Read Pashto Bible (Yusufzai) — د پښتو مقدس کتاب لوقا 9 Bible Online

لوقا 9 - Pashto Bible (Yusufzai) — د پښتو مقدس کتاب bible

لوقا 9

¹عیسی خپل دولس شاګردان راوغوښتل او هغوی ته یې قدرت او اختیار ورکړ چې پېریان وباسي او د ناروغیو علاج وکړي.

²نو هغوی یې ولېږل چې د خدای پادشاهي اعلان کړي او ناروغان روغ کړي.

³هغوی ته یې وویل: «د سفر دپاره د ځان سره هیڅ شی مه اخلئ. نه امسا، نه خورجین، نه ډوډۍ، نه پیسې او نه اضافي کالي.

⁴کله چې تاسو کوم کور ته ورشئ نو ترڅو پورې چې په هغه ښار کې یئ په هماغه کور کې پاتې شئ.

⁵که چېرې تاسو ته په کوم ځای کې څوک هرکلی ونه وایي نو هغه ښار پرېږدئ او د هغه ښار خاورې د خپلو پښو وڅنډئ ترڅو د هغوی په خلاف شاهدي وي.»

⁶نو هغوی روان شول، کلي په کلي ګرځیدل او په هرځای کې یې زېری ورکاوه او خلک یې روغول.

⁷کله چی د جلیل والي هیرودیس د هغو ټولو کارونو څخه چې وشول خبر شو نو ډېر پرېشانه شو، ځکه چې ځینو خلکو به ویل چې یحیی بېرته راژوندی شوی دی.

⁸نورو به ویل چې الیاس پیغمبر راښکاره شوی دی او ځینو به ویل چې د پخوانیو پیغمبرانو څخه کوم یو راژوندی شوی دی.

⁹خو هیرودیس وویل: «ما په خپله د یحیی سر پرې کړی دی، نو بیا دا سړی څوک دی چې په هکله یې داسې شیان اورم؟» هیرودیس کوښښ کاوه چې عیسی وویني.

¹⁰کله چې رسولان بېرته راغلل، نو کوم کارونه چې هغوی کړي وو هغه یې عیسی ته بیان کړل. عیسی هغوی د ځان سره واخیستل او د بیت صیدا په نوم ښار ته یوازې لاړل.

¹¹خو خلک خبر شول او ورپسې لاړل. عیسی هغوی ته هرکلی وویلو، د هغوی سره یې د خدای د پادشاهۍ په هکله خبرې وکړې او هغو خلکو ته یې شفا ورکړه چې روغتیا ته یې اړتیا درلوده.

¹²کله چې مازدیګر شو نو هغه دولس شاګردان عیسی ته راغلل او ورته ویې ویل: «دا خلک رخصت کړه چې کلیو او شاوخوا بانډو ته لاړ شي چې ځانونو ته خواړه او د شپې تېرولو دپاره ځای پیدا کړي. دلته هیڅ شی نشته او دا ځای د دښتې په شان دی.»

¹³خو عیسی هغوی ته وویل: «تاسو خپله هغوی ته څه ورکړئ چې ویې خوري.» هغوی وویل: «مونږ سره یوازې پنځه ډوډۍ او دوه ماهيان دي نور هیڅ هم نشته. مګر دا چې مونږ خپله لاړ شو او دې ټولو خلکو ته خواړه واخلو.»

¹⁴(هلته شاوخوا پنځه زره سړي وو.) عیسی خپلو شاګردانو ته وویل: «هغوی پنځوس پنځوس تنه کښینوئ.»

¹⁵شاګردانو همداسې وکړل او ټول يې کښینول.

¹⁶عیسی هغه پنځه ډوډۍ او دوه ماهيان راواخیستل، پورته آسمان ته یې وکتل او هغو ته یې برکت ورکړ. بیا هغه ډوډۍ ماتې کړې او خپلو شاګردانو ته یې ورکړې چې د خلکو په مخ کې یې کیږدي.

¹⁷هغوی ټولو وخوړل او ماړه شول او د ډوډۍ کومې ټوټې چې پاتې شوې شاګردانو هغه راټولې کړې او د هغو څخه دولس ټوکرۍ ډکې شوې.

¹⁸یوه ورځ چې عیسی په یو ګوښه ځای کې دعا کوله او شاګردان یې هم هلته وو، د هغوی څخه یې پوښتنه وکړه: «خلک څه وایي چې زه څوک یم؟»

¹⁹هغوی ځواب ورکړ: «ځینې وایي چې ته تعمید ورکوونکی یحیی یې، ځینې وایي چې الیاس پیغمبر یې، او نور وایې چې د پخوانیو پیغمبرانو څخه کوم یو راژوندی شوی دی.»

²⁰نو عیسی د هغوی څخه پوښتنه وکړه: «تاسو څه وایئ چې زه څوک یم؟» پطروس په ځواب کې وویل: «ته د خدای مسیح یې.»

²¹بیا عیسی هغوی ته په کلکه حکم وکړ چې په دې هکله چا ته څه ونه وایي

²²او ویې ویل: «دا ضروري ده چې د انسان زوی به ډېر کړاوونه وګالي او د قوم مشران، مشران کاهنان او د شریعت عالمان به هغه رد کړي. هغه به ووژل شي او په دریمه ورځ به بېرته راژوندی شي.»

²³بیا یې هغوی ټولو ته وویل: «که څوک غواړي چې زما د پیروانو څخه واوسي نو باید د خپل ځان څخه تېر ي، هره ورځ دې خپل صلیب را واخلي او په ما پسې دې راځي.

²⁴ځکه څوک چې غواړي خپل ژوند وژغوري هغه به له لاسه ورکړي، خو څوک چې خپل ژوند زما په خاطر له لاسه ورکوي نو وبه یې ژغوري.

²⁵د یو چا دپاره به په دې کې څه ګټه وي چې ټوله نړۍ وګټي خو خپل ځان له لاسه ورکړي یا هغه ته زیان ورسوي؟

²⁶که چېرې څوک په ما او یا زما په کلام شرمیږي، نو د انسان زوی به هم کله چې د خپل شان او شوکت او د پلار او سپیڅلو فرښتو د شان او شوکت سره راشي، په هغه باندې وشرمیږي.

²⁷زه تاسو ته رښتیا وایم چې دلته ځینې داسې خلک ولاړ دي چې ترهغې پورې به مړه نه شي ترڅو یې د خدای پادشاهي نه وي لیدلې.

²⁸د دې خبرو څخه اته ورځې وروسته عیسی پطروس، یوحنا او یعقوب د ځان سره واخیستل او د دعا دپاره غره ته وختل.

²⁹کله چې عیسی دعا کوله نو څېره یې بدله شوه او کالي یې سپین وځلېدل.

³⁰ناڅاپه هلته دوه کسان راښکاره شول چې د عیسی سره یې خبرې کولې او هغه موسی او الیاس وو.

³¹هغوی په آسماني شان او شوکت کې راښکاره شول او د عیسی سره یې د خدای د هغه مقصد په هکله چې د هغه په مرګ به په اورشلیم کې پوره شي، خبرې وکړې.

³²په دې وخت کې پطروس او د هغه ملګري په درانده خوب ویده شوي وو، خو کله چې راویښ شول نو د عیسی جلال او هغه دوه سړي چې ورسره ولاړ وو، ولیدل.

³³کله چې موسی او الیاس له عیسی څخه تلل نو پطروس عیسی ته وویل: «ای استاده! څومره ښه ده چې مونږ دلته یو. راځئ چې درې خېمې جوړې کړو، یوه تاته، یوه موسی ته او یوه الیاس ته.» خو پطروس نه پوهېده چې څه وایي.

³⁴هغه لا خبرې کولې چې ورېځ راښکاره شوه او په هغوی باندې یې سیوری وکړ. کله چې شاګردان په ورېځو کې راایسار شول نو ووېرېدل.

³⁵د ورېځې څخه یو آواز راغی او ویل یې: «دا زما زوی دی چې ما غوره کړی دی، هغه ته غوږ ونیسئ.»

³⁶کله چې آواز غلی شو، هغوی ولیدل چې عیسی هلته بلکل یوازې ؤ. شاګردان غلي پاتې شول او څه چې یې لیدلي وو په هغه وخت کې یې د هغو په هکله چا ته څه ونه ویل.

³⁷بله ورځ کله چې عیسی د خپلو درې شاګردانو سره د غره څخه راکوز شو نو ډېر خلک راغلل چې د هغه سره وویني.

³⁸ناڅاپه د هغې ډلې څخه یو سړي چیغه کړه: «ای استاده! زه درته زاري کوم چې زما زوی ته یو نظر وګوره، هغه زما یواځینی زوی دی.

³⁹په هغه باندې پېریان راځي او یو ناڅاپه چیغې ورڅخه وباسي او داسې ټکانونه ورکوي چې د خولې څخه یې ځګونه روان وي. له ډېرو ځپلو وروسته یې په سختۍ سره پرېږدي.

⁴⁰ستا شاګردانو ته مې زارۍ وکړې چې پېریان ترې وباسي خو هغوی ونه شو کولی.»

⁴¹عیسی ځواب ورکړ: «ای د دې زمانې بې ایمانه او بې لارې خلکو! ترڅو پورې به زه تاسو سره یم او ترڅو پورې به تاسو ته حوصله کوم؟» بیا یې هغه سړي ته وویل: «زوی دې دلته راوله.»

⁴²هلک لا راروان ؤ چې پېریانو هغه په ځمکه راګوزار کړ او ویې لړزاوه. عیسی پېریانو ته حکم وکړ چی ترې ووځي او هغه هلک یې روغ کړ او هغه یې بېرته خپل پلار ته وسپاره.

⁴³ټول خلک د خدای لویئ ته حیران پاتې شول. <h>عیسی د دوهم ځل دپاره د خپل مرګ په هکله پیشګویي کوي</h> په داسې حال کې چې ټول خلک د عیسی دې کارونو ته حیران پاتې وو هغه خپلو شاګردانو ته وویل:

⁴⁴«زه چې درته څه وایم هغه ته په غور سره غوږ ونیسئ: د انسان زوی به خپلو دښمنانو ته په لاس ورکړل شي.»

⁴⁵خو شاګردان په دې پوه نه شول چې د دې خبرې معنی څه ده. د دې معنی د هغوی څخه پټه ساتل شوې وه چې ورباندې پوه نه شي او هغوی وېرېدل چې په دې هکله د هغه څخه پوښتنه وکړي.

⁴⁶بیا د شاګردانو ترمنځ دا بحث پیل شو چې په دوی کې څوک تر ټولو لوی دی.

⁴⁷عیسی پوه شو چې د هغوی په زړونو کې څه ګرځي، نو هغه یو ماشوم راوست او په خپل څنګ کې یې ودراوه

⁴⁸او هغوی ته یې وویل: «هرڅوک چې دا ماشوم زما په نوم قبول کړي نو زه یې قبول کړی یم او څوک چې ما قبول کړي نو هغه څوک یې قبول کړی دی چې زه یې رالېږلی یم. ځکه چې په تاسو ټولو کې تر ټولو کوچنی تر ټولو لوی دی.»

⁴⁹یوحنا عیسی ته وویل: «ای استاده! مونږ یو سړی ولید چې ستا په نوم یې پېریان ویستل خو مونږ هغه د دې کار څخه منع کړ، ځکه چې هغه زمونږ د ډلې څخه نه ؤ.»

⁵⁰عیسی هغه ته وویل: «هغه مه منع کوئ، ځکه څوک چې ستاسو مخالف نه دی هغه ستاسو طرفدار دی.»

⁵¹کله چې هغه وخت رانږدې شو چې عیسی آسمان ته یووړل شي، نو په ټینګې ارادې سره اورشلیم ته روان شو.

⁵²هغه د ځان څخه مخکې استازي ولېږل. هغوی لاړل او د سامریې یو کلي ته ورغلل چې د هغه دپاره تیاری ونیسي.

⁵³خو د هغه کلي خلکو عیسی قبول نه کړ، ځکه چې دا ښکاره وه چې هغه د اورشلیم خواته روان ؤ.

⁵⁴کله چې د هغه شاګردانو یعقوب او یوحنا دا ولیدل، نو هغوی وویل: «استاده! آیا ته زمونږ څخه غواړې چې د آسمان څخه اور راوغواړو او دا خلک وسوځوي؟»

⁵⁵خو عیسی ورته مخ راواړولو او هغوی یې ورټل.

⁵⁶بیا هغوی بل کلي ته لاړل.

⁵⁷کله چې هغوی په لاره روان وو، یو سړي عیسی ته وویل: «هرچیرته چې ځې زه به درپسې ځم.»

⁵⁸عیسی هغه ته وویل: «ګیدړان خپل غارونه لري او مرغان ځالې، خو د انسان زوی دومره ځای هم نه لري چې خپل سر ورباندې کیږدي.»

⁵⁹عیسی یو بل سړي ته وویل: «ما پسې راځه.» خو هغه سړی وویل: «ښاغلیه! اجازه راکړه چې لومړی لاړ شم او خپل پلار خاورو ته وسپارم.»

⁶⁰عیسی هغه ته وویل: «پرېږده چې مړي خپل مړي ښخ کړي. ته لاړ شه او د خدای د پادشاهۍ اعلان وکړه.»

⁶¹یو بل سړي وویل: «ای ښاغلیه! زه به تا پسې ځم، خو لومړی اجازه راکړه چې لاړ شم او د خپلې کورنۍ سره خدای پاماني وکړم.»

⁶²عیسی هغه ته وویل: «څوک چې د قلبې کولو په وخت کې شاته ګوري، هغه د خدای د پادشاهۍ وړ نه دی.»