Read Pashto Bible (Yusufzai) — د پښتو مقدس کتاب لوقا 7 Bible Online

لوقا 7 - Pashto Bible (Yusufzai) — د پښتو مقدس کتاب bible

لوقا 7

¹کله چې عیسی خلکو ته خپلې ټولې خبرې وکړې نو کفرناحوم ته لاړ.

²هلته یو رومي منصبدار ؤ او یو نوکر یې درلود چې په هغه ډېر ګران ؤ. هغه نوکر ناروغ ؤ او مرګ ته نږدې ؤ.

³کله چې هغه منصبدار د عیسی په هکله واورېدل، نو یو څو یهودي مشران یې ورولېږل ترڅو د هغه څخه وغواړي چې راشي او نوکر یې روغ کړي.

⁴هغوی عیسی ته راغلل او سختې زارۍ یې ورته وکړې او ورته ویې ویل: «دا سړی په رښتیا سره د دې وړ دی چې مرسته ورسره وکړې،

⁵ځکه چې هغه زمونږ د خلکو سره مینه لري او مونږ ته یې کنیسا هم جوړه کړې ده.»

⁶نو عیسی د هغوی سره لاړ. خو کله چې د هغه کور ته نږدې شو نو هغه منصبدار خپل څو ملګري ورولېږل چې هغه ته ووایي: «ښاغلیه! خپل ځان دې مه په تکلیفوه، زه د دې لایق نه یم چې زما کور ته راشې

⁷او دا مې هم غوره ونه ګڼله چې خپله تاسو ته راشم. ته یوازې حکم وکړه نو زما نوکر به روغ شي.

⁸ځکه چې زه هم د بل د امر لاندې یم او عسکر زما د امر لاندې دي. کله چې کوم یو ته ووایم چې لاړ شه نو هغه ځي او بل ته ووایم راشه نو راځي او خپل نوکر ته ووایم چې دا کار وکړه، نو هغه یې کوي.»

⁹کله چې عیسی دا واورېدل نو حیران شو او هغې لویې ډلې ته یې چې ورپسې روانه وه مخ راواړاوه او ویې ویل: «زه تاسو ته وایم چې ما په اسراییلو کې هم داسې ایمان نه دی لیدلی.»

¹⁰کله چې لېږل شوي کسان بېرته کور ته راستانه شول نو هغه نوکر یې روغ رمټ ولید.

¹¹بله ورځ عیسی د خپلو شاګردانو او د خلکو د یوې لویې ډلې سره نایین نومي ښار ته لاړ.

¹²کله چې د ښار دروازې ته نږدې شو، نو یوه جنازه یې ولیدله چې راووتله. دا مړی د یوې کونډې ښځې ‎یواځینی زوی ؤ او د هغې سره د ښار ګڼ شمیر خلک ملګري وو.

¹³کله چې عیسی هغه ښځه ولیدله، نو زړه یې ورباندې وسوځېده او ورته ویې وویل: «نوره مه ژاړه.»

¹⁴بیا هغه وروړاندې شو او په تابوت باندې یې لاس کېښود او کومو خلکو چې تابوت وړلو ودرېدل. عیسی وویل: «ای ځوانه! تاته وایم راپاڅېږه.»

¹⁵هغه مړی کښېناست او په خبرو یې پیل وکړ او عیسی هغه بېرته خپلې مور ته وسپاره.

¹⁶هغوی ټول وېرې واخیستل، د خدای ثناه یې وویله او ویې ویل: «په مونږ کې یو لوی پیغمبر پیدا شوی دی. خدای راغلی چې د خپل قوم سره مرسته وکړي.»

¹⁷عیسی چې څه کړي وو د هغو خبر په ټولې یهودیې او شاوخوا سیمو کې خپور شو.

¹⁸د یحیی شاګردانو هغه د دې ټولو کارونو څخه خبر کړ. نو یحیی د هغوی څخه دوه تنه راوغوښتل

¹⁹او هغوی یې عیسی ته ورولېږل چې پوښتنه ورڅخه وکړي: «آیا ته هغه څوک یې چې ویل شوي وو باید راغلی وای، یا د کوم بل چا په تمه واوسو؟»

²⁰کله چې هغوی عیسی ته ورغلل، ورته ویې ویل: «مونږ تعمید ورکوونکي یحیی تاته رالېږلي یو چې پوښتنه وکړو چې ته هغه څوک یې چې باید راغلی وای یا د کوم بل چا په تمه واوسو؟»

²¹په هماغه ساعت عیسی ډېر خلک د ډول ډول ناروغیو، طاعون او پېریانو څخه روغ کړل او ډېر ړانده یې بینا کړل.

²²هغه د یحیی استازو ته په ځواب کې وویل: «بېرته لاړ شئ او څه مو چې لیدلي او اوریدلي هغه یحیی ته ووایئ چې څنګه ړانده بینا کیږي، ګوډان کولای شي وګرځي، کوم خلک چې په جذام باندې اخته وو هغه پاک او روغ شوي دي او کاڼه اوري، مړي راژوندي کیږي او غریبانو ته زېری ورکول کیږي.

²³بختور دی هغه څوک چې په ما شک ونه کړي.»

²⁴کله چې د یحیی استازي لاړل نو عیسی د یحیی په هکله د خلکو سره خبرې پیل کړې او ویې ویل: «تاسو د څه شي د لیدلو دپاره دښتې ته تللي وئ؟ آیا د هغې لوخې د لیدلو دپاره چې باد یې خوځوي؟

²⁵نو بیا د څه شي د لیدلو دپاره تللي وئ؟ آیا د هغه چا د لیدلو دپاره چې ښکلي کالي یې اغوستي وو؟ ګورئ، کوم خلک چې قیمتي کالي اغوندي، هغوی په عیش او عشرت کې ژوند تېروي او په ماڼیو کې اوسیږي.

²⁶نو بیا د څه شي د لیدلو دپاره وتلي وئ؟ آیا د یو پیغمبر د لیدلو دپاره؟ هو، زه تاسو ته وایم چې هغه د یو پیغمبر نه هم ډېر لوی دی.

²⁷دا هغه څوک دی چې د هغه په هکله د خدای په کلام کې لیکل شوي دي: ګورۍ، زه به خپل استازی ستا څخه مخکې ولېږم چې ستا دپاره لاره تیاره کړي.»

²⁸عیسی زیاته کړه: «زه تاسو ته وایم چې په دې دنیا کې د یحیی څخه بل څوک لوی نه دی زیږول شوی، خو بیاهم د خدای په پادشاهۍ کې تر ټولو کوچنی د هغه نه لوی دی.»

²⁹کله چې ټولو خلکو او حتی مالیه ټولوونکو د عیسی خبرې واورېدلې، نو په دې یې اقرار وکړ چې د خدای لاره سمه ده، ځکه چې هغوی د یحیی په لاس د تعمید غسل اخیستی ؤ.

³⁰خو فریسیانو او د شریعت عالمانو د خدای هغه پلان چې د هغوی دپاره یې درلود رد کړ، ځکه چې هغوی د یحیی په لاس د تعمید غسل نه ؤ اخیستی.

³¹عیسی وویل: «د دې زمانې خلک د څه شي سره پرتله کړم؟ دا څه ډول خلک دي؟

³²دوی د هغو ماشومانو په شان دي چې په بازار کې ناست وي او یو بل ته چیغې وهي او وایي: «مونږ تاسو ته شپیلۍ ووهله، خو تاسو ګډا ونه کړه. مونږ درته د غم سندرې وویلې، خو تاسو ونه ژړل.»

³³ځکه کله چې تعمید ورکوونکی یحیی راغی هغه به نه ډوډۍ خوړله او نه یې شراب څښل، نو تاسو به ویل چې هغه پېریانو نیولی دی.

³⁴د انسان زوی راغی چې هم خوري او هم څښي نو تاسو وایئ چې دې سړي ته وګورئ، هغه خیټور، شرابي او د مالیه ټولوونکو او ګناهکارانو ملګری دی.

³⁵خو بیاهم د خدای حکمت د هغو خلکو په وسیله چې هغه یې منلی دی رښتینی ثابت شو.»

³⁶یو فریسي عیسی ته بلنه وکړه چې د هغه سره ډوډۍ وخوري، نو عیسی د هغه کور ته ورغی او د هغه سره دسترخوان ته کښېناست.

³⁷په هغه ښار کې یوه بدکاره ښځه اوسېدله. هغه خبره شوه چې عیسی د هغه فریسي په کور کې ډوډۍ خوري، نو د عطرو څخه ډک د مرمرو د بوتل سره راغله.

³⁸هغه ښځه د عیسی شا ته د هغه د پښو سره ودرېدله او ژړل یې. د هغې اوښکې د عیسی په پښو باندې توی شوې او هغه لمدې شوې. ښځې هغه په خپلو ویښتانو باندې وچې کړلې، د هغه پښې یې ښکل کړې او عطر یې ورباندې واچول.

³⁹کله چې هغه فریسي چې عیسی یې میلمه کړی ؤ دا ولیدل نو د خپل ځان سره یې وویل: «که چېرې دا سړی په رښتیا پیغمبر وای نو هغه باید په دې پوه شوی وای چې دا ښځه چې هغه ته لاس وروړي څوک ده او څنګه ښځه ده. هغه یوه ګناهکاره ښځه ده.»

⁴⁰نو عیسی هغه فریسي ته وویل: «ای شمعونه! زه غواړم تاته یو څه ووایم.» هغه وویل: «ښه استاده! ووایه.»

⁴¹عیسی وویل: «دوه کسانو د یو چا څخه پور اخیستی ؤ، د هغو څخه یو یې پنځه سوه د سپینو زرو سکې پوروړی ؤ او بل یې پنځوس سکې.

⁴²هغوی دواړو هیڅ نه لرل چې خپل پور ورکړي، نو پور ورکوونکي هغو دواړو ته خپل پورونه وروبخښل. نو اوس په دې دواړو کې به کوم یو د هغه سره زیاته مینه وکړي؟»

⁴³شمعون ځواب ورکړ: «زما په خیال کوم سړي ته چې زیات پور وبخښل شو.» عیسی وویل: «تا سم قضاوت وکړ.»

⁴⁴بیا یې ښځې ته مخ راواړاوه او شمعون ته یې وویل: «دا ښځه وینې؟ زه ستا کور ته راغلم خو تا زما د پښو دپاره اوبه رانه وړلې، خو هغې په خپلو اوښکو باندې زما پښې ومینځلې او په خپلو ویښتانو یې وچې کړلې.

⁴⁵تا زه ښکل نه کړم، خو د کوم وخت نه چې زه دلته راغلی یم دا ښځه لګیا ده زما پښې ښکلوي.

⁴⁶تا زما سر په تېلو غوړ نه کړ، خو هغې زما په پښو عطر واچول.

⁴⁷نو زه تاته وایم چې هغې زما سره ډېره مینه وښودله، ځکه چې د هغې ډېر ګناهونه وبخښل شول. خو د چا چې لږ بخښل شوي هغه لږه مینه کوي.»

⁴⁸بیا عیسی هغې ښځې ته وویل: «ستا ګناهونه وبخښل شول.»

⁴⁹دسترخوان ته نورو ناستو میلمنو په خپلو کې سره وویل: «دا څوک دی چې حتی ګناهونه هم بخښي؟»

⁵⁰خو عیسی هغې ښځې ته وویل: «ته خپل ایمان وژغورلې، په خیر لاړه شه.»