Read Pashto Bible (Yusufzai) — د پښتو مقدس کتاب تثنيه 17 Bible Online

تثنيه 17 - Pashto Bible (Yusufzai) — د پښتو مقدس کتاب bible

تثنيه 17

¹مالِک خُدائ ستاسو خُدائ پاک ته داسې يو څاروے يا ګډ هم مۀ قُربانى کوئ چې څۀ عېب په کښې وى، مالِک خُدائ د دې کار نه نفرت کوى.

²کۀ تاسو واورئ چې ستاسو په يو ښار کښې څۀ سړو يا ښځو د مالِک خُدائ خِلاف ګُناه کړې ده اؤ د هغۀ تړون يې مات کړے دے

³چې هغوئ د نورو معبُودانو، د نمر، سپوږمۍ، يا د ستورو عِبادت اؤ خِدمت يې کړے وى اؤ د مالِک خُدائ د حُکم مُخالفت يې کړے وى،

⁴نو کۀ داسې يو خبر واورئ، نو د هغې پُوره معلُومات وکړئ. کۀ دا رښتيا وى چې په اِسرائيليانو کښې داسې ګنده کار شوے وى،

⁵نو هغه کس د ښار نه بهر بوځئ اؤ سنګسار يې کړئ.

⁶په هغه وخت کښې به هغه وژلے شى چې دوه يا د دوؤ نه زيات ګواهان د هغۀ خِلاف ګواهى ورکړى، خو کۀ صِرف يو ګواه وى نو هغه به نۀ شى وژلے.

⁷وړومبى کاڼى به ګواهان ورولى اؤ بيا به يې باقى نور خلق سنګسار کړى، چې ستاسو نه دا بدى لرې شې.

⁸کۀ داسې لانجې وى چې د هغې فېصله کول د هغه ځائ د قاضيانو د پاره ګران وى، لکه د جائيداد حقُونو يا د چا د زخمى کېدلو لانجې يا چې په قصد سره يا په غلطۍ سره د قتل په مېنځ کښې فرق کول وى، نو چې داسې وشى، نو د عِبادت هغه يو ځائ ته لاړ شئ چې مالِک خُدائ ستاسو خُدائ پاک خوښ کړے وى،

⁹اؤ خپله لانجه د ليوى قبيلې اِمامانو ته يا په هغه وخت کښې چې کُوم قاضى حاضر وى هغۀ ته يې پېش کړئ، نو هغوئ پرېږدئ چې هغه لانجه فېصله کړى.

¹⁰هغوئ به خپله فېصله وکړى اؤ چې هغوئ تاسو ته څنګه وائى نو تاسو به هم هغه شان کوئ.

¹¹د هغوئ فېصله ومنئ اؤ چې د کُوم قانُون پُوره وضاحت درته وکړى نو په هغې عمل وکړئ.

¹²هر څوک چې دا جُرات وکړى اؤ د قاضى يا د اِمام دا فېصله ونۀ منى نو هغه دې خامخا ووژلے شى، چې د اِسرائيلو نه دا ګنده کار ختم شې.

¹³نو هر څوک چې د دې نه خبر شى نو وبه يرېږى اؤ د عدالت فېصلې به منى.

¹⁴کله چې تاسو هغه وطن ونيسئ چې مالِک خُدائ ستاسو خُدائ پاک يې تاسو له درکوى اؤ تاسو هلته اوسېږئ، نو تاسو به ووايئ چې ستاسو نه ګېر‌چاپېره قومُونو په شان تاسو ته هم د يو بادشاه ضرُورت دے.

¹⁵ګورئ! کُوم سړے چې د بادشاهۍ د پاره تاسو غوره کوئ نو چې هغه مالِک خُدائ هم غوره کړے وى. نو په کار دے چې هغه ستاسو د خپل قوم نه وى، يو مُسافر خپل بادشاه مۀ جوړوئ.

¹⁶هغه بادشاه به د ځان د پاره ډېر اسُونه نۀ ساتى اؤ هغه دې خلق مِصر ته نۀ لېږى چې اسُونه په پېسو واخلى، ځکه چې مالِک خُدائ وئيلى دى چې د هغۀ خلق به هيڅ کله واپس هلته نۀ ځى.

¹⁷د بادشاه دې ډېرې ښځې نۀ وى، ځکه چې دا به هغه د مالِک خُدائ نه واړوى، اؤ هغه دې خپل ځان په سپينو زرو يا سرو زرو نۀ مالداره کوى.

¹⁸کله چې هغه د بادشاهۍ په تخت کښېنى، نو هغه به د خپل ځان د پاره د دې قانُون يو نقل وليکى، دا کار به د ليوى قبيلې د اِمامانو په وړاندې کېږى.

¹⁹هغه به دا کِتاب د ځان سره نِزدے ساتى اؤ ټول عُمر به يې وائى، چې د مالِک خُدائ نه يرېدل ايزده کړى اؤ په وفادارۍ سره به په هغه هر څۀ باندې عمل کوى چې په دې کِتاب کښې يې حُکم راغلے دے.

²⁰نو هغه به خپل ځان د خپلو خلقو نه اُوچت نۀ ګڼى اؤ د مالِک خُدائ د حُکمُونو نافرمانى به نۀ کوى. نو هغه به ډېر کالونه حکومت وکړى اؤ د هغۀ اولاد به ډېره موده په اِسرائيلو باندې بادشاهى وکړى.