Read Pashto Bible (Yusufzai) — د پښتو مقدس کتاب لوقا 8 Bible Online

لوقا 8 - Pashto Bible (Yusufzai) — د پښتو مقدس کتاب bible

لوقا 8

¹څه موده وروسته عیسی ښار په ښار او کلي په کلي ګرځیده، وعظ یې کاوه او د خدای د پادشاهۍ زېری یې ورکاوه او هغه دولس شاګردان هم ورسره وو.

²یو څو ښځې چې د ناروغیو څخه یې شفا موندلې وه او د پېریانو څخه خلاصې شوې وې هم ورسره وې: لکه مریم چې په مجدلیه مشهوره وه چې اووه پېریان ورڅخه وتلي وو،

³یونا د خوزا ښځه چې میړه یې د هیرودیس د دربار ناظر ؤ، سوسن او نورې ډېرې ښځې چې د خپلو شتمنیو څخه یې د عیسی او د هغه د شاګردانو سره مرسته کوله.

⁴خلک به د یو ښار او بل ښار څخه عیسی ته راتلل او کله چې ګڼ شمیر خلک سره راغونډ شول نو هغه ورته دا مثال راوړ:

⁵«یو دهقان یا بزګر د تخم شیندلو دپاره پټي ته لاړ. کله یې چې تخم وشینده نو یو څه یې په لاره کې ولوېد، هغه تر پښو لاندې شو او مرغانو وخوړ.

⁶څه تخم په تیږو کې ولوېد او کله چې راشین شو نو د لمدبل د کموالي له امله هغه ژر وچ شو.

⁷څه تخم په اغزو کې ولوېد او اغزي ورسره لوی شول او بوټي یې لاندې کړل.

⁸نور تخم په حاصلخیزه خاوره کې ولوېد. هغه راشین شو او سل چنده زیات حاصل یې ورکړ.» کله چې عیسی خپلې خبرې خلاصې کړې نو په لوړ آواز یې وویل: «که څوک غوږونه لري نو هغه دې واوري.»

⁹بیا د عیسی شاګردانو پوښتنه وکړه چې د دې مثال معنی څه ده،

¹⁰هغه ځواب ورکړ: «تاسو ته د خدای د پادشاهۍ په رازونو د پوهېدلو دپاره پوهه درکړل شوې ده، خو نورو ته دا هرڅه په مثالونو کې ویل کیږي ترڅو: هغوی وګوري خو هیڅ ونه ویني واوري خو هیڅ ورباندې پوه نه شي.

¹¹د دې مثال معنی دا ده: تخم د خدای کلام دی.

¹²هغه تخم چې په لاره کې لویږي دا هغه خلک دي چې کلام اوري، خو شیطان راځي او کلام د هغوی د زړونو څخه وړي ترڅو هغوی ایمان رانه وړي او خلاصون ونه مومي.

¹³کوم تخم چې په تیږو کې لویږي دا هغه خلک دي چې په خوشحالۍ سره کلام اوري او مني یې. خو کلام په هغوی کې ریښې نه وي نیولې. هغوی د یو څه مودې دپاره ایمان راوړي خو د ازمایښت په وخت کې یې له لاسه ورکوي.

¹⁴هغه تخم چې په اغزو کې لویدلی دی، هغه خلک دي چې کلام اوري خو د ژوند اندیښنې، شتمني او د ژوند غوښتنې د هغه د ودې مخه نیسي او مېوه یې هیڅکله نه پخیږي.

¹⁵خو کوم تخم چې په ښې خاورې کې لویږي دا هغه خلک دي چې کلام اوري او په خپل صادق او ښه زړه کې یې ساتي او په صبر سره مېوه ورکوي.

¹⁶هیڅوک داسې نه کوي چې څراغ بل کړي او هغه د لوښي لاندې پټ کړي او یا یې د کټ لاندې کیږدي. بلکې هغه په څراغدان باندې ږدي چې هرڅوک راننوځي او د هغه رڼا وویني.

¹⁷ځکه هیڅ داسې پټ شی نشته چې ښکاره به نه شي او نه داسې پټ راز شته چې څرګند نه شي.

¹⁸نو پام کوئ چې څنګه یې اورئ، ځکه څوک چې څه ولري نو هغه ته به نور هم ورکړل شي، خو هغه څوک چې څه نه لري حتی که د هغوی په ګومان کوم څه چې لري هغه به هم ترې واخیستل شي.»

¹⁹بیا د عیسی مور او ورونه راغلل چې هغه وویني، خو د زیاتې ګڼې ګوڼې له امله یې ونه شو کولی چې هغه ته ځان ورسوي.

²⁰یو چا عیسی ته وویل: «ستا مور او ورونه دباندې ولاړ دي او غواړي چې تا وویني.»

²¹عیسی ځواب ورکړ: «زما مور او ورونه هغه دي چې د خدای کلام اوري او عمل ورباندې کوي.»

²²یوه ورځ عیسی د خپلو شاګردانو سره په کشتۍ کې سپور شو او هغوی ته یې وویل: «راځئ چې د دریاب بلې غاړې ته لاړ شو.» نو هغوی روان شول.

²³کله چې هغوی په کشتۍ کې روان وو نو عیسی ویده شو. په دې وخت کې ناڅاپه په دریاب کې سخت باد راوالوت او کشتۍ د اوبو څخه په ډکېدلو شوه او هغوی د یو لوی خطر سره مخامخ وو.

²⁴شاګردان عیسی ته ورغلل، هغه یې راویښ کړ او ورته ویې ویل: «استاده! استاده! مونږ ډوبیږو.» عیسی راویښ شو او باد او د اوبو څپو ته یې حکم وکړ، طوفان ودرېد او هرڅه آرام شول.

²⁵بیا هغه خپلو شاګردانو ته وویل: «ستاسو ایمان څه شو؟» خو هغوی په وېره او حیرانتیا سره یو بل ته وویل: «دا سړی څوک دی چې حتی باد او اوبو ته امر کوي او هغوی یې مني؟»

²⁶بیا عیسی د خپلو شاګردانو سره د جدریانو سیمې ته چې د جلیل ولایت ته مخامخ دی ورسېد.

²⁷څنګه چې عیسی د کشتۍ څخه راکوز شو نو د هغه ښار د یو سړي سره چې پېریانو نیولی ؤ مخامخ شو. زیاته موده کېدله چې هغه لوڅ ګرځیده او په کور کې نه اوسېده، بلکې په هدیره کې اوسېده.

²⁸کله چې هغه عیسی ولید نو چیغې یې ووهلې او د هغه په پښو کې پرېوت او په لوړ آواز یې وویل: «ای عیسی، ای د خدای تعالی زویه! زما سره څه کار لرې؟ زه تاته زارۍ کوم، ما مه په عذابوه.»

²⁹هغه ځکه داسې وویل چې عیسی پېریانو ته امر کړی ؤ چې د هغه سړي څخه راووځي. هغه سړی څو څو ځلې پېریانو نیولی ؤ. خلکو به د هغه لاسونه او پښې په زنځیرونو تړلې او زولنې به یې ورته اچولې، خو هغه به یې ماتول او پېریانو به هغه دښتې ته بیولو.

³⁰عیسی د هغه څخه پوښتنه وکړه: «ستا نوم څه دی؟» هغه ځواب ورکړ: «زما نوم لښکر دی.» ځکه چې په هغه کې ډېر پېریان وو.

³¹پېریانو عیسی ته زارۍ وکړې چې هغوی د ځمکې تل ته ونه لیږي.

³²هلته نږدې د خوګانو یوه لویه رمه وه چې په یوې غونډۍ باندې څرېدله. نو پېریانو عیسی ته زاري وکړه چې دوی ته اجازه ورکړي چې په خوګانو کې ننوځي، نو هغه ورته اجازه ورکړه.

³³بیا پېریان د هغه سړي څخه ووتل او په خوګانو کې ورننوتل. ټوله رمه په منډه د کمر څخه ښکته دریاب ته ولوېدله او ډوبه شوه.

³⁴کله چې د خوګانو ساتونکو دا پېښه ولیدله نو وتښتېدل او دا خبر یې ښار او بانډو ته ورساوه.

³⁵خلک ددې پیښې د لیدلو دپاره دباندې راووتل. کله چې هغوی عیسی ته راغلل نو هغه سړی یې ولید چې پېریان ورڅخه وتلي وو. هغه د عیسی پښو ته ناست ؤ، کالي یې اغوستي وو او بېرته خپل نورمال حالت ته راغلی ؤ، نو هغوی ووېرېدل.

³⁶کومو خلکو چې دا پېښه لیدلې وه هغوی نورو ته وویل چې دا سړی چې پېریانو نیولی ؤ څنګه روغ شو.

³⁷بیا د جدریان د شاوخوا سیمو ټولو خلکو د عیسی څخه وغوښتل چې له هغه ځایه لاړ شي، ځکه چې هغوی ډېر وېرېدلي وو. نو عیسی په کشتۍ کې سپور شو چې د دریاب بلې غاړې ته لاړ شي.

³⁸بیا هغه سړي چې پېریان ورڅخه وتلي وو عیسی ته زاري وکړه چې اجازه ورته ورکړي د هغه سره لاړ شي، خو عیسی هغه رخصت کړ او ورته ویې ویل:

³⁹«بېرته خپل کور ته لاړ شه او هغه څه چې خدای ستا دپاره کړي دي هغه ټولو ته ووایه.» هغه سړی په ټول ښار کې وګرځېد او عیسی چې د هغه دپاره څه کړي وو هغه یې خلکو ته بیان کړل.

⁴⁰کله چې عیسی بېرته راستون شو، نو خلکو ورته تود هرکلی وویلو، ځکه چې هغوی ټول ورته په انتظار وو.

⁴¹بیا یو سړی چې یایروس نومیده او د یوې کنیسا مشر ؤ راغی او د عیسی په پښو کې پرېوت او زاري یې ورته وکړه چې د هغه سره کور ته لاړ شي،

⁴²ځکه چې د هغه یواځینۍ لور چې دولس کلنه وه د مرګ په حالت کې پرته وه. کله چې عیسی په لاره روان ؤ، خلکو د هرې خوا ورباندې زور راوړ.

⁴³د هغوی په منځ کې یوه ښځه وه چې د دولسو کالو راهیسې ورڅخه وینه بهېدله. هغې خپلې ټولې پیسې په ډاکترانو لګولې وې خو هیچا د هغې علاج نشو کولی.

⁴⁴هغه د شا له خوا راغله او د عیسی چپنې ته یې لاس وروړ او سمدلاسه یې وینه ودرېدله.

⁴⁵عیسی پوښتنه وکړه: «چا ما ته لاس راوړ؟» ټول منکر شول خو پطروس وویل: «استاده! ټول خلک درڅخه راتاو دي او د هرې خوا درباندې زور راوړي.»

⁴⁶خو عیسی وویل: «کوم چا راته لاس راوړ، ځکه زه پوه شوم چې زما څخه یو قوت ووت.»

⁴⁷کله چې هغه ښځه پوه شوه چې پټه نه شي پاتې کېدلی نو په ریږدیدو شوه، راغله او د عیسی په پښو کې پرېوتله او د ټولو په مخکې یې وویل چې ولې یې هغه ته لاس وروړ او څنګه سمدلاسه روغه شوه.

⁴⁸عیسی هغې ته وویل: «لورې! ته خپل ایمان روغه کړې. په خیر لاړه شې.»

⁴⁹عیسی لا خبرې کولې چې د کنیسا د مشر له کوره یو سړی راغی او یایروس ته یې وویل: «ستا لور مړه شوه، استاد ته نور تکلیف مه ورکوه.»

⁵⁰خو کله چې عیسی دا خبره واورېده، نو یایروس ته یې وویل: «مه وېرېږه، يوازې ایمان ولره او هغه به راژوندۍ شي.»

⁵¹کله چې عیسی د یایروس کور ته ننوت نو هغه پرته له پطروس، یوحنا، یعقوب او د هغې انجلۍ د مور او پلاره بل هیچا ته اجازه ورنه کړه چې دننه ورسره لاړ شي.

⁵²ټولو د هغې انجلۍ دپاره ژړا او انګولا کوله. خو عیسی وویل: «مه ژاړئ، هغه مړه نه ده، هغه خو ویده ده.»

⁵³هغوی ټولو په هغه پورې وخندل، ځکه هغوی ښه پوهېدل چې هغه مړه ده.

⁵⁴خو عیسی هغه انجلۍ له لاسه ونیوله او ورته نارې یې کړې: «ای انجلۍ! راپاڅېږه.»

⁵⁵هغه بېرته راژوندۍ شوه او سمدلاسه راپاڅېدله. عیسی هغوی ته امر وکړ چې هغې ته یو څه ورکړئ چې ویې خوري.

⁵⁶د هغې مور او پلار ډېر حیران شول، خو عیسی هغوی ته امر وکړ چې د دې پیښې په هکله چا ته څه ونه وایي.