Read Pashto Bible (Yusufzai) — د پښتو مقدس کتاب تثنيه 16 Bible Online

تثنيه 16 - Pashto Bible (Yusufzai) — د پښتو مقدس کتاب bible

تثنيه 16

¹د ابيب په مياشت کښې د فسحې اختر کولو سره د مالِک خُدائ خپل خُدائ پاک درناوښت کوئ، دا هغه مياشت وه چې مالِک خُدائ ستاسو خُدائ پاک تاسو د مِصر نه د شپې راوويستلئ.

²د مالِک خُدائ خپل خُدائ پاک د فسحې اختر د قُربانۍ د پاره هلته خپل يو ګډ يا يو څاروے حلال کړئ کُوم ځائ چې هغۀ د خپل نُوم د درناوى د پاره خوښ کړے وى.

³کله چې تاسو دا خوراک وخورئ، نو خمبيره شوې ډوډۍ به نۀ خورئ. اووۀ ورځې به تاسو پتيره ډوډۍ خورئ، هم هغه شان لکه څنګه چې تاسو د مِصر نه په تېزۍ سره راووتلئ. دا ډوډۍ خورئ اؤ د دې نُوم به د تکليفُونو ډوډۍ وى، چې تر کُومې پورې تاسو ژوندى يئ نو ستاسو به هغه ورځ ياده وى چې د مِصر وطن نه راوتلئ.

⁴اووۀ ورځې به ستاسو په وطن کښې د هيچا په کور کښې خمبيره نۀ وى، اؤ د وړومبۍ ورځې په ماښام د حلال شوى ځناور غوښه به هم په هغه شپه خوړلے شى.

⁵د فسحې د اختر ځناور د عِبادت په هغه يو ځائ کښې حلالوئ، د هغه وطن په بل يو ځائ کښې هم نۀ کُوم چې مالِک خُدائ ستاسو خُدائ پاک يې تاسو له درکوى. تاسو داسې د نمرپرېواتو په وخت کښې کوئ، د ورځې په دې وخت کښې تاسو د مِصر نه ووتلئ.

⁷غوښه ويشوئ اؤ د عِبادت په هغه يو ځائ کښې يې وخورئ، اؤ په ورپسې سحر واپس کور ته راشئ.

⁸ورپسې شپږ ورځې به تاسو پتيره ډوډۍ خورئ اؤ په اوومه ورځ د مالِک خُدائ خپل خُدائ پاک د عِبادت د پاره راغونډ شئ اؤ په هغه ورځ کار مۀ کوئ.

⁹چې تاسو د فصل رېبل شروع کړئ نو د هغه وخت نه اووۀ هفتې وشمېرئ،

¹⁰اؤ بيا د مالِک خُدائ ستاسو خُدائ پاک درناوى د پاره د لَو کولو اختر وکړئ، هغۀ چې کُوم برکت درکړے دے د هغې په مُطابق هغۀ ته يوه رضاکارانه نذرانه راوړئ.

¹¹د مالِک خُدائ په حضُور کښې تاسو سره د خپلو بچو، ستاسو نوکرانو، ليويانو، مُسافرو، يتيمانو اؤ د هغه کونډو سره خوشحاله شئ چې ستاسو په ښارُونو کښې اوسېږى. د عِبادت په هغه يو ځائ کښې هم دغه شان کوئ.

¹²ګورئ چې په دې حُکمُونو باندې عمل وکړئ، دا خبره مۀ هېروئ چې تاسو په مِصر کښې غُلامان وئ.

¹³چې تاسو خپل ټول فصل راټول کړئ اؤ خپل ټول انګُور نچوړ کړئ، نو اووۀ ورځې د جُونګړو اختر کوئ.

¹⁴تاسو د خپلو بچو سره، خپلو نوکرانو اؤ د ليويانو، مُسافرو، يتيمانو اؤ د هغه کونډو سره د دې نه خوند واخلئ چې ستاسو په ښارُونو کښې اوسېږى.

¹⁵مالِک خُدائ ستاسو خُدائ پاک چې کُوم ځائ خوښ کړے وى نو په هغه ځائ کښې اووۀ ورځې اختر وکړئ. خوشحاله اوسئ، ځکه چې مالِک خُدائ ستاسو فصل اؤ ستاسو کار له برکت ورکړے دے.

¹⁶ستاسو د قوم ټول سړى به په کال کښې درې ځل د مالِک خُدائ عِبادت د پاره هغه يو ځائ ته راځى : يعنې د فسحې اختر، د لَو کولو اختر اؤ د جُونګړو اختر په وخت. يو سړے به هم مالِک خُدائ له خالى لاسُونه نۀ راځى،

¹⁷اؤ چې څومره يې وس وى، دا به د هغه برکت په مُطابق وى چې مالِک خُدائ خپل خُدائ پاک هغۀ له ورکړے وى.

¹⁸په هر يو ښار کښې چې مالِک خُدائ ستاسو خُدائ پاک يې درکوى په هغې کښې قاضيان اؤ نور آفسران مُقرر کړئ. دا سړى به د چا د طرفدارۍ نه بغېر فېصلې کوى.

¹⁹هغوئ به په خپلو فېصلو کښې د بې اِنصافۍ نه کار نۀ اخلى، اؤ رشوت دې نۀ اخلى، ځکه چې رشوت هوښيار خلق ړندوى او د صادقانو په خبرو کښې چالاکى پيدا کوى.

²⁰همېشه عدل اؤ اِنصاف کوُونکى اوسئ، نو چې هغه وطن قبضه کړئ چې مالِک خُدائ ستاسو خُدائ پاک يې تاسو له درکوى اؤ هلته اوسېږئ.

²¹کله چې تاسو مالِک خُدائ خپل خُدائ پاک د پاره يوه قُربان‌ګاه جوړوئ، نو د هغې په څنګ کښې د لرګى د اشيرې بُت ستنه مۀ ودروئ.

²²اؤ د بُت پرستۍ د پاره د کاڼى ستنه مۀ ودروئ، مالِک خُدائ د دې څيزُونه نه نفرت کوى.