Read Pashto Bible (Yusufzai) — د پښتو مقدس کتاب تثنيه 18 Bible Online

تثنيه 18 - Pashto Bible (Yusufzai) — د پښتو مقدس کتاب bible

تثنيه 18

¹د ليوى قبيلې هيچا ته به هم په زمکه کښې حِصه نۀ ملاوېږى، نۀ اِمامانو ته اؤ نۀ يې نورو خلقو ته، د دې په ځائ هغوئ به په هغه نذرانو اؤ قربانو ژوند تېروى کُومې چې مالِک خُدائ ته ورکولے شى.

²د هغوئ به خپل هيڅ ميراث نۀ وى، لکه چې نورې قبيلې يې لرى، لکه څنګه چې مالِک خُدائ وعده کړې ده چې مالِک خُدائ به په خپله د هغوئ ميراث وى.

³کله هم چې يو څاروے يا ګډ قُربانى کېږى، اِمام له به د دې اُوږه، جامنه اؤ دنننى اندامُونه ورکولے شى.

⁴هغوئ به د دې څيزُونو نه وړومبۍ برخه اخلى : د غلې، د انګُورو شرابو، د زيتُونو تېلو اؤ ستاسو د ګډو د وړو نه.

⁵مالِک خُدائ ستاسو د ټولو قبيلو نه د ليوى قبيله خوښه کړه چې د اِمامانو په توګه همېشه د هغۀ خِدمت وکړى.

⁶هر يو ليوے چې وغواړى نو هغه د اِسرائيلو د هر يو ښار نه د عِبادت هغه يو ځائ ته راتلے شى

⁷اؤ هلته د يو اِمام په توګه د مالِک خُدائ خپل خُدائ پاک خِدمت کولے شى، لکه د نورو ليويانو په شان کُوم چې هلته خِدمت کوى.

⁸د نورو اِمامانو په شان به هغۀ ته هم هغه هومره خوراک ملاوېږى اؤ د هغۀ کورنۍ چې څۀ هم ورلېږى نو هغه د ځان د پاره کېښودے شى.

⁹کله چې تاسو هغه وطن ته ورننوځئ چې مالِک خُدائ ستاسو خُدائ پاک يې تاسو له درکوى، نو چې هلته کُوم قومُونه دى د هغوئ په غلطو رِواجُونو پسې مۀ ځئ.

¹⁰ستاسو په مېنځ کښې دې داسې کس نۀ وى چې خپل بچى په اور کښې قُربانى کوى، اؤ خپل خلق مۀ پرېږدئ چې د غېبو په خبرو عمل وکړى، يا فال وګورى يا په منتر پسې وګرځى

¹¹يا تعويز اِستعمال کړى، د ښاپېرو په ذريعه کار وکړى اؤ هغوئ مۀ پرېږدئ چې د مړو رُوحُونو سره مشورې وکړى.

¹²مالِک خُدائ ستاسو خُدائ پاک د هغه خلقو نه کرکه کوى څوک چې دا بد عملونه کوى، نو مالِک خُدائ به هغه قومُونه وشړى چې تاسو مخ په وړاندې ځئ.

¹³د مالِک خُدائ سره پُوره وفادار اوسئ.“

¹⁴بيا مُوسىٰ ووئيل، ”په هغه وطن کښې، کُوم چې زر تاسو قبضه کړئ، خلق د غېبو خبرې کوُونکو اؤ فالُونو کتُونکو په نصيحت عمل کوى، خو مالِک خُدائ ستاسو خُدائ پاک اِجازت نۀ درکوى چې تاسو داسې وکړئ.

¹⁵خو هغه به تاسو له زما په شان يو پېغمبر راولېږى چې هغه به ستاسو د خپلو خلقو نه وى اؤ تاسو به د هغۀ تابعدارى کوئ.

¹⁶په کُومه ورځ چې تاسو د سينا غرۀ سره راغونډ وئ، تاسو زارى وکړه چې مُونږ نۀ غواړُو چې د مالِک خُدائ خبرې بيا واورُو يا د جلال شُعلې وګورُو، ځکه چې تاسو يرېدلئ چې مړۀ به شئ.

¹⁷نو مالِک خُدائ ما ته ووئيل چې هغوئ صحيح سوال کړے دے.

¹⁸زۀ به هغوئ ته د هغوئ د خپلو خلقو نه ستا په شان يو پېغمبر ورولېږم، زۀ به هغۀ ته وښايم چې هغه به څۀ وائى اؤ زۀ چې کُوم حُکم ورکوم نو هم هغه شان به يې خلقو ته ورسوى.

¹⁹هغه به زما په نُوم خبرې کوى اؤ هر څوک چې د هغۀ د منلو نه اِنکار وکړى نو سزا به ورکړم.

²⁰خو چې کله ما حُکم نۀ وى ورکړے اؤ يو پېغمبر دا جُرات وکړى چې زما په نُوم پېغام ورکړى، نو خامخا به وژلے شى اؤ هغه پېغمبر به هم وژلے شى چې د نورو معبُودانو په نُوم خبرې کوى.

²¹مُونږ څنګه دا وئيلے شُو چې د يو پېغمبر پېغام د مالِک خُدائ نه نۀ دے؟

²²کۀ يو پېغمبر د مالِک خُدائ په نُوم خبرې وکړى اؤ چې کُومه خبره يې کړې وى اؤ رښتيا نۀ شى، نو بيا دا د مالِک خُدائ پېغام نۀ دے. هغه پېغمبر په خپل اِختيار خبرې کړې دى اؤ تاسو له په کار دى چې د هغۀ نه ونۀ يرېږئ.