Read Pashto Bible (Yusufzai) — د پښتو مقدس کتاب تثنيه 13 Bible Online

تثنيه 13 - Pashto Bible (Yusufzai) — د پښتو مقدس کتاب bible

تثنيه 13

¹کېدے شى چې پېغمبران يا د خوبُونو تعبير ورکوُونکى د يوې مُعجزې يا يوې عجيبه نښې وعده وکړى،

²اؤ کۀ هغه پېشن‌ګوئى شوې نښې يا مُعجزې څرګندې شى، نو هغوئ وائى، چې نورو معبُودانو ته راواوړئ کُوم چې تاسو نۀ دى پېژندلى اؤ د هغوئ عِبادت وکړئ،

³نو هغه پېغمبرانو يا د خوبُونو تعبير ورکوُونکو ته غوږ مۀ نيسئ. مالِک خُدائ ستاسو خُدائ پاک تاسو معلُوموى چې تاسو د مالِک خُدائ سره د زړۀ د اِخلاصه اؤ د خپل ټول رُوح سره مينه کوئ اؤ کۀ نه.

⁴د مالِک خُدائ تابعدارى کوئ اؤ د هغۀ درناوے کوئ، د هغۀ اِطاعت کوئ اؤ د هغۀ حُکمونه منئ، د هغۀ عِبادت کوئ اؤ د هغۀ وفادار اوسئ.

⁵خو هغه د خوبُونو تعبير ورکوُونکى يا پېغمبران ووژنئ چې تاسو ته وائى چې د مالِک خُدائ خِلاف بغاوت وکړئ، چا چې د مِصر نه راوويستلئ، چرته چې تاسو غُلامان وئ. داسې خلق تاسو د هغه لارې نه اړوى په کُومه باندې چې مالِک خُدائ تاسو له د تلو حُکم درکړے دے. هغوئ دې خامخا ووژلے شى، چې خپل ځانُونه د دې بد عمل نه خلاص کړئ.

⁶کۀ ستاسو ورور، زوئ، لُور، يا په تاسو ګرانه ښځه، يا ستاسو نزدې دوست هم تاسو ته پټ پټ وائى چې د نورو معبُودانو عِبادت وکړئ، هغه معبُودان چې تاسو اؤ ستاسو پلار‌نيکۀ يې هيڅ کله هم عِبادت نه دے کړے.

⁷کېدے شى چې د هغوئ نه يو کس تاسو ته ووائى چې د هغه خلقو د معبُودانو عِبادت وکړئ کُوم چې ستاسو سره نزدې اوسېږى يا د هغه خلقو د معبُودانو کُوم چې ستاسو نه لرې اوسېږى.

⁸چې د هغه يو کس ته هم توجو ونۀ کړئ اؤ مۀ ورته غوږ نيسئ. په هغوئ باندې هيڅ رحم يا ترس مۀ کوئ اؤ د هغوئ خبره مۀ پټوئ.

⁹هغوئ ووژنئ! وړومبے کاڼے تاسو ورګوزار کړئ اؤ بيا نور خلق ورپرېږدئ چې سنګسار يې کړى.

¹⁰سنګسار يې کړئ چې مړ شى! هغوئ کوشش کولو چې تاسو د مالِک خُدائ ستاسو خُدائ پاک نه تاسو واړوى، کُوم چې تاسو د مِصر وطن نه راوويستلئ، چرته چې تاسو غُلامان وئ.

¹¹نو د اِسرائيل ټول خلق به خبر شى چې څۀ وشول، هغوئ به ويرېږى اؤ بيا به هيڅ کله هيڅ څوک هم داسې بد عمل ونۀ کړى.

¹²کله چې تاسو په هغه ښارُونو کښې اوسېږئ چې مالِک خُدائ ستاسو خُدائ پاک يې تاسو له درکوى، نو کېدے شى چې تاسو خبر شئ

¹³چې ستاسو د قوم څۀ لُوفرانو خلقو د خپل ښار خلق بې‌لارې کړى دى چې د هغه معبُودانو عِبادت وکړى چې تاسو يې کله هم د دې نه مخکښې عِبادت نۀ دے کړے.

¹⁴کۀ تاسو داسې يو افواه واورئ، نو د هغې پُوره معلُومات وکړئ، اؤ کۀ رښتيا وى چې دا بد عمل شوے وى،

¹⁵نو بيا د هغه ښار ټول خلق اؤ د هغوئ ټول ځناور هم ووژنئ. هغه ښار پُوره تباه کړئ.

¹⁶کُوم خلق چې هلته اوسېږى د هغوئ ټول مال هم راوړئ اؤ د ښار په مرکزى ځائ کښې يې ډېرے کړئ. بيا هغه ښار اؤ چې په هغې کښې څۀ هم وى مالِک خُدائ ستاسو خُدائ پاک ته د نذرانې په توګه وسوزوئ. دا ښار به د همېشه د پاره کهنډر پاتې کېږى اؤ دا به هيڅ کله بيا آباد نۀ شى.

¹⁷د هغې نه هيڅ يو څيز هم ځان له مۀ اخلئ کُوم چې تباه کولے شى، نو بيا به مالِک خُدائ قهر سوړ شى اؤ په تاسو به رحم وکړى. کۀ تاسو د هغۀ په ټولو حُکمُونو باندې عمل کوئ کُوم چې نن ما درکړى دى اؤ هغه څۀ کوئ چې څۀ درنه غواړى، نو هغه به په تاسو رحم وکړى اؤ ستاسو نه به يو لوئ قوم جوړ کړى، لکه څنګه چې هغۀ ستاسو پلار‌نيکۀ سره وعده کړې ده.