونه لیده.»

²⁵عیسی هغوی ته وویل: «تاسو څومره ناپوهه یئ او د پیغمبرانو د ویناوو په منلو کې زړه نا زړه یئ.

²⁶آیا دا ضروري نه وه چې مسیح دا کړاوونه وویني او بیا دې خپل جلال ته ورسیږي؟»

²⁷بیا عیسی د موسی د تورات څخه نیولې د ټولو پیغمبرانو تر لیکنو پورې چې د خدای په کلام کې خپله د هغه په هکله لیکل شوي وو هغوی ته بیان کړل.

²⁸کله چې دوی هغه کلي ته ورنږدې شول چې ورته روان وو نو عیسی داسې وکړل چې ګوندې هغه نور هم مخکې ځي.

²⁹خو هغوی ټینګار وکړ او ویې ویل: «زمونږ سره پاتې شه، ځکه چې ورځ په تېرېدو ده او ماښام نږدې دی.» نو عیسی کور ته ننوت چې د هغوی سره پاتې شي.

³⁰کله چې عیسی د هغوی سره دسترخوان ته کښېناست نو ډوډۍ یې راواخیسته، شکر یې پرې وویست، ماته یې کړه او هغوی ته یې ورکړه.

³¹ناڅاپه د هغوی سترګې وغړیدلې او عیسی یې وپېژانده، خو هغه د هغوی د نظر څخه پناه شو.

³²هغوی یو بل ته وویل: «کله چې په لاره کې هغه زمونږ سره خبرې کولې او د خدای کلام یې راته بیانولو، آیا زمونږ زړونه په جوش رانغلل؟»

³³هغوی سمدلاسه راپاڅېدل او بېرته اورشلیم ته لاړل. هلته یې ولیدل چې یوولس رسولان او نور خلک سره راغونډ شوي وو

³⁴او ویل یې چې عیسی په رښتیا راژوندی شوی او شمعون ته ښکاره شوی دی.

³⁵نو په لاره کې چې څه شوي وو هغو دواړو شاګردانو هغوی ته بیان کړل او ورته ویې ویل چې څنګه یې عیسی د ډوډۍ ماتولو په وخت کې وپېژانده.

³⁶هغوی لا د دې پېښو په هکله خبرې کولې چې ناڅاپه عیسی د هغوی په منځ کې ودرېد او هغوی ته یې وویل: «په تاسو دې سلامتي وي.»

³⁷هغوی ټکان وخوړ او سخت ووېرېدل، ځکه ګومان یې کاوه چې د مړي ارواح ویني.

³⁸خو عیسی هغوی ته وویل: «ولې دومره وارخطا یئ؟ ستاسو په زړونو کې ولې داسې شکونه پیدا کیږي؟

³⁹زما لاسونو او پښو ته وګورئ او وګورئ چې دا زه خپله یم. په ما لاس کېږدئ نو بیا به پوه شئ، ځکه چې ارواح غوښه او هډوکي نه لري او لکه څنګه چې تاسو یې وینئ زه یې لرم.»

⁴⁰هغه دا وویل او خپل لاسونه او پښې یې هغوی ته وښودل.

⁴¹هغوی د ډېرې خوشحالۍ او حیرانتیا له امله نه شو کولی چې بیاهم په دې باور وکړي، نو عیسی د هغوی څخه پوښتنه وکړه: «آیا ستاسو سره دلته د خوړلو دپاره څه شته؟»

⁴²هغوی ورته یوه ټوټه کباب شوی ماهي ورکړ،

⁴³نو هغه یې واخیست او د هغوی په مخکې یې وخوړ.

⁴⁴بیا عیسی هغوی ته وویل: «دا زما هغه خبرې دي چې کله زه ستاسو سره وم او تاسو ته به مې ویل چې هغه څه چې د موسی په تورات، د پیغمبرانو په لیکنو او د زبور په کتاب کې زما په هکله لیکل شوي دي، باید رښتیا شي.»

⁴⁵بیا یې د هغوی ذهنونه روښانه کړل ترڅو د خدای په کلام پوه شي

⁴⁶او هغوی ته یې وویل: «همدارنګه لیکل شوي دي چې مسیح باید کړاوونه وزغمي او په دریمه ورځ به بېرته راژوندی شي،

⁴⁷او د هغه په نامه به ټولو قومونو ته دا پیغام ورسول شي چې توبه وباسي او خدای به یې ګناهونه وبخښي او پیل به یې له اورشلیم څخه وي.

⁴⁸تاسو د دې ټولو شیانو شاهدان یئ.

⁴⁹او ګورئ، هغه څه چې زما پلار یې وعده کړې ده درلېږم. خو باید ترهغې پورې په دې ښار کې پاتې شئ ترڅو په تاسو باندې آسماني قوت نازل شي.»

⁵⁰بیا عیسی هغوی د ښار څخه دباندې تر بیت عنیا پورې بوتلل، خپل لاسونه یې پورته کړل او هغوی ته یې برکت ورکړ

⁵¹او په داسې حال کې چې هغوی ته یې برکت ورکاوه د هغوی څخه جلا شو او آسمان ته پورته کړای شو.

⁵²هغوی ورته سجده وکړه او په ډېرې خوشحالۍ سره بېرته اورشلیم ته راستانه شول.

⁵³هغوی خپل ټول وخت د خدای په کور کې خدای ته په ثناه ویلو تېر کړ.