Read Pashto Bible (Yusufzai) — د پښتو مقدس کتاب تثنيه 15 Bible Online

تثنيه 15 - Pashto Bible (Yusufzai) — د پښتو مقدس کتاب bible

تثنيه 15

¹د هر اوؤم کال په آخِر کښې تاسو قرضُونه معاف کوئ.

²دا هغه څۀ دى چې تاسو به يې خامخا کوئ. هر چا چې خپلو اِسرائيليانو له قرض ورکړے وى نو هغه به ورته معاف کوى، هغه به د خپل ګاونډى يا د هغۀ د خپلوان نه دا قرض واپس واخلى، مالِک خُدائ په خپله دا اِعلان کړے دے چې قرض معاف شو.

³چې په يو مُسافر باندې ستاسو قرض وى نو د هغۀ نه پېسې اخستے شئ، خو چې ستاسو په اِسرائيليانو قرض وى نو د هغوئ نه به يې نۀ اخلئ.

⁴مالِک خُدائ ستاسو خُدائ پاک به تاسو له په هغه وطن کښې برکت درکړى کُوم چې تاسو له درکوى. ستاسو د خلقو نه به هيڅ څوک هم غريب نۀ وى،

⁵کۀ تاسو د هغۀ فرمانبردارى کوئ نو هغه هر څۀ پُوره پُوره ومنئ چې نن يې زۀ حُکم درکوم.

⁶نو مالِک خُدائ به تاسو له برکت درکړى، لکه څنګه چې هغۀ وعده کړې ده. تاسو به ډېرو قومُونو له قرض ورکړئ، خو تاسو به د هيچا نه قرض نۀ اخلئ، ستاسو په قبضه کښې به ډېر قومُونه وى، خو تاسو به د هيچا په قبضه کښې نۀ يئ.

⁷کُوم وطن چې مالِک خُدائ ستاسو خُدائ پاک تاسو له درکوى کۀ د هغې په ښارُونو کښې ستاسو خپل يو بنى اِسرائيلے مُحتاج وى، نو خپل زړۀ مۀ سختوئ اؤ د هغۀ مدد کولو نه لاس مۀ نيسئ.

⁸خو سخيان اوسېږئ اؤ چې څومره پېسو ته يې ضرُورت وى نو هغه هومره قرض ورکړئ.

⁹هغۀ ته د څۀ څيز قرض ورکولو نه په دې وجه اِنکار مۀ کوئ چې د قرضُونو د معاف کولو کال نزدې دے. داسې بد سوچُونه خپل ذهن ته مۀ راولئ. کۀ تاسو خپل ورور له قرض ورنۀ کړئ نو هغه به مالِک خُدائ ته ستاسو خِلاف فرياد وکړى اؤ ګُناه به ستاسو په غاړه شى.

¹⁰هغۀ ته چې د څۀ څيز ضرُورت وى نو په خوشحالۍ سره اؤ د زړۀ د اِخلاصه يې ورکړئ، نو مالِک خُدائ به تاسو له په هر کار کښې برکت درکوى.

¹¹په مخ د زمکې به همېشه غريبانان خلق موجُود وى، نو زۀ تاسو له حُکم درکوم چې د خپلو اِسرائيليانو د مدد نه لاس مۀ نيسئ.

¹²کۀ يو عبرانے سړے يا ښځه خپل ځان په تاسو باندې د غُلام يا وينځې په توګه خرڅ کړى، نو چې هغوئ شپږ کاله ستاسو خِدمت وکړى نو د هغې نه پس هغوئ آزاد کړئ. کله چې اوؤم کال راشى، نو هغوئ به خامخا پرېږدئ چې لاړ شى.

¹³کله چې تاسو هغوئ آزادوئ، نو هغوئ تش لاس مۀ لېږئ.

¹⁴چې مالِک خُدائ تاسو له کُوم برکت درکړے وى نو د خپلو ګډو، غلې اؤ د انګُورو شرابو نه ډېر څۀ وکړئ.

¹⁵هغه راپه ياد کړئ چې تاسو په مِصر کښې غُلامان وئ اؤ مالِک خُدائ خپل خُدائ پاک تاسو آزاد کړئ، نو ځکه زۀ تاسو له دا حُکم درکوم.

¹⁶خو کېدے شى چې ستاسو غُلام ونۀ غواړى چې لاړ شى، اؤ هغه ستاسو اؤ ستاسو کورنۍ سره ډېره مينه کوى اؤ د هغۀ د پاره ستاسو سره پاتې کېدل ښۀ وى.

¹⁷نو د خپل کور دروازې ته هغه بوځئ اؤ هلته د هغۀ غوږ سُورے کړئ، نو هغه به ټول عُمر ستاسو غُلام وى. د خپلې وينځې سره هم دغه شان سلُوک کوئ.

¹⁸کله چې تاسو يو غُلام آزادوئ نو خفه کېږئ مۀ، ځکه چې آخِر هغۀ هم د يو مزدُور په نيم قيمت شپږ کاله ستاسو خِدمت کړے دے. هم دغه شان کوئ، نو مالِک خُدائ ستاسو خُدائ پاک به په هر کار کښې تاسو له برکت درکوى.

¹⁹د خپل څاروى يا ګډې هر يو وړومبے نر بچے مالِک خُدائ ستاسو خُدائ پاک د پاره بېل کړئ، د دې څاروو نه يو هم د کار د پاره مۀ اِستعمالوئ اؤ د دې ګډو نه وړۍ مۀ کټ کوئ.

²⁰تاسو، ستاسو کورنۍ اؤ تاسو به هر کال د عِبادت په يو ځائ کښې د مالِک خُدائ په حضُور کښې دا خورئ.

²¹خو کۀ په يو ځناور کښې څۀ عېب وى، کۀ هغه ګوډ وى، ړُونډ يا څۀ بل غټ نُقص په کښې وى، نو تاسو به هغه مالِک خُدائ خپل خُدائ پاک ته نۀ قُربانى کوئ.

²²داسې ځناور تاسو په خپل کور کښې خوړے شئ، ستاسو هر يو کس، کۀ پاک وى يا ناپاک، نو دا خوړلے شى، لکه څنګه چې تاسو هوسۍ يا غرڅۍ خورئ.

²³خو د دې وينه د خوراک د پاره مۀ اِستعمالوئ، اؤ خامخا يې د اوبو په شان په زمکه تويَوئ.